خه‌بات: هەندرێن شێرزاد:-
رۆژی 28 ی حوزەیرانی رابردوو، وڵاتانی گرووپی 20 بە ئامادەبوونی 37 وڵات و رێكخراو ، كۆبوونەوەی لووتكەی خۆی لە شاری ئۆساكای ژاپۆن ساز كرد ، ئەجیندای كۆبوونەوەكە بریتی بوو لە ژمارەیەك بابەت و دۆسیەی گرنگی وەك : لەوانە: ئابووری جیهان و ئافرەتان و گەشەكردن و بازرگانی و سەرمایەگوزاریی و داهێنان و تەندروستی و ژینگە و وزە و دۆسیەی دامەزراندن . كۆبوونەوەكە دوو رۆژی خایاند و ئامادەبووان لەسەر كۆمەڵێك بابەت رێككەوتن.
بازرگانی و ئابووری جیهان
ئامادەبووان لەسەر رووبەڕووبوونەوەی نایەكسانی رێككەوتن ، هەروەها بڕیاریان دا سیاسەتی زیرەكانە بگرنە بەر لە پێناوی خۆپاراستن لەو هەڕەشانەی رووبەڕووی گەشەكردنی جیهان دەبنەوە . سەبارەت بەو ناسەقامگیریەش كە لە بواری بازرگانی و بابەتە جیۆسیاسیەكان سەری هەڵداوە ، بڕیاری دامەزراندنی یەدەگی داراییان دا بەمەبەستی زامنكردنی بەڕێوەبردنی قەرزە حكوومیەكان ، بەجۆرێك كە سیاسەتە داراییەكان ببنە مایەی جێگیركردنی نرخ و بووژانەوەی ئابووریەكان . هاوكات سەركردەكان رایانگەیاند كە لە پێناوی هێنانەدی ژینگەیەكی ئازاد و یەكسان و سەقامگیر و شەفاف و پێشبینیكراوی بازرگانی و سەرمایەگوزاری كار دەكەن.
پەنگخواردنی گەرما و ژینگە
ئامادەبووانی كۆبوونەوەكە گفتوگۆیان دەربارەی هەموو ئەو كێشە و گرفتانە كرد كە پەیوەندیان بە پیسبوونی ژینگە و گۆڕانی كەشوهەوا هەیە. لەو بارەوە 19 ئەندام پابەندبوونی خۆیان بە رێككەوتنی پاریس راگەیاند ، ئەمەریكا ئەگەرچی ئەمەی نەكرد بەڵام رایگەیاند كە بەشێوازی تایبەت كار بۆ كەمكردنەوەی ئاستی بڵاوبوونەوەی غازە گەرمەكان دەكات.
ئاسایشی ئەلیكترۆنی و تیرۆر
ئەندامانی گرووپی 20 رایانگەیاند كە هەنگاوی زیاتر دەنێن لە پێناوی رێگەگرتن لەوەی ئینتەرنێت بۆ كۆمەككردن و ئاسانكاری كردەوەی تیرۆرستی و توندڕەوی بەكار بهێنرێ . سەركردەی وڵاتانی گرووپی 20 لە بەیاننامەیەكدا رایانگەیاند كە ئەگەرچی دەبێ ئینتەرنێت بۆ هەموو كەسێك كراوە و ئازاد بێ ، بەڵام ناكرێ ببێتە پەناگەیەك بۆ تیرۆرستان ، بەڵام لەمەدا دەبێ رێز لە مافەكانی مرۆڤ و ئازادیە بنەڕەتیەكان و شێوازەكانی گەیشتن بە زانیاریەكان بگیرێ.
گەشەكردنی بەردەوام
سەركردە ئامادەبووەكان رایانگەیاند كە كار بۆ ئەوە دەكەن لە پێناوی سوككردنی ئاستی هەژاریدا هیچ لایەك وەلا نەنرێ ، ئەمە وێڕای سەرمایەگوزاریكردن لە ژێرخانێكی شیاو و پتەوكردنی یەكسانی نێوان هەردووك رەگەز و دابینكردنی دەرفەتی كار و خوێندن و مەشق و راهێنان.
هەڵڕژانی زانیاریەكان
بەر لە دەستپێكی كۆبوونەوەكە ، سەرۆكوەزیرانی ژاپۆن رایگەیاند كە بەنیازە بابەتی ئازادیی هەڵڕژانی زانیاریەكان بخاتە نێو گفتوگۆكان . هەر لەو بارەوە ئابێ وتی : پێویستە توانای پاراستنی زانیاریە كەسێتیەكانمان هەبێ ، هاوكات پێویستە ئازادی هەڵڕژان و بڵاوكردنەوەی ئەو زانیاریانەش فەراهەم بكرێ كە پەیوەندیان بە ئامێرە پزیشكی و پیشەسازیەكانەوە هەیە. لە دوای كۆبوونەوەكەش جەختی لەسەر ئەوە كردەوە كە ئامادەبووان تەنیا لەسەر زیادكردنی ئاسانكاری هەڵڕژانی زانیاریەكان رازی بوون ، بە مەرجی رێزگرتن لە سنوورە یاساییەكان.
جیهانێكی دوور لە پلاستیك
یەكێك لە دەرەنجامە پۆزەتیڤەكانی دیكەی كۆبوونەوەی ئۆساكا رازیبوونی ئامادەبووان بوو بە پێشنیازێكی ژاپۆن لەژێر ناوی دیدی ئۆساكا بۆ ئۆقیانووسی شین ، بەڵكو رێكخراوە ژینگەییەكان خۆشحاڵیەكی زۆریان پیشان دا و رایانگەیاند ئەمە دەستپێكێكی باشە بۆ چارەسەركردنی كێشەی ئەو پاشماوە پلاستیكیانەی فڕێ دەدرێنە دەریا و زەریا و ئۆقیانووسەكان . لە پێشنیازەكەدا باس لەوە كراوە كە پێویستە وڵاتان كار بۆ ئەوە بكەن كە تا ساڵی 2050 ئاستی ئەو پاشماوە پلاستیكیانە بگەیەننە سفر.
دەربارەی گرووپی 20
ساڵی 1999 بە مەبەستی بایەخدان و گفتوگۆكردن دەربارەی هەموو ئەو بابەتانەی تایبەتن بە ئابووری جیهان ئەم گرووپە دامەزراوە و ئەم وڵات و لایەنانە دەگرێتە خۆی : ئەرژەنتین ، ئوسترالیا ، چین ، فەرەنسا ،بەرازیل ، شانشینی یەكگرتوو ، ئەڵمانیا ، هیند ، ژاپۆن ، مەكسیك ،باشووری ئەفریقیا ، رووسیا ، سعودیە ، توركیا ، كۆریای باشوور ، كەنەدا ، ئەندۆنیسیا ، ئەمەریكا ،ئیتالیا ، هەروەها سندوقی دراوی نێودەوڵەتی و بانكی نێودەوڵەتی و یەكێتی ئەوروپا.
كۆبوونەوە و بارەگا و ژمارەی كارمەندان
گرووپی 20 تا ئێستا خاوەنی بارەگایەكی جێگیری نیە ، هەروەها كارمەندیشی نیە . لە كۆبوونەوەی لووتكەی ساڵانەدا ئەندامانی گرووپ بە نۆرە كۆدەبنەوە ، هەروەها ساڵانە چەند كۆبوونەوەیەكی دیكەش ئەنجام دەدرێن . هەروەها لە ماوەی ساڵێكدا وەزیرانی دارایی و بەرپرسی بانكەكانی وڵاتانی ئەندام چەند جارێك كۆدەبنەوە .
ئامانجەكان
گرووپی 20 بە مەبەستی هێنانەدی كۆمەڵێك ئامانج و مەبەست پێكهێنراوە ، لەوانە:
پێشخستن و گەشەپێكردنی ئابووری جیهان .
چاكسازیكردن لە دەمودەزگا داراییە نێودەوڵەتیەكان .
باشتركردنی سیستمی دارایی و پشتگیریكردن لە گەشەكردنی ئابووری جیهان .
دابینكردن و پەرەدان بە دەرفەتی كار .
كاركردن بە پێشنیازەكانی بازرگانی كراوە .
زیادكردنی ئاستەكانی گەشەكردن لە سەرجەم ناوچەكانی جیهان .
كاركردن بۆ جێگیركردنی سەقامگیریی ئابووری نێودەوڵەتی .
