بێستون مەسعود ساڵەیی
ڕۆژانە گوێ بیستی دەیان حاڵەتی ناشرین و نەشیاو دەبین كە زەرەرمەندن بۆ كۆمەڵگا، میدیای چەواشەكار یەكێكە لەو حاڵەتانە كە ئەمڕۆ چەوشەكاری لەم هەرێمەی ئێمەدا بووەتە دیاردە و لە هیچ وڵاتێكدا ئاسایی نییە میدیای لۆكاڵی ببێتە ئامرازێك بۆ چەواشەكاری و بەلاڕێدابردنی ڕاستیەكان وخۆڵ كردنە چاوی خەڵك و بڵاو كردنەوەی ترس و دڵەڕاوكێ لە ناو كۆمەڵگا.
بەشێك لە میدیای كوردی كارو پیشەیان بووەتە لێدان لە هەر هەوڵێكی حكومەتی هەرێم و ناشرینكردنی وێنەی كوردستان و دامودەزگاكانی هەرێمی كوردستان. ئەوان لەژێر ناوی ئازادی و گەیاندنی بیرو ڕا قەڵەمەكانیان بە ناشرینترین وشە و پەیام دەخەنە كار و سوود لەو ئازادییە ڕۆژنامەگەرییەی دەبینن كە یاساكانی هەرێم بۆی فەراهەم كردوون هەمیشە دەیانەوێت كاریگەری خەراپ دروست بكەنە سەر دەروونی تاكی كورد، هەرگیز قەڵەمەكانیان بۆ كارە جوان و باشەكانی هەرێم بە كارناهێنن و نایانەوێت ڕاستیەكان لە قەڵەمەكانیانەوە نیشان بدرێت.
لە ژێر سێبەری ئەو دیموكراسی و ئازادی بیروڕایەی كە هەیە قەڵەمەكانیان هەمیشە پاڵپشتن بۆ هەر هەوڵێك كە دژ بە كوردستان و حكومەتەكەی بێت، هەمیشە لە هەوڵی شێواندنی ڕاستیەكان و دروستكردنی سیناریۆی سەیرو سەمەرەن.
بەڕەڵایی لە كاری میدیاییدا كارەسات و سەرئێشە بۆ دەوڵەت و كۆمەڵگاش دروست دەكات، میدیا چەواشەكارەكانی كوردی گەیشتوونەتە ئەو ئاستەی وەكوو زمانحاڵی دوژمنێك بابەت دەوروژێنن و یاری بە هەستی كۆمەڵگا دەكەن.
لە دیموكراسیترین وڵاتدا گەر دەزگایەكی میدیایی ڕاستەوخۆ و بێ سانسۆر و بە زمانێكی پاراو هێرش بكاتە سەر بەرژەوەندی و سەروەری و دامودەزگاكانی حكومەت ، بێ یەك و دوو یاسا دێتە وەڵام و ڕێگە بە بێڕێزی كردن و شكاندنی شكۆ و سەروەرییەكان لە لایەن ڕاگەیاندنە چەواشەكارەكانەوە نادات و لێپێچینەوەو سزایان بەسەردا دەسەپێنن، واتە ئاسایشی نیشتیمانی لای هەر دەوڵەتێكی دیموكراسی و نادیموكراسی هێڵی سوورە و هیچ كەسێك و تاخم و لایەنێك بۆی نییە بیبەزێنێت. ئەوەی لە بەشێك لە میدیا كوردیەكان دەگوزەرێ بە بێ پاڵپشتی مەعنەوی و ماددیەكی بەهێز نایەتە كایەوە، دەستێك یاخود چەند دەستێكی بەهێز لەپشت ئەم دەزگا میدیاییانەوە هەیە، لە ڕووی تەكنیك و ئیدارەدان و تێچووی ماددی و ئاراستەكردنییان بودجەی زەبەلاح و خەرجی زۆری پێویستە. كارەكانیان هێندە ڕێكخراوە، بە پشتگیری لایەنێكی بەهێز نەبێت بەڕێوەبردنی ئەم میدیایانە ئاسان نییە و مەحاڵە لەژێر ناوی دەزگا یاخود سەنتەرێكی سەربەخۆ و بێلایەن بەڕێوە بچن!
لە وڵاتی ئێمەدا زیاد لە پێویست بێ دەنگی هەیە بەرامبەر ئەو هێرشە ترسناكانەی كە لە لایەن چەند گروپێكی میدیایی دەكرێنە سەر ئەزموون و دەستكەوت و ڕەمزەكانمان، تەنانەت ئەم گروپانە دابەش كراون بەسەر چەندین بابەتی هەستیار كە بەشێك تەنها تایبەتە بە مێژووی دروستكراو و شێواندنی مێژوو، بەشێكیان ڕەمەزو سیمبوولە نەتەواتیەكانمان بچووك و ناشرین نیشان دەدەن، بەشێكی تر كاریان هەواڵی چەواشەكارانەی ڕۆژانەیە، بەشەكەی دیكەش بە ناوی قەڵەمی ئازاد و بیرو ڕا دەیانەوێ هزری نەتەوەیی لای كۆمەڵگا لاوازو بێهودە نیشان بدەن.
لە شەڕی دژ بە تیرۆرستانی داعش ئەو میدیایانە بابەتەكانیان تەرخان كردبوو بە لێدان و ناوزڕاندنیی هێزی پێشمەرگەی كوردستان و هەمیشە وا نیشانیاندەدا كە پێشمەرگەی كوردستان هێزێكی نامونەزەم و پەرتوبڵاوە و تواناكانیان لاوازە و ئەوە هێزی هاوپەیمانانن كە بەرەنگاری تیرۆرستانی داعش دەبنەوە، لە لایەكی دیكەوە سەبارەت بەو قەیرانە سەپێنراوە داراییەی كە حكومەتی عێراق بڕیاری لێدابوو ئەم تاخم و گروپە بەناو میدیای ئازادە، كوردستانیان تاوانبار دەكردو بڕیارەكانی حكومەتی بەغدایان بە باش و دروست بەرامبەر حكومەتی هەرێمی كوردستان لەقەڵەم دەدا و شەقامییان لە دژی دەسەڵاتدارانی هەرێم پڕ دەكرد. لە كاتی ریفراندۆمە سەركەوتووەكەی كوردستان قەڵەم و وشە نەما بەكاری نەهێنن دژی دەنگی بەڵێ ی كوردستانییان، بە شێوەیەكی ڕێكخراو دەیان كۆڕ و مێزگردی تەلەفزیۆنی و ڕادیۆیی و نووسین و بابەتیان دژی بڕیاری ئەنجامدانی ڕیفراندۆم دوور لە شەرم و بێ هیچ بەهایەكی ئەخلاقی بڵاو دەكردەوە.
پرسیار ئەوەیە ئایا چۆن دەكرێت میدیایێكی كوردی كە بڕیاری كاركردنی لە وەزارەتی ناوخۆی هەرێم وەرگرتبێت لە هەمانكاتدا دژی بەرژەوەندییەكانی هەرێم ڕابووەستێت و كار بكات؟!
ئەوەی لێرەدا گرنگە پارلەمانی كوردستان بە یاساكانی كاری ڕۆژنامەگەریدا بچێتەوە و كار بۆ هەمواركردنی بكات، یاسایەك جێگیر بكرێت كە هەر لایەنێكی میدیایی بێ ڕێزی و سنوور بەزاندنێك بكات بەرامبەر ئاسایشی نیشتیمانی لپێچینەوەو سزا و لەسەر بێت.
پێویستە یەكێك لە هەنگاوەكانی كابینە نوێ ی حكومەتی هەرێمی كوردستان بەگژداچوونەوەی ئەو جۆرە میدیا بەناو ئازادانە بێت كە كەوتوونەتە شێواندنی كۆمەڵگاو و یاریكردن بە بابەتی ئاسایشی نیشتیمانی و نەتەوەییمان.
ئەم دەزگا و گروپە میدیاییانە هەرگیز نابێت بە كەم و ساویلەكە و بێهێز تەماشا بكرێن، ئەوەی نووسرا و ئەوەی وترا ناكرێت بەهەندییان وەرنەگرین چونكە هەموو تیرێكی ئەم میدیایانە ئاراستەكەی بۆ شێواندنی كۆمەڵگاو و بۆ دڵی حكومەتە و هەموو ڕێگا و هەوڵێك تاقی دەكەنەوە بۆ لێدان و برینداركردنی هەستی كۆمەڵگا.
