خه‌بات- ڕۆشنا عەلی:
دوای ڕاگەیاندنی ئەنجامی تاقیكردنەوە گشتی و وزارییەكانی ساڵی 2018- 2019 بە ئامادەبوونی كەس و كاری قوتابیان یەكەمەكانی هەرێمی كوردستان دیاریكران، ڕێوڕەسمێكی تایبەتییان لە هۆتێل دیدەمانی شاری هەولێر بۆ ڕێكخرا پشتیوان سادق وەزیری پەروەردە لە وتەیەكیدا پیرۆزبایی لەسەرجەم قوتابیان كردوو ئومێدی سەركەوتنی بۆ خواستن و ئاماژەی بەوەشدا كە 3000 قوتابی نمرەی 90 -100ی هێناوە كە %95 ی قوتابی هەژارن ڕێژەی گشتی دەرچونیشی ڕاگەیاند كەلە%48 ە ، لەلێدوانێكی تایبەتیش بە ڕۆژنامەی خەبات كەریم لەتیف بەڕێوەبەری گشتی ئەزموونەكان سەرۆكی لیژنەی تاقیكردنەوەكان دەربارەی ئەو نمرانەی بە قوتابییان دراوە لە بەرامبەر بوونی هەڵە لە پرسیارەكان ئاماژەی بەوەدا كە تەنها دوونمرە بەگشتی بە قوتابییان دراوە و ئەوانەی تر بەپێی وەڵامی قوتابی بووە ئەو دوونمرەیەش لە وانەی كوردی دراوە، وتیشی مەرج نییە هەموو قوتابییەك لە پێدانی ئەو نمرەیە سوود مەند بووبێت.
كۆششێكی بەردەوام
ژیر محەمەد قوتابی لە قوتابخانەی یونایتد ساینس لە شاری سلێمانی یەكەمی هەرێمی كوردستان بووە لەبەشی زانستی پۆلی دوانزەیەم وئەو بۆ خەبات وتی” هیچ مامۆستایەكی تایبەتیم نەبووە هەوڵ و كۆششێكی زۆرم دا بۆئەوەی بگەم بەم ئاستە ،چونكە خۆم ئامانجم بوو نمرەی بەرز بەدەست بهێنم سوپاس بۆ خوا و مامۆستاو كەس و كارم توانیم ئەو نمرەیە بەدەست بهێنم.
ژیاكۆ كاوە محەمەد دووەمی دوبارەی هەرێمی كوردستان لە قوتابخانەی یونایتد ساینس لە سلێمانی بۆ خەبات ئاماژەی بەوەدا كە ئەو هیچ مامۆستای تایبەتی نەبووە، بەڵام كۆرسێكی هاوینەی كردووە بۆ چوار وانە ، تەنها بە هەوڵی مامۆستاكانی و كەس و كاری توانیوێتی بگاتە ئەم پلە بەرزە ئەو وتی كاتێك پێیان وتم هەستێكی زۆر خۆشم هەبوو هەرچەند بڕوام نەدەكرد لەیەكەمەكان بمو كۆنمرەكەم 99.14
26 ساڵ دابڕان
شیروان محەمەد یەكەمی بەشی پیشەیی لە ئامادەیی بازرگانی ئێوارانی تێكەڵاو ئەو بۆ خەبات وتی هەستێكی خۆشم هەیە پیرۆزبایی لە خۆم و هاوڕێكانم دەكەم پێشبینی نمرەیەكی وام نەدەكرد لەڕاستیدا سوپاسی ست كاژاو بەڕێوەبەری قوتابخانەكەم دەكەم و مامۆستا ڕێباز یاریدەدەری بەڕێوەبەرو سەرجەم مامۆستایان و دەستەی كارگێڕی قوتابخانە دەكەم بەتایبەتی مامۆستایانی پۆلی 12 كە زۆر هیلابوون لەگەڵمان .
یادگار كەمال محەمەد قوتابی 12 ی ئامادەیی بازرگانی ئێوارانی سلێمانی پلەی دووەمی بەدەستهێناوە لەسەر ئاستی هەرێم ئەو وتی : سوپاسی خانەوادەكەم دەكەم من لە ئێواران دەخوێنم و پێشمەرگەم قوتابییەكی دابڕاو بووم لە خوێندن و ئێستاش زۆر خۆشحاڵم دوای بیست و شەش ساڵ دابڕان دووەمی هەرێمم بەهۆی كوردایەتییەوە دابڕام تاكە ئازاری ناخم ئەوەبوو نەمتوانی خوێندن تەواو بكەم، بەڵام ئاواتم هاتەدی .
هەژی بەنگین تاهیر لە قوتابخانەی كۆلێژی دهۆكی بەهرەداران دووەمی سەر ئاستی هەرێم بۆخەبات وتی : هەستێكی زۆر خۆش بوو كاتێك هەست ئەكەی ڕەنجەكەت بە فیڕۆ نەچووە تەنها خاڵم مامۆستای عەرەبیم بوو هەوڵێكی زۆری لەگەڵ دام كۆنمرەكەم .99.14.
تاهەولێر بە دوودڵی
دالیا هاشم لە قوتابخانەی ئامادەیی گەشەی ئەهلی سێیەمی هەرێم بووەئەو بۆ خەبات وتی : ساردببومەوە لەبەر هەڵەی پرسیارەكان ، پێشبینی ئەو نمرەیەم نەدەكرد دامنابوو 90 -95 بێنم ، بەڵام تەلەفۆنم بۆكرا كە سێیەمی هەرێمم كۆنمرەكەم 98083 یە پێم وایە قوتابخانە زۆر گرنگە بۆ قوتابی قوتابخانەكەی من باشترین ستافی تێدایە هەتا هاتمە هەولێر ئەترسام هەواڵی یەكەمییەكەم ڕاست نەبێت .
كورە پێشمەرگەیەك
مەنسور قادر موحسین یەكەمی هەرێمی كوردستان لەبەشی زانستی لە ئامادەیی بەدرخانی كوڕان لە شارۆچكەی هەریر كۆنمرەكەی 99.44 هەستێكی زۆر خوش بوو سەرەتا دوو مامۆستا هاتن داوای ژمارە تەلەفۆنی باوكمییان كرد دوای نیو كاتژمێر تەلەفۆنییان كرد كەلە هەولێر ئامادەبین گوایە من یەكەمم قوتابخانەكەم حكومی بوو هیچ مامۆستایەكی تایبەتم نەبوو مامۆستاكانی خۆم تاكە هاوكارم بووم بۆ ئەوەی بگەم بەم ئاستە هەموو خۆشییەكانی ژیانم بەلاوە نابوو تەنها وانەم ئەخوێند كەس و كارم پێشبینییان ئەكرد ئەم نمرەیە بێنم، بەڵام خۆم نا .
نازدار ئەسعەد دایكی مەنسوور قادر یەكەمی هەرێم بۆ خەبات دوواو وتی ” كوڕەكەم زۆر زیرەك بوو لە منداڵییەوە پێشبینیم دەكرد مناڵەكانی دیكەشم زیرەكن بەڵام كەسییان لە یەكەمەكان نەبوون دەربارەی ئەوەی وەك دایكێك چ كارێك بۆ كردووە كە خۆت نەتوانیوە وانەی پێ بڵێیت وتی ” بە هەموو شێوەیەك هاوكاریم دەكرد بەجێم نەدەهێشت بەهیچ جۆرێك وازم لە هەموو خۆشی و چوونە دەرەوەو سەردانی خزم و سەفرەو گەڕان هێنابوو شەوانیش تا ئەو نەنوستایە من نەدەنوستم ئێستاش زۆر دڵم خۆشە لەدڵخۆشییا ئەگریام .
سەهەند سەركەوت عەبدوڵا یەكەمی هەرێم لەبەشی وێژەیی بە كۆنمرەی 97،43 ئاماژەی بەوەدا كە ڕۆژانە بەپێی توانای خۆم وانەم خوێندووەو پۆلی 12 وەك پۆلەكانی ترە هەوڵی زیاتری ئەوێت سوپاسی مامۆستاو كەس و كارم ئەكەم كە هاوكارم بوون بۆ ئەوەی بگەم بەم نمرەیە .
گریانی خۆشی
كەوسەر محەمەد حەمە ڕەشید دووەمی هەرێمی كوردستان لە بەشی وێژەیی لە قوتابخانەی ئامادەیی قەرەداغی تێكەڵاو لە پارێزگای سلێمانی نمرەكەم 96 ە كاتێك تەلەفۆنییان بۆكردم تێر گریام زۆر دڵخۆش بووم پێشبینی ئەو نمرەیەم دەكرد هەمیشە باوەڕم بە خۆم بوو كەئەو نمرەیە بەدەستبهێنم مامۆستاكانم و خێزانەكەم یارمەتی دەرێكی باشم بوون هیچ مامۆستایەكی تایبەتم نەبوو .
قۆناغێكی نوێ
محەمەد عەلی عوسمان لە قوتابخانەی سەڵاحەدینی كوڕان لە سلێمانی (یونایتد ساینس ) لە پۆلی نۆی بنەڕەتی نمرەی 99.8 ی بەدەستهێناوەئەو وتی : هەر لەسەرەتای ساڵەوە هەوڵم بۆ ئەیا كە نمرەیەكی وا بەدەستبهێنم ئێستاش ئێمە بەرەو قۆناغێكی نوێ دەڕۆین كە ئامادەییە دەبێت خۆمانی بۆ ئامادە بكەین .
زوڵێخا ئەنوەر یەكەمی هەرێم لە ئامادەیی كشتوكاڵ لە پارێزگای هەولێر كۆنمرەكەی 86 ە بڕوام دەكرد ئەو نمرەیە بێنم ، چونكە زۆر هەوڵم بۆدا دایك و باوكم تاكە هاندەرو هۆكاری سەركەوتنی منن وخۆشم بەڕێكەوت چوومە ئامادەیی كشتوكاڵ .
لانە كەمال محەمەد ساڵح لە ئامادەیی پیشەسازی كچان سێیەمی هەرێم لەبەشی پیشەییەكانئەو وتی : هەمیشە قوتابی ترسی هەیە هەرچەند هەوڵێكی زۆرم دابوو هیچ مامۆستایەكی تایبەتم نەبووە، بەڵام مامۆستاكانی خۆمان زۆر هاندەرم بوون حەز دەكەم هەندەسەی بیناسازی بخوێنم .
لەلێدوانێكی تایبەت بە ڕۆژنامەی خەبات دەربارەی قەرەبووكردنەوەی قوتابیان و لێپێژینەوە لەو كەسانەی هۆكاری هەڵەكان بوون كە ئایا ئەوان چییان لەو بارەیەوە كردووە كەریم لەتیف وتی : ئەگەر هەڵەكان بەو ڕادەیە بێت كاریگەری لەسەر ئایندەی قوتابی بكات بە دڵنیاییەوە لێپێچینەوە دەكەین هیچ هەڵە لە پرسیارەكان نییە تەنها بۆچوونی جیاوازی لەسەرە كێشەی سەرەكی ئەوەیە قوتابی فێربووە لەسەر مەلزەمە دەخوێنێت ئەو پرسیارانەی عەرەبی و ئینگلیزی لەدەرەوەی مەلزەمە هاتۆتەوە بۆیە بۆ قوتابی هەندێك نائاشنا بوو ئەو مامۆستایانەشی بەرژەوەندییان هەیە لە فرۆشتنی مەلزەمەو بازرگانیكردن بە قوتابی ئەو مامۆستایانە هۆكاربوون كە گوایە پرسیار هەڵەیە ، چەندین لێژنەم پێكهێناوە چەندین پسپۆڕی شارەزام هێناوە بۆ هەڵسەنگاندنی پرسیارەكان لیژنەی فەرمیمان هەبووە چ لەلایەن وەزیری پەروەردە چ لەلایەن بەڕێوەبەرایەتی پەروەردەكان ڕەوانە كراوە بە واژوو دیكۆمێنت هەیە كە پرسیارەكان هیچ هەڵەی زانستییان تێدا نییە، بەڵام لەدەرەوەی مەلزەمەیە ئەو كێشەیە بۆ ئەو قوتابیانە دروست بووە كە پشتییان بە مەلزەمە بەستووە .
تاقیكردنەوەكان بەبەشداری 234 هەزارو 332 قوتابی پۆلی دوانزەی ئامادەیی و نۆی بنەڕەتی و پیشەیی بەشدارییان لە تاقیكردنەوەكاندا كردووە كەبەسەر چوارهەزارو 101 هۆڵی تاقیكردنەوەدا دابەشكرابوون 27 هەزار مامۆستاش چاودێری هۆڵەكانی تاقیكردنەوەكانییان كردووە .
