فادی عاكوم
لەو سەردەمە ترسناك و تۆقێنەرە سیاسی و سەربازییە، زەحمەتە مرۆڤ بیت، لەوەش زەحمەت تر ئەوەیە لە ناوچەی رۆژهەڵاتی ناوەڕاست بیت، لەهەر هەموو ئەوانەش زەحمەت تر و سەخت تر ئەوەیە تۆ كورد بیت، چونكە دوای هەڵگرتنی خەمی پاراستنی ناسنامەو زمان و فەرهەنگ و كلتوورت، خەمی ئەركی بەرگری كردن لە خاك و بەردو مرۆڤەكانیش دەخەیتە كۆڵتەوە.
ئەوەی لە سووریا روویدا، كتێبە مێژوویی و بەڵگەنامە ئاشكراو نهێنییەكان، بیرت دەخەنەوە كوردەكان ئیعتیبارو ناسنامە نیمچە لێ دزراوەكەیان بۆخۆیان گەڕاندەوە، مێژوو بیرت دەخاتەوە، پێچەوانەی ئەوەی پیلانیان بۆ دارشتبوو، كوردەكان بوون یەكگرتووییان بۆ نێو پێكهاتە جیاكانی سەر خاكی سووریا گەڕاندەوە.
ئەگەر كورد بیت، ئەوا بۆ رووبەڕووبوونەوەی ریشن و كراس رەشەكان، پێویستە لە هێڵی پێشەوەی شەڕدا بیت، تا بەرگری لەو گەلانە بكەیت كە متمانەیان بە تفەنگ و بازوی تۆوە هەیەو بەتۆوە لەمانەوەی خۆیان دڵنیان، ئەگەر كورد بیت، ئەوا قەدەرت بە شەرەفەوە شەڕكردنە لەدژی ئەو گروپانەی شەرەفی خۆیان فرۆشتووە.
ئەگەر كورد بیت، ناچاری پارێزگاری لە دەستكەوتەكانت بكەیت، ئەگەرچی دەستكەوتەكانیشت تەنیا بۆ خۆت نییە، بەڵكو موڵكی هەمووانە بێ جیاكاری، ئەگەر كورد بیت بەرپرسیارێتی تۆیە ناوچە رزگاركراوەكان لە حەشارگەی ئەو كەروێشكە تیرۆریستانە پاك كەیتەوە كە ترسنۆكانە خۆیان تیا شاردۆتەوە.
ئەگەر كورد بیت ناچاری لە هەر كوێیەك بیت ئاڵای ئازادی بەرزبكەیتەوە، ناچاری قوتابخانە بكەیتەوە، پێش خۆت، نان و ئاو بۆ خەڵكانی دیكە لەگەڵ گەرما بۆ زستان و خەندە بۆ منداڵان دابین بكەیت.
ئەگەر كورد بیت، ئەوا لەلایەن ئەوانەی رایان كردو خۆیان خستە باوەشی سولتانی عوسمانی نوێ، خاك و نامووسی خۆیان فرۆشت و بوونە كۆیلەی سولتانی نوێ، رۆژانە رووبەڕووی لێشاوی رەخنە دەبیتەوە، ئەگەر تۆ كوردیت ئەوا لەسەرت پێویستە رزگاریان بكەیت و مێشكیان پاك كەیتەوە.
ئەگەر كوردیت، پێویستە گوێ بە پەلارو تۆمەتە بێ بنەماكانی رەگەزپەستەكان نەدەیت، هەموومان دەزانین بریندارت دەكات ، چونكە راستییەكان چەواشە دەكەن وێنە راستەقینە جوانەكەت دەشێوێنێ.
ئەگەر كوردیت، پێویستە لەگەڵ ئەوانەش دوێنی گوللەیان تێدەگرتیت و ئێستا دەستیان بەرزكردۆتەوە دەزانن تۆ ئازاریان نادەیت، لێبووردە بیت، هەرچەندە تۆ دەزانیت و ئێمەش دەزانین و هەر هەمووشیان دەزانن رەنگە ئەگەر بۆیان بڵوێت جارێ، دووان، سێ جاری دیكەش دووبارەی بكاتەوە. هێشتا رەوشتت رێگات پێ نادات، دەست بۆ تاڵەموویێكی پڕچیشیان بەریت.
ئەگەر كورد بوویت، كامێراو پێنووس بەدەستتەوە دەگریت و بەسەر كێڵگە بەمین چێنراو دیوارە ئاگرینەكان دەپەڕیتەوە، تا وێنەی راستی ئەوەی لە جیهان روودەدات بگوازیتەوە، وێنەكە وەك خۆی بێ دەستكاری و رتووش و جوانكاری بەجیهان بگەیەنیت.
- ئەگەر كوردیت. كەواتە جەنگاوەری
- ئەگەر كوردیت. تۆ باشترین سوارچاكی
- ئەگەر كوردیت. تۆ دانەیەكی بێگەردی مرۆڤایەتی
- زۆر جوانە ببیتە كورد. خۆزیا منیش كورد بوومایە
❊ توێژەرێكی لوبنانییە
و: خالید گـەردی
