خه‌بات: وریشە عومەر:-
ئاسودە غازی ناسراو بە كوردە خاتونە شاعیرێكی قەڵەم بەبڕشت و ئازاو چالاك و بوێر، لە دایكبووی 14.2.1999یەو لە شاری هەولێر نیشتەجێیە وەك خۆی گوتەنی لە تەمەنی نۆ 9 ساڵانەوە ئاشنای كاری هونەری بووە ، لەوانەش زیاتر شانۆ ، لە چەندین كارو چالاكی هونەری و رۆشنبیریی قوتابیاندا بەشداریكردووە ، ساڵانێكیشە دەخوێنێتەوەو شیعر دەنووسێ، لە ئێستاشدا چەند تێكستێكی شیعریی تەواوكراوی هەیەو زۆر لە شیعرەكانیشی لە رێگای رۆژنامەو فەیسبووكی خۆیەوە بڵاو دەكاتەوە، لە دوو كۆڕی تایبەتی شیعر خوێندنەوەشدا بەشداریكردووە.
كوردە لە دیمانەیەكدا بەو شێوەیە وەڵامی پرسیارەكانی رۆژنامەی خەبات ی دایەوە:
بۆ شیعرت هەڵبژارد؟
هەمیشە وا بیرم كردۆتەوە شیعر حاڵەتێكی نەفسی ئینسانە بەرامبەر بە دوونیاو هەستیاری شاعیرە بە ئینسانەكان ، من لە قۆناغێكدا كە دەركم بەوە كرد كە ئەوە شیعرە زۆر جار دوونیا جواندەكات و هەم شیعریشە دەتوانێت شۆڕشێكی گەورە بەرپاكات، ئیدی زیاترو زیاتر شیعرم دەخوێندەوە، زیاتر ئەو شیعرانەی كە وینیڤێر ساڵن و توانای هەمیشە خۆ تازەكردنەوەیان هەیە لە هەموو زەمەنێكدا، ئەو ئاشقبوونەم بە فەزای شیعر هێندە چاوو دەستی كردمەوە تا وەكو توانیم منیش ببمە نوقتەیەكی زۆر بچووك لە دوونیای شیعردا ،بەوە كۆتایی بەم وەڵامە دەهێنم ، ئەوە شاعیرانن لە هەستیاری خۆیاندا بە دوونیا، هەمیشە پەراوێز دەخرێن بۆ نموونە: بەختیار عەلی شاعیران دەنێرێت بۆ دۆزەخ و ئەفڵاتون لە كۆمارەكەیدا شاعیران دەردەكات.
لە زمانی شیعریتاندا وشەگەلێكی ناسك و چیرۆكئاسای ڕۆمانسی بەدیدەكرێت، ئاخۆ ئەمە زادەی خەیاڵی سحری خۆتانە، یان پەیوەستە بە ژیانی واقعیتانەوە؟
ئەمەوێت ئەوە بڵێم هەمیشە شاعیر پێیەكی لەناو واقیعدایەو پێكەی تری لەناو خەیاڵ، تێكستەكانی منیش هەروان ، كەواتە هەموو شاعیرێك لەناو واقیعی خۆیدا دەتوانێت متوربەی تێكستێك بكات.
شانۆ و شیعر لێكدوورن، چۆن لە شانۆوە دەستتكرد بە نووسینی شیعر؟
شانۆ بۆ من وەك كچێك خولیایەكی سەیرو زۆر سەیری هەیە بە سەرمەوە هەتائێستاش . من ئەم پرسیارە بەوە كۆتایی پێدێنم، هەمیشە سەرسام بووم بەو نەسانەی كە نووسراون و من خولیام بووە كە ببم بە كاراكتەری یەكێك لەو نەسانە بۆ نموونە مارگرێت لە دەقی دكتۆر فاوست یان دەقی نۆتێلای شكسپیر، وە شیعریش زادەی چێژێكە كە هەمیشە ویستومە هەم واقیعی خۆم وە هەم هەموو ئەوانەی كە لە ناخمدا شاردومەتەوە بە شیعر بیاننووسم ، شێرزاد حەسەن گوتەنی هەمیشە وابیرم كردۆتەوە ئەبێت ببم بە دەرگایەك بۆ ئەو كچانەی كە دەفتەری یادگاریەكانیان لە دەیان كون شاردۆتەوە لە ترسی هەموو ئەو داب و نەریتانەی وڵات.
ئیلهامی زۆرێك لە شاعیران خۆشەویستەكەیانە یان دایكە یان نیشتیمانە، ئیلهامی شیعری ئێوە چییە؟
من بە ڕوونی ئەوە نازانم شیعر سەرچاوەكەی چییە چونكە ئەوە هیچ شاعیرێك ئەوەی بۆ یەكلایی نەبۆتەوە، بەڵام بۆ خودی خۆم زۆرجار بابەتێك كە ڕوو ئەدات، بۆ من دەبێتە شیعرێك، زۆر جاریش با بەت خۆی بۆ خۆی دەبێتە شیعر بە لا شعوری خەیاڵەوە.
تا ئێستا چەند دەقی شیعریتان كراوەتە گۆرانی؟
تا ئێستا چوار تێكستم داوە بە چوار هونەرمەندی ئازیز كە قەرارە بەم نزیكانە كاری لەسەر بكەن.
وەكو كچە شاعیرێك لەمپەڕو كێشەكانت چین، یان چی نیگەرانی كردوویت؟
ئەو پرسیارە بۆ خانمان سەیرە، چونكە شەڕق بەعام كلتورو دەسەڵاتێكی ترسناكی پیاو سالاری بە سەریەوەیەتی ، من ئەوە دەڵێم پێتان: مردنی دووعاو بەرد بارانكردنی سوورەیا و كوژرانی زووهرە، بەسە بۆ ئەوەی منێك نیگەران بكات.
لە ڕووی كۆمەڵایەتییەوە شیعرەكانت كێشەیان بۆ دروست نەكردوویت؟
شیعرەكانی من كێشەی بۆ كەس دروست نەكردووەو وە هەرگیز دروستی ناكات چونكە هەموو شاعیرێك ژیاندۆستە چونكە واقیعی خۆم دەنووسمەوەو واقیعی ئینسانەكان، من تەنها ئەوە دەڵێم من كچم و لە شەرق دەژیم، ئەوەی كە كێشەیە ئینسانەكانن نەك شیعرەكانم.
دەڵێیت قەرزاری دڵمم بۆ؟ ئایا كە دڵ شكا بەچی ساڕێژ دەبێت؟
خۆی ئەشق حاڵەتێكی سەیرە بەڵام ئەوە دەڵێم: كە دڵ شكا دەبێت قەرزارباری ئەقڵ بین، ساڕێژ دەبێت چۆن لە قەسیدەی زمانی ئەشق و زەمەنی ئەنفالی ڕێبوار سیوەیلی كە دەڵێت: تێپەڕی و دەست پێبكەرەوە هێندە نابات هەموومان بیرەچێتەوە.
حەز دەكەیت پڕ بە گەرووی شیعرت چی بڵێیت و بە كێ بڵێیت؟
ئەگەر شیعر بەو جۆرەی كە تۆ دەڵێیت شاعیران بییانوتبایە ئەوە لەو كاتەی كە دەیانوت ئیتر شیعریش كۆتایی پێدەهات ، كەواتە مانەوەی ئینسان بەو كۆدە نەوتراوانەوەیە كە دەیباتە دونیایەكی تر لەگەڵ خۆیدا، من لە دڵی خۆمدا زۆر شتم وتووە پڕ بە دڵی خۆم.
چی ئاوێتەی شیعر دەكەیت بۆ ڕازاندنەوەی؟
خسوسیاتی شیعر سەرەتا بابەتەوە زمانەوە وێنەیە وە مۆسیقایە، منیش هەر ئەم سێ كەرەستەیە بەكار دێنم بۆ ڕازاندنەوەی شیعرەكانم.
