سەلام عەبدوڵڵا
ماوەیەكە بە شێوەیەكی بەرفراوان و بەرنامەیەكی داڕێژراو، زۆر دڕندانە تەنگ بە جوتیارانی كورد و دانیشتوانی سنووری ماددەی(140) هەڵدەچنرێ و هەوڵ دەدرێ كە كورد لە زێدی باب و باپیری خۆی ناچار بكرێ گوندەكانی بۆ عەرەبی هاوردە، بەجێ بهێڵێ كە لەدوای شانزەی ئۆكتۆبەر زۆر بەخێرایی، بۆ تەعریبی یەكجارەكی ئەو ناوچانە، بەڕێوەدەچێت كە پارێزگاری بە بەوەكالەتی سەپێندراو لە كەركووك رۆژانە سەرپەرشتی دەكات و زەمینەسازی بۆ دەكات و دەیەوێت بیخاتە قاڵبی یاساییەوە، گوایە ئەو عەرەبە هاوردانە ئەو زەوییانەیان لە زەمانی سەدامدا لەسەر تاپۆكراوە و دراوەتە ئەوان، ئەمەش پاساوێكی زۆر بێ مانا و دژ بە یاسایە، چونكە گەر بەو لۆژیكە بوایە دەبوو هەموو ئەو زەویانەی نازییەكان لەشەڕی دووەمی جیهانیدا داگیریان كردبوون ئێستا ئەڵمانیا داوای بكردنایەتەوە و بە موڵكی ئەڵمانی بزانیبایە.
ئەو گۆڕینە دیموگرافییەی لە كەركووك و دەوروبەریدا ڕوویدا لە زەمانی دیكتاتۆر سەدامدا مەبەستی جێگیركردنی عەرەب بوو لەو ناوچانە، بەو هیوایەی، لەسەرژمێرێكدا بەیاسا ئەو ناوچانە بە موڵكی عەرەب لە قەڵەم بدرایە، بەڵام ڕژێمی سەدام فریای ئەو پیلانە نەكەوت كە ئێستا پارێزگاری بەوەكالەت سەپێندراوی كەركووك و عەرەبە شۆڤێنییەكان ڕۆژانە لە هەوڵدان بۆ جێبەجێكردنی.
ئەو عەرەبە هاوردانە، پاش ڕووخانی دیكتاتۆریەت لە عێراقدا، هەموو بەمەبلەغی باش قەرەبوو كرانەوەو بەویستی خۆیان ئەو ناوچانەیان بەجێهێشت، چونكە ئەو ڕاستیەیان دەزانی كە ئەو ناوچانە خاكی ئەوان نییەو موڵكی، بە تاپۆی عوسمانی، هی كوردە، بەڵام ئێستا كە تەرازووی هێز لەو ناوچانە دوای شانزەی ئۆكتۆبەر گۆڕاوە و پێشمەرگە لەو ناوچانە نەماوە جارێكی تر هەموو ئەوانە گەڕاونەتەوە بۆ ئەو ناوچانەو لەڕێی سوتاندنی عەمدی گەنم و خەلەی جوتیارانی كورد، دەیانەوێ دانیشتوانی ئەو ناوچانە ناچاربكرێن كە بۆ عەرەبی هاوردەی بەجێبهێڵن و ئەم تاوانەش دەخەنە ملی داعش كە لەڕاستیدا ئەو كارە قێزەونە هەر خۆیانن نەك كەسی دیكە.
ئەم پیلانەش وەكو هەموو پیلانەكانی تر بۆ تەعریبی كەركووك بەهیمەتی دڵسۆزان و پێشمەرگە قارەمانەكانی گەلەكەمان لە گۆڕ دەنرێن، چونكە مادەیەكی دەستووری ئاشكرا هەیە كە مادەی ( 140) ڕێوشوێنی یاسایی بۆ دانراوە – هەرچەند تا ئەمڕۆ لەمپەری دەخرێتە بەردەم- بەڵام دەبێ هەر جێبەجێ بكرێ.
