لە گفتوگۆیەكیدا لەگەڵ بەشی كوردی دەنگی ئەمەریكا، كاكەمین نەجاڕ ئەندامی مەكتەبی سیاسیی پارتی دیموكراتی كوردستان جەخت دەكاتەوە كە پارتی پابەندە بە رێككەوتن لەگەڵ یەكێتی، سەبارەت بە پۆستی پارێزگاری كەركووك، هەروەها باس لە پێدانی دەسەڵات بە قوباد تاڵەبانی وەك جێگری سەرۆكی حكوومەت دەكات بەپێی یاسا.
لەگەڵ یەكێتی هیچ كێشەمان نییە
لە سەرەتای گفتوگۆكەیدا كاكەمین نەجاڕ لەبارەی هۆكاری دەستبەكارنەبوونی كاندیدی كوردەكان لە پۆستی پارێزگاری كەركووك، دەڵێت: ئێمە لەگەڵ یەكێتیی نیشتمانیی كوردستان رێككەوتین لەسەر كاندیدێك بۆ پارێزگاری كەركووك، بەڵام وەك دەزانرێت پارێزگار دەبێت لە ئەنجوومەنی پارێزگا دەنگی لەسەر بدرێت، ئەنجوومەنیش بە تەنیا كوردی تێدا نییە، بەڵكوو توركمان و عەرەبی تێدایە، دەبێت هەماهەنگی هەبێت لەو ڕووەوە، دەبێت ئەنجوومەنی پارێزگا دەنگی لەسەر بدات و بەغدایش پەسەندی بكات، ئێمە لەگەڵ یەكێتی هیچ كێشەمان نییە و ڕێككەوتووین بەڵام ماوەتەوە سەر ئەنجوومەن كە دەنگی لەسەر بدات و بەغدا پەسەندی بكات، ئەگەرنا كێشە نەماوە لە دانانی پارێزگارەكە.
پابەندی رێككەوتنین لەگەڵ یەكێتی
كاكەمین نەجاڕ دەڵێت: ئەگەر بڕواننە مێژوو، پارتی هەمیشە پابەندی هەموو ئەو ڕێككەوتنانە بووە كە لەگەڵ لایەنەكان كردوویەتی و ئێستاش پابەندی ئەو ڕێككەوتنەیە كە لەگەڵ یەكێتی كردوویەتی، بەڵام ئەوەی ماوەتەوە تەنیا ئیشە ئیدارییەكەیە كە لای ئەنجوومەنی پارێزگایە دەستبكات بە گفتوگۆكردن لەگەڵ لایەنەكان بۆ رێككەوتن، ئەگەرنا ئێمە وەك پارتی دیموكراتی كوردستان هیچ پەشیمان نەبووینەتەوە و بەردەوامین لە رێككەوتنەكان.
سەبارەت بە دەسەڵاتەكانی قوباد تاڵەبانی وەك جێگری سەرۆكی حكوومەت، بەپێی ئەو یاسایەی كە لە ئەنجوومەنی وەزیران هەیە، كاكەمین نەجاڕ گوتی: هیچ ڕێگریەك لە كاك قوباد و وەزیرەكان نەكراوە، بەڵام وەك دەزانرێت حكوومەت یاسا و ڕێسای خۆی هەیە بۆ كاركردن، دەسەڵاتی سەرۆكی ئەنجوومەنی وەزیران جیاوازە و دەسەڵاتی جێگرەكەشی جیاوازە، ئەو دەسەڵاتانەی كە بەپێی یاسا كاك قوباد وەك جێگری سەرۆكی حكوومەت هەیەتی، هیچ ڕێگریەك نییە بۆ ئەنجامدانی دەسەڵاتەكانی خۆی بەپێچەوانەوە هاوكاری تەواویشی دەكەین، بەڵام بەپێی ئەو یاسایەی كە لە ئەنجوومەنی وەزیران هەیە، دەسەڵاتەكان دیاریكراون، ئەوەی لە یاسا بەدەر بێت، ئەوە شتێكی ترە، ئەوەی یاسایی بێت پارتی پابەندە بە هەموو دەسەڵاتەكانی كاك قوبادەوە.
كاكەمین نەجار ئەوەشی ڕوونكردەوە وەك دەزانرێت حكوومەتی هەرێم حكوومەتی ئیئتلافییە، سەرۆكی ئەنجوومەنی وەزیران، سەرۆكی ئەنجوومەنی وەزیرانە لە زاخۆ تا خانەقین و جێگرەكەشی بە هەمان شێوە، وەزیرەكانیش بە هەمان شێوە ئازادن لە مومارەسەكردنی دەسەڵاتەكانی خۆیان، بەڵام ڕێنمایی ئەنجوومەنی وەزیران هەیە كە پێویستە هەموو لایەك پابەند بن پێوەی. ئەوەشی گوتووە: خۆ هەر ئێمە و یەكێتی لەو حكوومەتەدا بەشدارنین ، گۆڕان و پێكهاتەكانی تریش بەشدارن، حكوومەت یاسا و ڕێسای خۆی هەیە، سەرۆكی حكوومەت دەبێت دەسەڵاتی لە هەموو سنووری كوردستاندا هەبێت و جێگرەكەشی هەروا، ئێمە بەوە ڕازی نابین سەرۆكی حكوومەت بەس لە دهۆك و هەولێر دەسەڵاتی هەبێت و جێگری سەرۆكی حكوومەتیش بە تەنها لە سلێمانی و هەڵەبجە دەسەڵاتی هەبێت، كوردستان یەك حكوومەت و یەك كابینە و یەك پەرلەمانی هەیە، هەموومان پێكەوە كار دەكەین وە دەسەڵاتەكانیش بەپێی یاسا دابەشكراون بۆ سەرۆكی حكوومەت و جێگر و وەزیرەكانیش.
كاكەمین نەجاڕ لە كۆتایی قسەكانیدا گوتیشی ئەگەر قوباد تاڵەبانی نیگەران بێت، ئەوا ئێمە دانیشتن لەگەڵ مەكتەبی سیاسیی یەكێتی دەكەین تا بزانین لە كوێ خەلەل هەیە چارەسەری دەكەین، هیچ خەلەلێك ناهێڵینەوە بەبێ چارەسەركردن و ئێمە و یەكێتیش لەو حكوومەتە تەواوكەری یەكترین پێكەوە حكوومەت بەڕێوە دەبەین، لەگەڵ گۆڕان و لایەنەكانی تر ئەوانەی بەشدارن لە حكوومەت، هیچ نیگەرانییەك نابێت.
