كاروان محەمەد سینۆ
پاش خیانەتی 16ی ئۆكتۆبەری2017 كاتێك كوردستان دیسانەوە؟! كەوتە بەر پیلانی ناوخۆیی و ئیقلیمی و جیهانی وەكو لەخاچدانی مهاباد و رێككەوتنی جەزائیر 1974، دیسانەوە؟! مێژوو دەیویست خۆی دووبارە بكاتەوە، لەو هەلومەجەدا رێزدار نێچیرڤان بارزانی سەرۆكی حكوومەتی ئەوسای هەرێمی كوردستان،هاوكات لەگەڵ خەبات و بەرگری برا پێشمەرگەكانی لە پردێ و مەحمودیە و سحێلا…، شانی خستە ژێر خەبات و چالاكی دیپلۆماسی بۆ پاراستنی كوردستان و هاوشێوەی هەڤاڵە پێشمەرگەكانی سەركەوتووانە قۆناغەكەی تێپەڕاند.
ئینجا پاش ئەوەی بەسەرۆكی هەرێمی كوردستان هەڵبژێرا، ئەمڕۆ رێزدار نێچیرڤان بارزانی شارەزایەنە و بەشێنەیی دەستی كردووە بە راییكردنی ئەركە قورسەكانی. بێگومان ئەركە قورسەكانی نێچیرڤان بارزانی بریتین لە چەند قەیرانێكی كەڵەكەبووی ساڵانی رابردوو كە بە چەند ئەجیندای جۆراوجۆری ناوخۆیی و ئیقلیمی و نێودەوڵەتی پەنگیان خواردووە. بۆ نموونە كێشەكانی نێوان كوردستان و عێراق (ماددەی 140، چۆنیەتی هەناردەكردنی نەوتی كوردستان و قەرزە كەڵەكەبووەكانی سەر كوردستان و مووچە و پاشەكەوتی فەرمانبەران و بوودجەی كوردستان و پێشمەرگە و پەیوەندییەكان…هتد) هەموو ئەمانە تەنها بەشێكن لە ئەركە قورسەكانی نێچیرڤان بارزانی، ئێستاش چارەسەری ئەم كێشانە ئەركی هەنووكەیی نێچیرڤان بارزانین. لەم رووەوە و بۆ چارەسەركردنی كێشەكان، نێچیرڤان بارزانی.. عێراقی فیدڕاڵ بە (عومقی ستراتیجی) بۆ كوردستان دەبێنێ كە دەكرێ ئاشتیانە و بە گفتوگۆ لە چوارچێوەی دەستووری عێراقدا هەموو ئەو كێشانە لەگەڵ بەغدا چارەسەر ببێت، بۆیە یەكەم چالاكی نێچیرڤان بارزانی پاش هەڵبژاردنی بە سەرۆكی هەرێم، گەشتی بەرێزیان بوو بۆ بەغدا رۆژی پێنجشەممەی رابردوو 20ی حوزەیران، بێگومان ئەم گەشتەی بەرێزیان متمانە و دڵنیایی بە دەسەڵاتدارانی عێراق بەخشی كە هەولێر (خودی نێچیرڤان بارزانی) بەجدیی نیازی چارەسەركردنی كێشەكانی هەیە لە چوارچێوەی دەستووری فیدڕاڵی كە لە 15ی تشرینی دووەمی 2005 هەموو خەڵكی عێراق دەنگی لەسەر داوە. ئەمەش هیوا و ئاسوودەیی و ئارامی بە خەڵكی كوردستان و تەواوی عێراق بەخشی.
دواتر. واتا رۆژی پاشتر هەینی 21ی حوزەیران، نێچیرڤان بارزانی رووی كردە توركیا، وێدەچی كە پلان و ئەركەكانی نێچیرڤان بارزانی هەر عێراق و ماددەی 140 چۆنیەتی هەناردەكردنی نەوتی كوردستان و قەرزە كەڵەكەبووەكانی سەر كوردستان و مووچە و پاشەكەوتی فەرمانبەران و بوودجەی كوردستان و پێشمەرگە و پەیوەندییەكان)نەبێت، بەڵكو ئاماژە بە هەوڵ و لێدوانی بەرێزیان بۆ چارەسەركردنی كێشەی كورد لە توركیا بە دیالۆگ و ئاشتیانە، خواست و ئەرك و پلانی بارزانی بن، پێموایە ئەمەش تەوەرێكی دیكەی دیپلۆماسییەت و خەمخۆری رێزدار نێچیرڤان بارزانی بێت وەكو سەرۆكی هەرێمی كوردستان لە چارەسەری ئاشتیانەی دۆزی كورد لە باكوور و باشوور و رۆژهەڵات و رۆژئاوا. شایانی باسە بێجگەلەمەش برەودان بە پەیوەندی دۆستانە و دیپلۆماسی و ئابووری كوردستان و توركیا وەكو دەروازەیەكی كورستان بەرووی دەرەوە، تەوەرێكی سەرەكی گەشتی نێچیرڤان بارزانی بووە بۆ توركیا.
بەم شێوەیە نێچیرڤان بارزانی بێجگە لەوەی كاراكتەرێكی كاریگەری سیاسی كوردستان و عێراقە، هەروەها كارێكتەرێكی كاریگەرە لەستراتیجیەتی سیاسی و دیپڵۆماسی كوردستان و وڵاتانی دراوسێش. بۆیە هیوای سەركەوتن بۆ جەنابی كاك نێچیرڤان بارزانی دەخوازین لە كار و چالاكییە سیاسی و دیپلۆماسییەكانی سەركەوێت.
