سوورە مەرگەیی
وا راهاتووم و وا فێركراوم لە هەڵوێستی دوژمنكارانەی داگیركارانی كوردستانەوە بۆ ویستگە گرنگەكانی مێژووی بزاڤی رزگاریخوازیی كورد و وەرچەرخانە سیاسییەكانی بڕوانم، ئەوە یاسایەكی چەسپاوە كە هەر رووداوێك دوژمنانی تەنگاو كردبن، ئەوا ئەو رووداوە لە بەرژەوەندیی كورد و خەباتە رەواكەی بووە، هەر هەڵوێستێكیش لەسەر مێزی پیلانگێڕی كۆی كردبنەوە، ئەوا ئەو هەڵوێستە كوردانە و شۆڕشگێڕانە بووە و دژی سیاسەتی داگیرخوازیی ئەوان بووە، جا ئەگەر بۆ سەلماندی ئەو راستییە دوو نموونە وەربگرین هەموو گومانەكانی سەر ئەو یاسایە دەڕەونەوە.
شۆڕشی ئەیلول وەك یەكێك لە گرنگترین وێستگەكانی مێژووی بزاڤی رزگاریخوازیی كورد، بە گۆڕینی ئامانجە سیاسییەكانی كورد لە ئامانجی پرش و بڵاوی ناوچەگەراییەوە بۆ ئامانجی نەتەوەیی، توانی شۆڕش بە كوردستانی بكات، بە كوردستانی كردنی شۆڕش و بە ستراتیجی كردنی ئامانجە نەتەوەییەكان بەلای دوژمنان و داگیركارانی كوردستانەوە قبووڵكراو نەبوو، بۆیە بەردەوام لەژێر چاودێری دوژمناندا بوو، بەڵام لەگەڵ ئەوەشدا زۆر دەستكەوتی بۆ كورد بەدەست هێنا، یەكێك لەو دەستكەوتانە رێككەوتنی 11ی ئازاری ساڵی 1970 بوو كە تا ئێستاش كورد و شۆڕشگێڕان شانازی پێوە دەكەن.
25ی ئەیلولیش وەك گەڕانەوە بۆ دەنگ و بڕیاری خەڵكی كوردستان، گەورەترین وەرچەرخان بوو لە میژووی دوور و نزیكی خەباتی رزگاریخوازی خەڵكی كوردستاندا، كورد لەو وەرچەرخانەدا هێڵە سوورەكانی حزبی بەزاندن و یەكدەنگ و یەكرەنگ و یەك ئیرادە لە دەوری پرسی سەربەخۆیی و ئامانجە نەتەوەیی و نیشتمانییەكان كۆبوونەوە، ئەوەش نەك هەر رژێمە شیعەگەراكەی عێراقی تەنگاو كرد، بەڵكو رژێمەكانی ئێران و توركیا و بەكرێگیراو و نۆكەرەكانیشیانی هێنایە سەرخەت، راستە داگیركارانی كوردستان بەو پلانگێڕییە فرە جەمسەرە توانییان پرسی سەربەخۆیی دوا بخەن، بەڵام نەیانتوانی پێش بە ئیرادەی سەربەخۆخوازان بگرن.
كورد دەبێ لە 11ی ئەیلول و 25ی ئەیلولەوە خوێندنەوە بۆ رووداو و پێشهاتەكان بكات، لە ئەگەری روودانی هەر رووداوێك ئەگەر داگیركارانی تورك و فارس و عەرەب بە هەندیان وەرنەگرت و لێی بێدەنگ بوون، ئەوا ئەو رووداوە لە زەرەری كوردە و كورد دەبێ دژی ئەو رووداوە بوەستێتەوە، بە پێچەوانەوە ئەگەر رووداوێك یان هەڵوێستێك ئەو داگیركارانەی تەنگاو كرد، دەبێ كورد چارەنووسی خۆی بەو رووداو و هەڵوێستەوە گرێ بدا و لە پێناویدا قوربانی بدات.
