ماوەی چەند ڕۆژێكە بە بیانووی هەبوونی چەكدارانی پەكەكەوە فڕۆكە جەنگییەكانی توركیا خاكی هەرێمی كوردستان بوردوومان دەكەن و بەو هۆیەوە لە حەفتەی ڕابردوودا پێنج هاووڵاتیی سڤیل شەهید بوونە. پەرلەمانتارێكی فراكسیۆنی پارتییش دەڵێ، داوا دەكەن چیی تر هاووڵاتییانی هەرێمی كوردستان نەبنە قوربانیی شەڕی نێوان دوو لایەنی دەرەكی.
جگە لە زیانی مادی، ساڵانە ژمارەیەك هاووڵاتیی سڤیلی هەرێمی كوردستان دەبنە قوربانی
دكتۆر زێدان برادۆستی، پەرلەمانتاری پارتی لە پەرلەمانی كوردستان، بە ماڵپەڕی فەرمیی پارتی دیموكراتی كوردستانی ڕاگەیاند: بەهۆی شەڕ و پێكدانانی نێوان سوپای توركیا و چەكدارانی پارتی كرێكارانی كوردستانەوە، ساڵانە ژمارەیەك هاووڵاتیی سڤیلی هەرێمی كوردستان دەبنە قوربانی. بەداخەوە ئەمساڵ بەهۆی تۆپباران و بوردوومانی توركیاوە نزیكەی زیاتر لە 10 هاووڵاتیی سڤیل شەهید بوونە و ژمارەیەكی زۆرتریش بریندار بوونە، ئەمە جگە لە زیانی ماددی كە بەر هاووڵاتییان كەوتووە، لەبەر ئەوەش، داوا لە وڵاتی توركیا و پەكەكە دەكەین شەڕی خۆیان نەهێنن بۆ ناو گوندەكانی هەرێمی كوردستان، با چیی تر هاووڵاتییانی بێتاوان نەبنە قوربانی.
پەرلەمانتارەكەی پارتی دەشڵێت: زیانی شەڕی توركیا و پەكەكە تا دێت بۆ هاووڵاتییانی هەرێمی كوردستان زۆرتر دەبێت، چونكە بەپێی ئامارێك كە گەیشتووەتە دەستمان، تەنیا لە ساڵانی ڕابردوو لە سنووری ناحیەی سیدەكان نزیكەی 60 هاووڵاتی بوونەتە قوربانی، كە هیچ بەهانەیەك نییە بۆ لێدانی هاووڵاتییانی هەرێمی كوردستان و مەیدانی شەڕی پەكەكە و توركیاش خاكی هەرێم نییە.
لەبارەی سەرهەڵدانی گرووپێكی دیكەی سەر بە پەكەكە لەسەر خاكی هەرێمی كوردستان، دكتۆر زێدان برادۆستی ئاماژەی بۆ ئەوە كرد: هەر گرووپ و هێزێك بەبێ مۆڵەتی فەرمی دابمەزرێت ئەوە دەچێتە دەرەوەی چوارچێوەی یاسا و ڕێنماییەكانی هەرێمی كوردستان و ڕاگەیاندنی ئەو گرووپەش هیچ پەیوەندییەكی بە هەرێمی كوردستانەوە نییە، چونكە حزبێكی دیكەی سەر بە پەكەكەیە و مۆڵەتی دەزگا فەرمیەكانی نییە، لەبەر ئەوەش، ئێمە بە زیان بۆ سەر هەرێمی كوردستانی دەزانین.
لە دوا بۆردوماندا چوار كەسی یەك خێزان شەهیدبوون
بە بیانووی بوونی بنكە و بارەگاكانی چەكدارانی پەكەكە سوپای توركیا ناوچە سنوورییەكانی هەرێمی كوردستان بۆردومان دەكات و هەر لە ماوەی ئەم مانگەدا بۆ جاری دووەمە فرۆكە جەنگییەكانی توركیا خەڵكی سڤیلی ئەو ناوچانە دەكەنە ئامانج و رۆژی پێنجشەممە 27/6/2019 هەردوو گوندی بڕەدێ و عاشقووڵكەی سەر بە شارەدێی سەنگەسەر لە بناری قەندیل بۆردوومانكرد و بەهۆیەوە 4 كەس شەهیدبوون و پێنج كەسی دیكەش بریندار بوونن كە هەموویان یەك خێزانن و لەناو ئۆتۆمبێلی خۆیاندا بوون.
بەپێی شاهێدحالان، بۆردوومانەكە بۆ سەر دوو ئۆتۆمبێلی جۆری تیۆتا مەرزیە و تیۆتا لاندكرۆزەر بووە و بە هۆیەوە 4 كەس شەهید بوون، كە لە دایك و باوك و منداڵیان بوون و 5 كەسی دیكەش بریندار بوون و بریندارەكان گەیەندرانە نەخۆشخانەی قەڵادزێ.
