رێبوار حەمەلاو شوانی
هەشتەمین كابینەی حكومەتی كوردستان ،لە رۆژگارێكدا هاتە مەیدانی خەباتەوە، كە ناوچەكە بە گشتی و عێراق بە تایبەتی كەوتنە بارێكی نائاسایی،شەڕ وقەیرانی دارایی كە راستەوخۆ ئاڕاستەكان كاریگەرییان لە سەر رەوشی هەرێمی كوردستان دانا، بە دڵنییاییەوە ئەگەر حیكمەتی سەركردایەتیی سەرۆك بارزانیی، سەرۆكایەتی حكومەتی كوردستان، ئەنجوومەنی ئاسایش بە گشتی، قارەمانی و خۆڕاگری هێزی پێشمەرگەی كوردستان و فەرمانبەران و تەواوی گەلی كوردستان نەبووایە، ئەستەم بوو كوردستان بگاتە كەناری ئارامی و بەتایبەتی دوای ریفراندۆم و پیلانگێری 16ی ئۆكتۆبەر و هەڵبژاردنەكانی 2018 ی پەرلەمانی عێراق ـ كوردستان، نۆهەمین كابینە لە دایكبوو، ئەمەش واتای ئەوەیە، كە ئەم حكوومەتە ئەركی زیاتری لەئەستۆدایە. ئەو لە دەروازەی پتەوكردنی ئەنجامی ریفراندۆمدایە، بۆ نموونە: بەدیهێنانی مەرجی هاوبەش لەنێوان خۆی و حكوومەتی ناوەند، هەروەها گواستنەوەی وڵات لە حاڵەتی نادەستوورییەوە بۆ حاڵەتی پیادەكردنی بەندەكانی دەستوور، ئەمەش نەك بۆ رەوشی كوردستان بە ئەرێنی رەنگدانەوەی دەبێت، بەڵكو بۆ سەرجەم پارێزگاكانی عێراقیش. لەگەڵ دامەزراندنی، دەمودەست سەرۆكەكەی هەر لەدوای سوێندخواردن، دەستبەكار بوو، پلانی ستراتیژیی حكوومەتیشی روون كردەوە، پاشان هەشت بنەمایەكە بەدەر كەوتن، ئەمەش وای لە خەڵك كرد گەشبین بن، پتر پەیوەست بەوەش بوون كە دەرفەتی بەدیهێنانی هاوسەنگی لەنێوان مافی حكوومەت و مافی خەڵك لەكیس خۆیان نەدەن. دوای دەستبەكاربوونی كابینەی نوێەمی حكومەتی كوردستان بە سەرۆكایەتی مەسروور بارزانیی ، قۆناغێكی نوێ لە هەرێمی كوردستان دەست پێ دەكات و ئیدی هەناگاوەكان بە ئاراستەی ئاسۆیەكی گەشتر دەچێتە واری جێبەجێكردنەوە. چونكە لە ماوەی رابردوو، هەرێمی كوردستان بە كۆمەڵێك قەیران و بەربەستی یەك لە دوای یەك گوزەری كرد و مخابن كەسانێكی زۆر كەشوهەوای نالەباریان قۆستەوە و خۆویستانە زیانی زۆریان بە موڵك و ماڵی خەڵكی كوردستان گەیاند. هەروەها بە هۆی ئەو بارودۆخە نەخوازراوەوە ، كابینەی هەشتەمی حكومەتی كوردستان نەیتوانیی پلان و بەرنامەكانی ئاوەدانی و گەشەسەندن جێبەجێ بكات . سیاسەت و ستراتیژی بۆ سەركەوتنی پرۆسەی حوكمڕانی دوور لە گەندەڵیی سیاسی لە هەموو دەوڵەتێكدا سەرچاوەی سەرەكییە بۆ ناسەقامگیریی سیاسیی، لەناو ژینگەی ناسەقامگیری سیاسیشدا، توانای كاری پێكەوەی وەك یەك تیم دابەش دەبێت و دژایەتی و ئاستەنگ دروستكردن لە پرۆسەی جێبەجێكردنی بەرنامەكانی حكومەتدا بەدەر دەكەوێت، بەڵام بەپێچەوانەوە لە پرۆسەیەكی سیاسیی سەقامگیریدا، توانا جیاوازەكان لە دەوری یەك ئیرادە كۆدەبنەوە، كە ئەویش ویستی فەرمانڕەواییە، لەم حاڵەتەدا كێشە و ئاستەنگەكان چەند زۆر و قورسیش بن، بەڵام لەە بەردەم ئەو ویستە خۆی ناگرێت كە دڵسۆزی بۆ پیادەكردنی حوكمڕانییەكی باش هەموو لایەنە جیاوازەكان پێكەوە كۆدەكاتەوە. مەسرور بارزانی سەرۆك وەزیرانی كوردستان لەسەر بنەمای ئەو ژینگە سیاسییە تازەیەی لە كوردستان هاتۆتەئاراوە لە وتارەكەیدا كە رۆژی 18ی تەمموزی 2019 لە واشنتۆن پۆست بڵاوكراوەتەوە، زۆر بە ئومێدەوە هەنگاو هەڵگرتنەكانی حكومەت بۆ جێبەجێكردنی بەرنامەی كابینەكەی ئاماژە پێ كردووەو، پشتئەستوریی خۆی لە سەركەوتنی لە شەڕی دژی گەندەڵی راگەیاندووە، ئەم پەیامە ئەوەمان پێ دەڵێت كە سەرۆك وەزیرانی كوردستان كۆی بەرنامەی حكومەتەكەی وەك یەك پاكێج سەیردەكات و هەوڵی هەمەلایەنە دەخاتەگەڕ تاوەكو هەموو سێكتەرەكان پێكەوە رێكبخاتەوە، ئەم پێكەوە گرێدانەوەیە كە لە رووی تیۆرییەوە لەوانەیە هەندێك بە قورس ئاڵۆز سەیر بكرێت، بەڵام ئەگەر كابینەی حكومەت هەموو پێكەوە وەك یەك تیم بۆ جێبەجێكردنی بەرنامەی حكومەت كاربكەن، ئەوا ئەو هەماهەنگی و هاوكارییەی لەنێوان سێكتەرە جیاوازەكان دروست دەبێت، خۆی لە خۆیدا دەبێتە فاكتەرێك بۆ سەركەوتنی كۆی بەرنامەكە وەك پاكێجێك لە هەموو بوارە جیاوازەكاندا.ئەو سەركەوتنە گەورەیەی پارتی لەسەر ئاستی هەڵبژاردنەكانی پەرلەمانی عێراق لە ئایاری 2018? بووە هاندەرێكی دیكە بۆ سەرۆك مسعود بارزانی بەرنامە بۆ كوردستانێكی بەهێز و قۆناغێكی تازەی حوكمڕانی لە كوردستاندا دابڕێژێت، هەر لەسەر ئەم نەخشە رێگەی سەرۆك بارزانی، پارتی دیموكراتی كوردستان لە هەڵبژاردنەكانی 30ی ئەیلوولی 2018 بەشداری كردو، لەكۆی 100 كورسیی پەرلەمان، 45 كورسی بەدەستهێنا. بەمەش ئەو بەرنامەیەی بارزانی بۆ بونیادنانی كوردستانێكی بەهێز دایڕشتبوو، لە میانەی سندوقەكانی دەنگدانەوە بووە ئەمری واقیع و بنەمای وتووێژەكانی كابینەی تازەی حكومەتی هەرێمی كوردستان دەستی پێكرد و هەر لەسەر ئەم بنەمایەش كابینەی نۆیەم دامەزرا و متمانەی پەرلەمانی كوردستانی وەرگرت، لەو ماوە كورتەشدا كابینەی نۆیەم دەست بەكاربووە، هەوڵەكانی بەو ئاراستەیە دەركەوتوون كە ئەولەوییەتی كارەكانی بە شەڕی دژی گەندەڵی و بەهێزكردنی كەرتی تایبەت دەست پێدەكات هەموو ئەو هەنگاوانە پشتیوانی خەڵكی كوردستان و گشت هێز ولایەنە سیاسییەكان دەخوازێ چ ئەوانەی لە پرۆسەی حكومڕانی بەشدارن یانیش وەك ئۆپۆزسیۆن چاودێرن ، ئەو هەوڵانەش وا دەكات ئاڕاستەی بەرنامە وكارەكانی حكومەتی كوردستان زیاتر پێشكەوتن و سەركەوتنی زیاتر بە خۆیەوە ببینێ. مەسروور بارزانی كەسایەتییەكی كاریگەر و بەتوانایە و ئەزموونێكی باشی سیاسی و ئیداری و ئەمنیی هەیە لە ئەركەكانی ڕابردوویدا سەركەوتوو بووە و لە كاركردندا كەسایەتیەكی جددییە. پاشان لایەنە براوەكانی هەڵبژاردن كە بەشداری لەكابینەكەدا دەكەن پێشتر لەسەر بەرنامەی كاری حكوومەت ڕێك كەوتوون، ئەمەش زۆر گرنگە، لەوانیش گرنگتر، ڕێككەوتنی سیاسی لە نێوان لایەنەكانی بەشداربووی حكوومەتدا واژۆ كراوە، كە پێكەوە كار بۆ سەرخستنی كارنامەكەی حكوومەت بكەن و دروشمی كابینەكەش بەهێزكردنی پێگەی حكوومەتی هەرێمی كوردستانە بە واتای حكوومەتێكی بەهێز و دامەزراوەیی و خزمەتگوزار.
