ئەمڕۆ شەممە 21/09/2019، بەبۆنەی دەستپێکردنی ساڵی نوێی خوێندن، مەسروور بارزانی، سەرۆکی حکوومەتی هەرێمی کوردستان، لە شاری دهۆک زەنگی ساڵی نوێی خوێندنی لێدا و وتارێکی پێشکەش کرد.
مامۆستایێن ھێژا
قوتابیێن خۆشتەڤی
سپێدە باش
ئەز خۆشحاڵم کو ئەڤڕۆ لڤێرە زەنگا دەسپێکرنا ساڵا نوی یا خواندنێ 2019-2020 ، لێ ددەم و دەستپێکرنا ئەڤ ساڵە یا خواندنێ رادگەهینم. بڤێ هەلکەفتێ پیرۆزباهییا هەوە دکەم و هیڤییا سەرکەفتنێ بو وە دخوازم.
بێگومان وەبەرهێنانا د بوارێ خواندن و شیانێن مرۆڤی وبلندکرنا ئاستێ خواندن و زانستێ و دابینکرنا پێدڤیێن خواندنا هەڤچەرخ، هەروەسا رۆڵێ ئەرێنی یێ خێزانێ و دایک وبابان ل پێگەهاندنا زارۆکان، ئەگەرێن گەلەک گرنگ و سەرەکینە ژبۆ پێش ئێخستنا بوارێ پەروەدێ و فێرکرنێ و ب دەستڤەئینانا پاشەرۆژەکا گەش بۆ نڤشێن مە.
ئێک ژ ئەرکێن گرنگ و ژ کارێن بەراهیێ یێن کابینەیا نەهێ یا حکومەتا هەرێما کوردستانێ ژی، گرنگیدانە ب پەروەردێ وخواندن و بلندکرنا ئاستێ قوتابخانانێن مە ب تایبەتی قوتابخانێن حکومی. هەروەسا دێ هەوڵ دەین پێدڤیێن خواندنەکا هەڤچەرخ بەردەست بکەین. وەکو دروستکرنا قوتابخانەیێن نوی، چونکی لگۆڕ دویڤچوونا لایەنێن پەیوەندیدار، هەرێما کوردستانێ پێدڤی ب 35000 پۆلێن دی هەیە داکو ژ ئاریشەیا چەند دەوامیێ رزگار ببیت و قوتابیێن مە یێن خۆشتەڤی، د قوتابخانەیێن هەژیدا ب خوینن.
لڤێرە، ب پێدڤی دزانم داخازێ ژ سەرمایەدار و بەرهەمهێنەرێن ناڤخۆ یێن هەرێما کوردسانێ بکەم کو رۆڵا خۆ یا نیشتیمانپەروەری بگێڕن و د ڤێ هەڵمەتا گرنگا ئاڤاکرنا قوتابخانە یێن نوی دا پشکدار ببن.
وەکو هوین دزانن هەرێما کوردستانێ ل ساڵین بۆری دا روی ب روی شەڕێ تیرۆرستێن داعشێ و رەوشەکا دژوار یا ئابووری بوو. بەلێ ب خۆشبەختی ڤە سەرباری وێ رەوشا بەرتەنگ ژی، پرۆسەیا خواندنێ هەر یا بەردەوام بوو. لەوڕا لڤێرە، پێدڤی دزانم سوپاسیەکا گەرما ماموستایێن برێز بکەم ژبۆ خۆڕاگری و قوربانیدانا وان کو نەهێلا کاروانێ خواندنێ رابوەستیت.
حکومەتا هەرێما کوردستانێ ژی، هەموو هەوڵان دێ بکار ئینیت بۆ باشترکرنا ژیان و ژیارا ماموستایان و پەیداکرنا دەلیڤێن هەیی و گونجایی بۆ پێشڤەبرنا کەرتێ پەروەردێ و خواندنێ کو ئارمانجا وان دروستکرنا نڤشەکێ داهێنەر بیت لسەر بنەمایێ خۆشڤیان و خزمەتکرنا وەڵاتی.
جارەکا دی، پیرۆزباهییا دەستپێکرنا ساڵا نوی یا خواندنێ ل هەوە دکەم وهیڤییا سەرکەفتنێ بۆ هەوە دخازم.
