شاخەوان عەبدوڵڵا، ئەندامی پێشووی پەرلەمانی عێراق، كە هاوكات ئەندامی لیژنەی ئاساییكردنەوەی دۆخی كەركووكە، رایدەگەیەنێت بۆ كۆتاییهێنان بە داعش لە كەركووك، پێویستە لەناو باڵەخانەی پارێزگاوە دەستپێبكرێت، ئێستا داعش لەنێو پارێزگای كەركووكدایە و دەستیان بەسەر هەندێك جومگەی ئەمنیی ناو پارێزگاكەدا گرتووە. گوتیشی: دەرگای كەركووك بە ڕووی توندئاژۆكان كراوەتەوە، كە بووەتە هۆی زیادبوونی كردەوەی توندوتیژی.
شاخەوان عەبدوڵڵا لە گفتوگۆیەكیدا لەگەڵ باس لەبارەی هەوڵەكانی پارتی دیموكراتی كوردستان بۆ ئاساییكردنەوەی دۆخی كەركووك، رایگەیاند: هەوڵەكان بەردەوامن؟ لەو چوارچێوەدا پارتی لە كۆمەڵێك لاوە هەوڵی ئاساییكردنەوەی كەركووك دەدات و هەوڵەكانیش هەنگاوی باشیان بڕیوە. سەبارەت بە هۆكاری زۆریی جموجۆڵەكانی داعش لە دەوروبەری كەركووك، ئەو ئەندامەی پێشووی پەرلەمانی عێراق، گوتی: هەمان ئەو هێزەی داعشی هێنا و ناوچە سوننییەكانی ڕادەستی ئەو تیرۆریستانە كرد بۆ وێرانكردنی، هەمان ئەو هێزە ئێستا لە ناوچەكەدان و ئەو كاتە بە كەسانی خۆفرۆشەوە كردەوەكانیان دژ بە هاووڵاتییان دەكرد، بەڵام ئێستا خۆیان لەناو كەركووكن، جاران داعشی دەهێنا و ئێستا سەروەتی ئەو ناوچانە بە سووتاندنی ماڵ و موڵك و زەویی خەڵكەكە لەناو دەبات.
سەبارەت بە هەڵبژاردنەكانی ئەنجوومەنی پارێزگاكان، ئەوەی خستەڕوو، ئێمە لەگەڵ هەڵبژاردنداین، بەڵام هەڵبژاردنێك بەو شێوەیەی ئێستا نا، كە كەركووك بە بارودۆخێكی نائاساییدا تێدەپەڕێ، جگە لەوەی هەندێ رێكار لە ژمارە 12ی یاسای هەڵبژاردنی بۆ ساڵی 2018 هەندێك بابەتی تردا هەیە، كە پێویستە بكرێ، ئەویش ئاساییكردنەوەی دۆخی كەركووك و گەڕانەوەی ئاوارەكان و كردنەوەی بارەگاكانی پارتی و گەڕانەوەی شكۆیە بۆ تاكی كورد لە كەركووك، ئەوكاتە هەڵبژاردن بكرێت، ئێمە وەكو كورد بێ منەتین لە هەڵبژاردن، پێمانوایە هەر كاتێك هەڵبژاردنێكی ئازاد لەو شارە بكرێ، زۆرینەی ئەو شارە هەر كوردە و دەنگ دەدات.
شاخەوان عەبدوڵڵا، باسی لەوەشكرد كە تەعریبكردنەوەی كەركووك بەردەوامە و گوتی: تەعریب بە كۆمەڵێك قۆناخ كراوە و دەكرێت، رێگەیان بە كۆمەڵێك عەرەب داوە و بە فەرمی لە بەغداوە نفووسیان بگۆڕن بۆ كەركووك، بە نموونە لە ناوچەی سەقڵاوییەی سەر بە بابل، خەڵك هاتووە بۆ كەركووك و نفووسی گواستووەتەوە بۆ كەركووك، كە ئەوەش ئامانجی تائیفیی لەپشتە و سەقڵاوییەیان لە سوننە پاك كردەوە و رێگەیان نەدا بگەڕێنەوە زێدی خۆیان، كەچی ئەوانیان هێناوە بۆ كەركووك، كە دوو ئامانج دەپێكێ، یەكەمیان بۆ زیادكردنی رێژەی عەرەبە و دووەمیان پاككردنەوەی بابلە لە سوننە، لایەكی ترەوە كارتی زانیاریی بۆ عەرەبە هاوردەكان دەردەكرێت، كە ئەوەش دەبێ هاووڵاتیی ئەو شارە بێت تا كارتی زانیاریی بۆ دەربكرێت، بەڵام ئێستا ئەوەی لە كەركووك دەكرێت نایاساییە، جگە لەوەش مۆڵەتیان بە هەندێك خێزانی عەرەب داوە فۆرمی خۆراكیان بگوازنەوە بۆ كەركووك، ئەمانە هەمووی بەشێكن لە تەعریب، هەروەها عەرەبە هاوردەكان دەگەڕێنەوە سەر زەویی كشتوكاڵیی كوردان لە سنووری كەركووك و كێشە بۆ جووتیارانی كورد دروست دەكەن.
