خەبات ــ ن. دهوك
رێكخراواPWJ بایێ ئاشتیێ یا ژاپونی ل سالا1996 قەستا كوردستانێ و دهوكێ كریە و دبیاڤێن تەندورستی وپ ەروەردەیی و ئاڤ و ئاڤ ڕێژ و كارەب و ڕێك و هاریكاریكرنا ئاوارە و پەنابەران و گەلەك بیاڤێن دی خزمەتكریە و هەتا نوكە یا بەردەوامە ل سەر بەرنامێن خو یێن مروڤایەتی ل سنورێ پارێزگەهێ.
ل دور نوترین كار و پروژێن ڕێكخراواPWJ یا ژاپونی ل سنورێ پارێزگەهێ فەرسەت خلیل ڕەشید ڕێڤەبەرێ كارگێری ل ڕێكخراواPWJ یا ژاپونی ل دهوكێ بو ڕوژنامەیا خەبات گوت: نوترین پروژێن مە چێكرنا پروژێ كارەبێ و ڕێكا كەمپا دومیز ئێك و دوو و كەمپا گەویلان هەروەسا چێكرنا شەنگستێن خیڤەت و خانیا ل كەمپێن دومیز ئێك و دومیز دوو و ل بالقوسێ و ئاڤ ڕێژەكا سندوقی ژی ل كەمپا حوسەینیێ هاتیە دورستكرن.
سەبارەت خزمەتێن تەندورستی ڕێڤەبەرێ كارگێری ل ڕێكخراواPWJ یا ژاپونی گوت: هەر ساڵ ئەم خزمەتێن تەندورستی پێشكێشی قوتابیێن چار هەتا پێنچ كەمپا دكەین ل 2018ێ ئەڤ خزمەتێن تەندورستی مە بو قوتابیێن كمپێن باجد كەندالا ئێك و باجد كەندالا دوو و كەبەرتو ئێك و كەبەرتو دوو و كەمپا داودیێ و ل هەیڤا نەه2019 ئەڤی پروژەی تەندورستی دێ بو قوتابیێن كەمپێن ئیسیان، ماملیان، مامرەشان، شێخان، گەرماوا ئامادەكەین ئەڤ پروژێن تەندورستی ب هەڤكاری دگەل ڕێڤەبەریا گشتی یا ساخلەمیا دهوكێ دهێتە ئەنجامدان ئەو نوشدارێن دەڤ وددانا بو مە ل ناڤ وان كەمپا دابیندكەن و ئەمژی بەرامبەر وان خزمەتان كوژمەكێ پارەی بو دابیندكەین هەروەسا مە خولێن مەشق و ڕاهێنانێ بو ماموستایێن وان كەمپا ڤەكرینەبو وێ یەكێ كارێ وان پێشبێخین و بەردەوام پێدڤیێن تەندورستی وەكو سابون و فرشە و مەعجونێ ددانا ل سەر قوتابیێن وان كەمپا بەلاڤ دكەین و ئەوێن ددانێن وان دكرمی یان چاڤێن وان دنەخوش ئەم هاریكاریا وان دكەین ئەوژی ئەم پارەی ددەینە نوشدارا ل نورینگەهێن تایبەت چارەسەریا ددان وچاڤێن وان دكەین.
سەبارەت كەرتێ پەروەردێ فرست خەلیل گوت: مە قوتابخانەكا13 پولی ل گوندێ فازلیێ ل باشیكێ ئاڤاكریە و قوتابخانەكا دی ل ناڤ باشیكێ ل سنورێ پارێزگەها نەینەوا نوژەنكریە دگەل ڕاكێشانا تورا كارەبێ بو نەه گوندێن دەروبەرێن باشیكێ هەروەسا مە فیدەرەكێ كارەبێ كێشایە كەمپا ئیسیان وكار ب دوماهی هاتیە ول هەیڤا بهێت دێ دەست ب كێشانا فیدەرەكێ كارەبێ بو كەمپا شاریا كەین.
سەبارەت خزمەتكاریێن دی ڕێڤەبەرێ كارگێری یێ ڕێكخراواPWJ یا ژاپونی گوت: ئەڤ سالە مە جلكێن نوو ل سەر پتر ژ7300 كەسان ل كەمپا گەویلان بەلافكرینە هەروەسا هەر سال گازا سپی ل سەر قوتابخانێن كەمپێن ئاوارە وپەنابەران بەلافدكەین زێدەباری بەلافكرنا گازا سپی ل سەر خێزانێن دەست كورت ل جهێن جودا جودا ل پارێزگەهێ، دبیاڤێ ئاڤێ دا مە تانكەرەكێ نمونەیی یێ مەزن كو شیان هەنە 126 مترێن سێ جار ئومباركەت دگەل دانانا تورێن ئاڤێ ل دومیز دانایینە.
ل دور پروژێن پاشەروژێ یێن ڕێكخراواPWJ یا ژاپونی ناڤبری گوت: ڕێكخراوا مە دێ یا بەردەوامبیت ل سەر ئەنجامدانا پروژێن خو ودهەموو بیاڤێن خزمەتكرنێ دا مە لبەرە ئەڤ سالە قوتابخانەكا دی ل باشیكێ ئاڤاكەین هەروەسا پروژێن ئاڤێ ل دەڤەرێن بەرتڵلە وحەمدانیێ وشنگال وزومار چێكەین ودێ بەردەوامیێ دەینە پروژێن خو یێن مروڤایەتی ل ناڤ كەمپێن ئاوارە وپەنابەران.
