ڕاپۆرت / فاتیح بەرزنجی
هەموو ساڵێك لەگەڵ هاتنی جەژن و بۆنە نەتەوەیی و ئایینییەكاندا نرخەكان گران دەبن و هاووڵاتیان داوا لە لیژنەی پشكنین و چاودێری بازاڕ دەكەن، كە كارەكانیان چڕتر بكەنەوەو ڕۆژانە سەردانی بازاڕو كۆگاكانی خۆراك و كەلوپەل بكەن بۆ ئەوەی لەنزیكەوە لەنرخەكان بكۆڵنەوە تا بازرگان و خاوەنی دوكان و مۆڵەكان پابەندی ڕێنماییەكان بن و نرخی كاڵاكان بەرزتر نەكەنەوە. بەپێی قسەی هاووڵاتیان هەندێ لە بازرگان و دوكانداران و خاوەنی سوپەر ماركێتەكان گوێ بەڕێنماییەكان نادەن. بۆ ئەوەی چیتر هاووڵاتیان گلەیی و گازندە لەگرانی نرخەكان نەكەن هەموو ساڵێك لیژنەی پشكنین وچاودێری بازاڕ چەندین ڕێنمایی گرنگ دەردەكەن و لیژنەكان كارەكانیان فراوانترو چڕتر دەكەنەوە. ساڵانە ئەو گلەیی و ناڕەزایەتییەی هاووڵاتیان زۆردەبن لەسەرگرانی نرخی كاڵاو كەلوپەلی تایبەت بە جەژن و خۆراك، لیژنەكانی قایمقامیەتیش بەردەوام بەدواداچوون بۆ كوالیتی خۆراك و بەرزبوونەوەی نرخەكان دەكەن. بۆ بەدواداچوونی ئەو بابەتە سەردانی بازاڕی هەولێرمان كردو ڕاوسەرنجی ژمارەیەك لە هاووڵاتیان و دوكاندارانمان وەرگرت. ئازاد تاهیر لەبازاڕی شێخەڵڵا خەریكی كڕینی خۆراك بوو گوتی: هاتووم تا بۆ بۆچەند ڕۆژێك خۆراك بكڕم، هەندێ لە دوكانداران لەو ماوەیە نرخەكان گران دەكەن و ویژدانی خۆیان ئاسوودە ناكەن و ڕەچاوی باروگوزەران و باخەڵی خەڵكی ناكەن. كامەران خالید فەرمانبەری حكوومەتەو گوتی: داواكارم لە لیژنەی پشكنین و چاودێری بازاڕ لەو ماوەیەدا كارەكانیان چڕتر بكەنەوەو ڕۆژانە لە نرخەكان بكۆڵنەوە بۆ ئەوەی بازرگانان و دوكانداران ئەو هەلە هەڵنەقۆزنەوەو نرخەكان گران نەكەن. شاخەوان ئیسماعیل گوتی: چەندین سوپەرماركێت و مۆڵی خۆراك ڕیكلام بۆ هەرزانی نرخەكان دەكەن هەر كە سەردانی شوێنەكە دەكەیت وانییەو داشكاندن بۆ كاڵا سادەكان دەكەن و داشكان بۆ خۆراك و كەلوپەلی پێویست و پەیوەست بە جەژن و بۆنەكان ناكەن، بەداخەوە ئەو شوێنانە لەپێناو قارانج ڕیكلام دەكەن لەپێناو یارمەتیدانی خەڵكی ئەو كارە ناكەن، هەقوایە لیژنەكان لێپرسینەوە لەگەڵ ئەو شوێنانە و جۆری ریكلام و ئەو دەزگایانەیش بكەن، كە ریكلامی ناڕاست بۆ ئەو ماركێت و مۆڵانە دەكەن. خاوەنی كۆمپانیایەكی خۆراكیش گوتی: ئێمە هەمیشە هەوڵمانداوە داشكاندن بۆ كاڵاكان بكەین و ڕەچاوی بارو گوزەرانی خەڵكی بكەین و خۆراكێكی زۆر ڕەوانەی بازاڕ بكەین، بەتایبەتی لەو ماوەیە كە نزیكدەبینەوە لە جەژنی قوربان، هەرگیز لەلای ئێمە نرخەكان گران ناكرێت وهەر دوكاندارێك كاڵای ئێمە بەگران بفرۆشێت ئێمە چیتر مامەڵەی لەگەڵ ناكەین. محەمەد خاوەنی سوپەر ماركێتێك بوو گوتی: بۆ بەرژەوەندی خەڵكی ماوەماوە داشكاندن بۆ كاڵاكان دەكەین و چاومان لەقازانجی بێ بەرانبەر نییەو لەنزیكەوە لە بارو گوزەرانی هاووڵاتیان دەڕوانین، نابێ دوكانداران لەو بۆنە نەتەوەیی و ئایینیانەدا چاویان ببڕنە قازانج و فڕوفێڵ، هەر كەسێكیش لەو دوكاندارانەی ئێمە مامەڵەیان لەگەڵ دەكەین رێنماییامان پێداون، كە لەبەر ناوبانگ و بەرژەوەندی ماركێت و كۆمپانیاكانی خۆمان نابێ كاڵا و كەلوپەلەكانی ئێمە گران بكەن. خاوەنی كۆمپانیایەكی دیكە گوتی: ئێمە هیچكات بیر لەقازانجی زۆر ناكەینەوە، بەتایبەتیش لە بۆنەكاندا، بەڵكو ئەو بۆنە نەتەوەیی و ئایینیانە دەرفەتێكن بۆ زیاتر ناساندنی كاڵا و كەلوپەل و خۆراك و ئەو پێداویستیانەی هاوردەیان دەكەین، بۆیەش بەردەوام و بەپێچەوانەی ئەو بۆچوونەی پێیوایە كۆمیانیاكان نرخەمان بەرزدەكەنەوە، ئێمە داشكاندن دەكەین، بەڵام ئەوەیش راستە كە هەندێك ماركێت و مۆڵ و دوكان هەن كە بەدەرفەتی دەزانن نرخ بەرزبكەنەوە لەبەر زۆری خواست و كڕیار، بەڵام بەگشتی ئەوە بەلای كۆمپانیاكانەوە كارێكی هەڵەیە. كۆمپانیایەكی دیكەی هاوردەكردنی خۆراك لە دەرەوەی وڵات، خاوەنەكەی ئامادە نەبوو قسە بۆ میدیا بكات، بەڵام ئاماژەی بەوەدا كە ئەوان خۆراكێكی زیاتر دەخەنە بازاڕەكان و داواش لە هاووڵاتیان دەكەن كە خۆراكی زۆر نەكڕن، چونكە ژمارەی كۆمپانیاكانی خۆراك زۆرەو خۆراك لە بازاڕدا كەم ناكات تا نرخەكەی زیاد لە پێویست گران بێت، هاوكات ئەوەشی گوت كە هەر یەكێك لەو كەسانەی كەخۆراكی هاوردەی كۆمپانیاكەی ئەوان بەگران بە خەڵكی بفرۆشێت چیتر مامەڵەی لەگەڵدا ناكەین.
