وەیسی سەعید وەیسی
دوای ئەوەی لە 16ی ئۆكتۆبەری 2017 بەبیانووی ئەنجامدانی ریفراندۆمی سەربەخۆیی كوردستان بەپێی پیلانێكی نەخشە بۆ كێشراو هێزە عیراقییەكان بەپاڵپشتی چەند كەسێكی لایەنێكی سیاسی هێرشیان كردەسەر هەرێمی كوردستان وهەوڵی لەناوبردنی قەوارەی سیاسی هەرێمی كوردستانیان دەدا كەلەدواییشدا رووداوەكان دەریان خست لەبەر ریفراندۆم خەڵكی كوردستان سزا نادرێت، بەڵكو تەنها ریفراندۆم كراوەتە بەهانەیەك كە مەبەستیان بوو ئەزموونی سیاسی هەرێمی كوردستان لەناوبەرن و پارتی دیموكراتی كوردستانیش لاواز بكەن، چونكە هەمیشە سەرۆك مسعود بارزانی و پارتی خاوەن پرۆژە و ستراتیژییەتی تایبەتن بۆ دامەزراندنی دەوڵەتی سەربەخۆی كوردستان و سازش لەسەر مافی رەوای خەڵكی كوردستان ناكەن، بۆیەش هەمیشە دەكرێنە ئامانج و جۆرەها پیلانیان دژ دەكرێت لەكاتێكدا ئەنجامدانی پرۆسەیەكی وەكو ریفراندۆم شتێكی ئاسایی و یاسایی بوو تەنانەت سەرەتاییترین مافی هەر هاووڵاتییەكە تا لەم رێگایەوە بریار بدات چۆن بژێت، بۆیەش ریفراندۆمی سەربەخۆیی لە هەرێمی كوردستان مافێكی ئایینی و یاسایی و سروشتی بوو كە 93% خەڵكی كوردستان بریاری خۆی دا و بەمەش دەركەوت كە ریفراندۆم سەركێشی و شكست نەبوو، بەڵكو خواست و ویست و ئیرادەی كوردستانیان بوو كە بۆهەتاهەتایە بووە دیكۆمێنتێكی نەتەوەیی بەڵام دوژمنان و خاك فرۆشان ئەمەشیان بەرەوا نەبینی، بۆیەش بەدەرفەتیان زانی تا هێرش بكەنە سەر هەرێمی كوردستان، سوپاس بۆ خوای گەورە ئەم پیلانەشیان سەرنەكەوت وەك هەمیشە پێشمەرگەكانی پارتی و بارزانی لەسەنگەری بەرگریدا مانەوە و بەهەمان ئیرادەی داعش بەزێن وەڵامێكی جەرگ بڕی داگیركەران و نۆكەرانیان دایەوە، لە یەكەمین داستانیشدا لە (پردێ) سنووریان بۆ خائین وخاك فرۆشان دانا و سەلماندیان ئیرادەی كوردستانیان پۆلاینە و هیچ كات گرەو لەسەر تێكشكاندنیان ناكرێت، بۆیەش داستانی (پردێ) جگە لەوەی بەشكۆمەندییەوە ناوی لە لاپەرەكانی پرلە سەروەری مێژووی گەلەكەماندا تۆمار كرا لە هەمان كاتیشدا بووە سەرەتایەك بۆ گۆرینی هاوكێشەی سیاسی، كە وای كرد ئیدی دوژمنان بیر لە داگیركردنی كوردستان نەكەنەوە، هەروەك (داستانی كۆرێ)بەبیری هاونیشتمانیانی هێنایەوە كە چۆن لە رۆژانی دەستپێكی راپەریندا هاوكێشەی سیاسی گۆری و رژێمی بەعسی ناچار كرد داوای وەستاندنی شەر بكات و دەستی بە گفتوكۆكردن لەگەڵ سەركردایەتی سیاسی بەرەی كوردستانی ئەوكات كرد، بەهەمان شێوەش داستانی (پردێ) قۆناغێكی نوێ بەرووی خەڵكی كوردستاندا كردەوە و پێشمەرگەش مێژوویێكی نوێی لەبەرگری وخۆنەچەماندن تۆماركرد، چونكە هەرەسی بەپیلانی لەناوبردنی قەوارەی سیاسی هەرێمی كوردستانی هێنا كە ئیتر رێگە بە خائین وخاك فرۆشان نادرێت.
لێرەوە نابێت ئەو بەراوردەشمان لەیاد بچێت كە داستانی (كۆرێ) پێشمەرگەی هەموو لایەنە سیاسییەكانی ئەوكاتی بەرەی كوردستانی بەشداربوون، بەڵام لە داستانی (پردێ) تەنها رۆڵە بەوەفاكانی پارتی و بارزانی بەشداربوون و رێگرییان لە دوژمنان كرد لەگەڵ ئەوەی پێشكەوتووترین چەك و تانكی سەربازییان بەكار هێنا، بەڵام نەبووە بەربەست لەبەردەم مقاوەمەتی پێشمەرگە كە دەبێ ئەو راستییەش بخرێتەروو گەر ئەو بەرگرییەی لە (پردێ)كرا تەنیا بۆ چەند كاتژمێرێكیش لە كەركووك و ناوچەكانی تر كرابا بەدڵنیاییەوە رەوشە دەگۆرا و دوژمن نەیدەتوانی بستێك خاكمان داگیر بكات، بەڵام خیانەت رێگای نەدا كە سەرئەنجام راستە ئەم ناوچانە داگیركران، بەڵام هیچ كاتێك خەڵكی كوردستان دەست بەرداریان نابێت و واز لە بستە خاكێكی خۆیان و خواستی رەوای خۆیان كە سەربەخۆییە ناهێنن. لە ساڵیادی ئەم داستانە كەموێنەیەدا كاتی هاتووە بیر لەوە بكرێتەوە داستانی (پردێ) و داستانەكانی تریش بخرێنە ناو پرۆگرامەكانی خوێندن تا نەوەی ئێستا و داهاتووش ئاشنا بن، چونكە ئەم داستانانە وەرچەرخانێكی گەورە و مێژوویی بوون لەخەباتی رەوای گەلەكەمان كە كوردستانی پاراست و بەرگری لەكەرامەتی خەڵكی كوردستان كرد و پیلانی ناحەزان و خائینانی هەڵوەشاندەوە كە تەنها بەمەش راستییەكان هەمیشە بەزیندوویی لەناوماندا دەمێننەوە كە دەرئەنجامی خاك فرۆشتن چی بوو؟!. چ قازانجێكیان كرد؟!، چونكە جگە لە داگیركردنی ناوچە كوردستانییەكانی دەرەوەی ئیدارەی هەرێمی كوردستان و تەعریب كردن و لابردنی سیمای كوردانە و ئاوارەبوونی هەزاران كەس هیچی تری بەدوادا نەهات كە تەنها ئەنجامدەرانی خیانەتەكەی 16ی ئۆكتۆبەر لێی بەرپرسن كە بەدڵنیاییەوە مێژوو لە لاپەرەیەكی رەش ناوی تۆمار كردوونە كە هیچ كات مێژووش رەحمی بەكەس نەكردووە و ناكات.
سڵاو لەقارەمانی داستانەكانی (پردێ – سحێلا- محموودییە و تلسقۆف)كە پیلانی نەیارەكانیان تێكشكاند.
