رێبوار حەمەلاو شوانی
ئەزموونی 28 ساڵی رابردووی حوكمڕانی قۆناخی جیاجیای بۆ ئێمە ئاشكراكردووە، بەڵام ئەم قۆناخەی كابینەی نۆیەم دەتوانین بڵێین ئارامییەكی سایكۆلۆژی دروست كردووە، ئەمەش لەبەر ئەوەیە سایكۆلۆژیەتی هاووڵاتی ئێمە لە ژێر ئەو گوشارە دەروونی و سیاسی و ئابوورییانەدا پارچە پارچە بووە، بەڵام بەرنامەی ئەم كابینەیە وا دەكات ئارامییەكی سایكۆلۆژی لای هاووڵاتیان دروست بكات.
گەر خوێندنەوەیەك بۆ بەرنامەی كابینەی نۆیەمی حكومەتی هەرێمی كوردستان بكەین، ئەوا دەبێت لەسەرەتاوە ئاماژە بۆ ئەوە بكەین كە بەرنامەی كابینەی نۆیەم، بەرەنجامی رێككەوتنێكی سیاسیی لایەنە بەشدارەكانی حكومەتە، بۆیە هەم بەرنامەكە بەرنامەیەكی هاوبەشە، هەمیش جێبەجێكردنیشی بەرپرسیاریەتێكی هاوبەشەو، بەرنامەكەش لە 8 تەوەری سەرەكی پێكهاتووە لە ،چاكسازی، خزمەتگوزاری، پەیوەندییەكانی نێوان هەرێم و حكومەتی فیدڕاڵی، ئازادی و دیموكراتی و پێكەوەژیان، پەیوەندییە هەرێمییەكان، پەیوەندییە نیودەوڵەتییەكان دەتوانێت وا بكات دامەزراوەكان كاری خۆیان بكەن،دروستبوون و ئامانجی سەڕەكی پارتی دیموكراتی كوردستان لە دوای قۆناغی رزگاریخوازی و بە تایبەت لە دوای دامەزراندنی پەرلەمان وحكومەتی كوردستان لە ماوەی بیست و هەشت ساڵی رابردوو، لە پێناو چەسپاندنی گشت مافەرەواكانی كورد وكوردستانە ، وەك چۆن فیدراڵی و دەنگدان لە سەر سەربەخۆیی كوردستانی لە رۆژی 25/9/2017 چە سپێنرا ، ئێستاكەش دوای هەڵبژاردنەكانی 30ی ئەیلوولی 2018 ? دەستبەكاربوونی پەرلەمان، سەرۆكایەتی هەرێم و حكومەت هەموو ئامانج و هەوڵەكانی بە پاڵپشتی گشت هێزولایەنەكان و میللەتی كورد بەرەو كوردستانێكی گەشەكردوو و بەهێزە لە رووی سیاسی و دیپلۆماسییەوە. بۆیە، گرنگ بوو بۆ ئەو قۆناغە پێكەوە ئەركە تەواو نەكراوەكان كاری لەسەر بكەن. ئەگەر بگەرێینەوە بۆ دوای ئازادی عێراق لە نووسینەوەی دەستوور و رێكەوتنەكانی تر لەگەڵ عێراق و دەوڵەتانی دراوسێ هەرسی حزب نەخشەیان بۆ كێشاوە، كەم و زۆر كاریگەرییان بەسەر هاوپەیمانەكانەوە هەیە، لە لایەكی تریش دوای قوڵبوونەوەی كێشەكانی هەرێم لەگەڵ دەورووبەر و عێراق، بۆ ئەم قۆناغە پێویستی بە حكومەتێكی بەهێز هەبوو ئەمەش بە بەشداری پێكردنی زۆرترین نوێنەری هەرێم دێتە بوون. خەڵكی كوردستان چوار ساڵی ناخۆشی لە شەڕ و بێ مووچەیی و نائارامی سیاسیدا تێپەڕاند، چاوەروانییەكی زۆر لەسەر كابینەی نۆیەمە، هۆكاری چاوەروانییەكانیش خودی سەرۆكی حكومەت و ستافەكەیەتی، چونكە ئەزموونێكی باشی لە بە دامەزراوەییكردنی دەوڵەت هەیە، باشتر بوونی پەیوەندی هەرێم و بەغدا و چارەسەركردنی كێشە ئابوورییەكان دەرفەتێك و ئومێدەكە كە كابینەیەكی ئاوەدانی و ئارامی زیاتر بێت.پارتی دیموكراتی كوردستان لە پێناو بەرژوەندیی و جێبەجێكردنی ستراتیژی كوردستانێكی بەهێز و گرنتی مانەوەی رێككەوتنەكە جێبەجێكردنی خاڵەكانی ناو كارنامەی حكومەتە كە پێكهاتووە لە گەڕانەوەی شكۆی هەرێم بە چاكسازی و خزمەتگوزاری و كەمكردنەوەی گەندەڵی و بەهەدەر نەدانی موڵكی گشتی. بە ئۆپۆزسیۆن بوونیش شێوازێكی نوێ و دەستهەڵاتیكی نوێ بوو لە هەرێم، بە هۆی كێشە ئاڵۆزەكانی هەرێمیش دەستەڵات كەمتر دەیتوانی وەڵام گۆی خەڵكی كوردستان بێ، ئۆپۆزسیۆنیش زیاد لە پێویست پەیامی خۆی بڵاو دەكردەوە، بەڵام لە كۆتاییەكانی حكومەتدا بە یاسا هەڵسوكەوتی لەگەڵ كرا، ئەوەی پێشێلی رێككەوتنی كرد لە بەڕێوەبەردنی دەستهەڵات خرایە دەرەوە، بۆیە پێمان وایە ئێستا ئەوانەی رێككەوتوون رێز لە واژووی خۆیان دەگرن، هەست بە بەرپرسیاریەتی مێژوویی خۆیان دەكەن، ئەوانەشی ئۆپۆزسیۆنن شێوازی مەدەنی و عەقڵانی ئۆپۆزسیۆن بوونی خۆیان دەگێرن واتە خەڵك گوێ بە وانە نادا كە لە حكومەتن رەخنە بگرن و گوێش لە ئۆپۆزسیۆن ناگرن رەخنەی رووخێنەر بگرن”.دروستبوونی پارتی دیموكراتی كوردستان لەسەر بیروڕا و فكری جیاواز نەبوو لەگەڵ حكومەتی عێراق، بەڵكو لەسەر خواست و مافەكانی كورد بووە، تا ئێستاش مافەكانی كورد نەهاتوونەتە دی، هاتنە دی مافەكانیش بۆ هەمووانە، پێویستیشی بە هەمووان هەیە. بۆیە تا ئەو كاتەی مافەكان دێنە دی پارتی كار لەسەر یەكگرتوویی و تەبایی ناوماڵی كوردستان دەكات، هەموو رێگەیەكیش ئەگرنە بەر تا بە ئەنجام بگات ئەگەر لەسەر حیسابی بەرژەوەندی لایەنگرانی خۆشی بیت، چونكە هیچ كات بە پەرتەوازەیی نەمانتوانیوە هیچ بە دەست بێنین، ئەگەر بگەرێینەوە بۆ مێژوو لە دروستبوونی بەرەی كوردستانییەوە تا ئازادی عێراق و نووسینەوەی دەستوور و شەری داعش بە یەكگرتوویی توانراوە هەرێم بپارێزرێت، بۆیە ئەولەوییەتی سەرۆك نێچیرڤان ڕێكسختنەوەی ناو ماڵی كوردە بۆ جێبەجێكردنی كارنامەی نەتەوەیی و پشتیوانیكردنی حكومەت.
لەرووی دیپلۆماسی و پەیوەندییەكانی دەرەوەی كوردستان، هەروەها بانگهێشتی فەرمی بۆ سەرۆكی هەرێمی كوردستان لەلایەن وڵاتی فەرەنسا كە یەكێكە لەو پێنج دەوڵەتەی كە كاریگەرییان لەسەر تەواوی ئاسایشی جیهان هەیەو ئەندامی هەمیشەیی ئەنجوومەنی ئاسایشی جیهانە، بۆ ئێمەی كورد فەرەنسا تاكە هێزی گەورەی نێودەوڵەتییە كە ڕاستگۆیانە و بوێرانە لە هەموو قۆناغەكان پاڵپشتی هەرێمی كوردستانی كردووە، دواین جار لە ڕووداوەكانی 16 ئۆكتۆبەر هیچ هێزێك پشتیوان نەبوو بەڵكو بگرە ئەوانەی زۆریش دۆست بوون بێدەنگیان هەڵبژارد، تاكە هێز كە دەرگای كردەوە و بە فەرمی پێشوازی لە سەرۆكی حكومەت كرد فەرنسا بوو كە جارێكی تر بەستەڵەكی سیاسی بەرامبەر هەرێم شكاند و دەرگاكان بەرووی هەرێم كرانەوە، ئەمجارەش دیسان لە بانگێشت كردنیدا پابەند بوون و پیشاندانی دانپێدانانێكی نێودەوڵەتییە بەرامبەر قەوارەی دەستووری هەرێمی كوردستان و ئەو پشتیوانیكردنە لە سەر ئاستی ئەمەریكا و وڵاتانی ئەوروپایی و بەتایبەت فەرەنسا ، دۆزی كورد زیاتر بەرەو پێشەوە دەبات بەرەو ئاراستەی كوردستانێكی بەهێز.
