خه‌بات: سەید فاتیح بەرزنجی – هه‌ولێر:-
هەر كەوەرزی هاوین داهات و دەرگای خوێندن داخرا رۆژانە ژمارەیەكی زۆری هاووڵاتیان بەمەبەستی دەرهێنانی كارتی نیشتیمانی روو لە بەڕێوەبەرایەتی رەگەزنامەی هەولێر دەكەن و لەوێدا لەلایەن ئەفسەران و كارمەندانەوە كارەكانیان بۆ راییدەكرێت. ئەوەی كە لەوێدا بەرچاوم كەوت خێرایی بوو لەكارەكان و جەنجاڵی هاووڵاتیانیش تا رادەیەك هەبوو، لەو راپورتەدا ئیش و كارەكانی ئەو بەڕێوەبەرایەتییە دەخەینە روو.
هاووڵاتیان: ئەگەر نووسینگەی دیكەی كارتی نیشتیمانی هەبێت ئەوا جەنجاڵی هاووڵاتیان دروست نابێت.
هاووڵاتی “تەحسین محەمەد”: لەو بەڕێوەبەرایەتییەدا، وێڕای هەبوونی جەنجاڵی هاووڵاتیان ئەفسەران و كارمەندان كاروباری خەڵكی بەڕێك و پێكی كارەكان رایی دەكەن.
”مام ساڵح” هاووڵاتیەكی تەمەن 63 ساڵان بوو گوتی: كارەكان بەخێرایی ئەنجامدەدرێن، خۆزگە هەوڵدەدرا بۆ كردنەوەی نووسینگەی دیكەی كارتی نیشتیمانی، تا كارەكان زووتر تەواو دەبوون.
”كەریم عەلی” هاووڵاتیەكی دیكەبوو گوتی: لەدەوروبەری هەولێر هەق وایە چەندین نووسینگەی كارتی نیشتیمانی بكرابووایەوە، تا بەئاسانی هەموو كەسێك كارتی نیشتیمانی دەردەهێنا، چونكە جەنجاڵییەكی زۆر هەیە و ئیشوكارەكان زۆر بەسستی بەڕێوەدەچن.
“خاتوو نوخشە” گوتی: لەترسی جەنجاڵی نەمدەوێرا بێم بۆ دەرهێنانی كارتی نیشتیمانی، هەرچەندە لەوەرزی هاویندا جەنجاڵی هەیە، بەڵام كارەكان بەخێرایی راییدەكرێن.
دەرهێنانی كارتی نیشتیمانی رۆژانە بەردەوامە
دەربارەی ئیش و كارەكانیان و گلەیی و گازاندەی هاووڵاتیان سەردانیمان كردن، لەوێدا عەمیدی پۆلیس “عەبدولڕەحمان ئیسماعیل گەردی” بەڕێوەبەری رەگەزنامەو باری شارستانی هەولێر لە راپۆرتكێدا بۆ خەبات روونیكردەوە: لەرۆژی 28/3ی ساڵی2016 یەكەمین فەرمانگەی كارتی نیشتیمانی لە هەولێر كردایەوە، ئێمە خەریكی دەرهێنانی كارتی نیشتیمانین، لە 25%ی هاووڵاتیان توانیویانە كارتی نیشتیمانی دەربهێنن، دەرهێنانی كارتی نیشتیمانی و ئەو كارتە لە جیاتی چەند بەڵگە نامەیەكی وەكو ناسنامەی باری شارستانی و رەگەزنامە و لەداهاتووشدا كارتی زانیاریش دەگرێتەوە، لە عێراق، هاووڵاتیان چوار بەڵگەنامەیان هەبوو، وەك ناسنامە و رەگەزنامە و پاسەپۆرت و كارتی زانیاری لەداهاتوودا ئەو چوار بەڵگەنامەیە دەبێتە دوو بەڵگەنامەی وەك كارتی نیشتیمانی و پاسەپۆرت، دیارە ئەو كارتە بۆ دە ساڵە و سیستەمێكی پێشكەوتووە و بە ئاسانی هەڵدەگیرێت.
لەهەوڵداین بۆ كردنەوەی چەندین نووسینگەی دیكەی كارتی نیشتیمانی و لەگەڵ حكوومەتی عێراق هاوكاری و هەماهەنگی تەواومان هەیە بۆ كارەكان و چارەسەركردنی كێشە و گرفتەكان، پێویستە بەغدا نیاز پاكی لەگەڵ ئێمە بنوێنێ، تا كارەكان بە رێك و پێكی بەڕێوەبچێت و گفتوگۆی تێر و تەسەل لەگەڵ بەغدا ئەنجامدەدەین، و پڕۆسەكە رۆژانە درێژەی هەیەو لەبەغدا بەگرنگیەوە سەیری كارەكانی كارتی نیشتیمانی دەكرێت، ئەوەتا لە بەغدا لەكۆی 355 فەرمانگە 240 فەرمانگەی كارتی نیشتیمانی كراوەتەوە، تا ئێستا 12 ملیۆن كەس تۆماری كارتی نیشتیمانی كردووە و نزیكەی 11 ملیۆن كەس كارتەكەیان وەرگرتۆتەوە، لەشاری هەولێر 25% ی هاووڵاتیان كارتی نیشتیمانیان دەرهێناوە، رۆژانە نزیكەی دوو هەزار كەس سەردانیمان دەكەن و18 فەرمانگەی كارتی نیشتیمانی هەیەو هەوڵدەدەین رۆتین لەو دەزگایە نەهێڵین، تا خەڵك هەراسان نەبێت.
دەبێ هاووڵاتیان ئەوە بزانن كە ئەو پڕۆسەیە بریتییە لە حكوومەتی ئەلیكترۆنی و دەوام لە كاتژمێر 8ی بەیانی تا كاتژمێر 3یە، پاش نیوەڕۆیە و دەوامەكەی دیكەیش لە كاتژمێر دوو تا شەش وەرگرتنەوەی كارتەكەیە، هاووڵاتیان داتوانن لەو كاتەدا كارتەكانیان وەربگرنەوە. حەزناكەین هەرگیز سەرە هەبێت بۆ كارەكانی كارتی نیشتیمانی، زۆرترین سەرە 10-14 رۆژە و جەنجاڵی هاووڵاتیان بەو شێوەیە نییە و لەپیرمام و قوشتەپە لۆدێكی زۆرمان لەو شوێنانەدا هەیە و فەرمانبەریان كەمە و كارەكانیان بەشێوەی سەرەیە، ئەگەر هاتوو لەهەولێریش لۆدێكی زۆرمان لەسەر هەبوو، ئەوا لەو كاتەدا دەیكەین بەسەرە،
لە هەوڵداین كەچوار فەرمانگەی دیكە لە مێرگەسۆر و بارزان و مەخمور و بەحركە بكەینەوە، تا لەو شوێنە دوورانەوە هاووڵاتیانی ئەو شوێنانەش ببنە خاوەنی كارتی نیشتیمانی خۆیان.
