نادر ڕۆستی، وتەبێژی دەستەی گەشتوگوزاری حكوومەتی هەرێمی كوردستان، بە ماڵپەڕی فەرمیی پارتی دیموكراتی كوردستانی ڕاگەیاند: تا دووەم ڕۆژی جەژن كە ئاماری فەرمیمان لایە 145 هەزار گەشتیار هاتوونەتە كوردستان، لە ڕۆژانی ئایندە ئاماری كۆتایی بڵاو دەكەینەوە، كە پێشبینیمان ئەوەیە ڕێژەی گەشتیاریی جەژنی ئەمساڵ لە ساڵی ڕابردوو زیاتر بێت.
نادر ڕۆستی گوتیشی: ئەو گەشتیارانەی ئەمساڵ ڕوویان لە كوردستان كردووە لە وڵاتانی توركیا و ئێران و خواروو و ناوەڕاستی عێراقەوە هاتوون. گەشتیاری وڵاتانی عەرەبی و بیانی دێنە كوردستان و پلانمان هەیە ڕێژەی هاتنی گەشتیاری وڵاتان زیاد بكەین.
وتەبێژی گەشتوگوزار گوتیشی: چاوەڕوان دەكەین ڕێژەی هاتنی گەشتیار لە وڵاتانی توركیا و ئێرانەوە زیاتر ببێت، بەتایبەت ئێستا ڕسوومات لەسەر ئەو گەشتیارانەوە نەماوە كە لە وڵاتی ئێرانەوە دێن، پلانی تایبەتمان هەیە قۆناخ بە قۆناخ جێبەجێمان كردووه، ساڵانەش ڕێژەی گەشتیار بۆ كوردستان زیاد دەكات.
ناوبراو دەشڵێ: داوا لە حكوومەتی هەرێم كابینەی نوێ دەكەین، بودجەی زیاتر بۆ كەرتی گەشتوگوزار دابین بكات، تاوەكو باشتر بتوانین ئەو پلان و بەرنامانەی هەمانە جێبەجێیان بكەین، كە كوردستان ناوچەیەكی سروشتیی جوانی هەیە و دەتوانین پەرە بە گەشتوگوزار بدەین.
قایمقامی هەولێر: لەماوەی شەش ڕۆژی ڕابردوو زیاتر لە 46 هەزار گەشتیار هاتوونەتە هەولێر
قایمقامی قەزای ناوەندی هەولێر ڕایگەیاند: لەماوەی شەش ڕۆژی ڕابردوو زیاتر لە 46 هەزار گەشتیار هاتوونەتە هەولێر، بەوەش ڕێژەی گەشتیاران بەراورد بە ساڵانی ڕابردوو زیادیكردووە.
نەبەز عەبدولحەمید، قایمقامی هەولێر بە تۆڕی میدیایی ڕووداوی ڕاگەیاند: لەماوەی شەش ڕۆژی ڕابردوو، جگە لە فڕۆكەخانەكان 46 هەزار و442 گەشتیار لە ڕێگەی دەروازە سنووریەكانەوە هاتوونەتە شاری هەولێر.
گوتیشی: ڕێژەی هاتنی گەشتیاران بەراورد بە ساڵانی ڕابردوو زۆرترە و هەموو ئاسانكاریەكیش بۆ هاتنی گەشتیاران كراوە.
نەبەز عەبدولحەمید، باسی لەوەشكرد لیژنەی تایبەت بە گەشتیاران پێكهێنراوە، شوێنی حەوانەوەیان بۆ دابینكراوە و چاودێری ئەو هۆتێلانەش دەكرێت گرێبەستیان لەگەڵ گەشتیارەكان كردووە بۆئەوەی بزانرێت تاوەكو چەند پابەندی گرێبەستەكانیانن.
لە دوو ڕۆژی جەژن نزیكەی15 هەزار گەشتیار سەردانی دهۆكیان كردووە
لە چەند ڕۆژی ڕابردوو ژمارەیەكی بەرچاو لە گەشتیاران لە بەشەكانی كوردستان، ناوەڕاست و خوارووی عێراق سەردانی ناوچە گەشتیارییەكانی پارێزگای دهۆكیان كردووە.
نایف ڕەمەزان، پەیامنێری ڕووداو لە دهۆك ڕایگەیاند: لە دوو ڕۆژی سەرەتای جەژنی ڕمەزاندا نزیكەی 15 هەزار گەشتیار سەردانی ناوچە گەشتیارییەكانی پارێزگای دهۆكیان كردووە، كە 80%یان لە ناوەڕاست و خوارووی عێراق و 20%یشیان گەشتیارانی نێوخۆیی و ئەوانە بوونە كە لە دەروازەكانەوە هاتوونەتە پارێزگای دهۆك.
پەیامنێری ڕووداو دەڵێ: پێشبینی دەكرێت ئەمساڵ ڕێژەی گەشتیار لە سنووری پارێزگای دهۆك 25-30% زیاد ببێت، بەڕێوەبەرایەتی گشتی گەشتوگوزاریش كار لەسەر زیادبوونی ڕێژەی گەشتیاران دەكات، ساڵی ڕابردوو 400 هەزار گەشتیار چوبوونە پارێزگای دهۆك، ئەمساڵیش كاردەكرێت بۆ ئەوەی ژمارەكە بۆ 500 هەزار بەرزبكەنەوە.
بەڕێوەبەری گەشتوگوزاری سۆران: لە سێ رۆژی رەمەزاندا هیچ رووداوێكی نەخوازراو لەناو گەشتیاراندا نەبووە
بەڕێوەبەری گەشتوگوزاری سۆران، ئاشكرایی دەكات، لە ڕۆژانی جەژنی ڕەمەزاندا بە دەیان هەزار گەشتیار سەردانی شوێنە گەشتیارییەكانی دەڤەرەكەیان كردووەو ڕێژەكەش لە بەرزبوونەوەدایە.
بارزان محەمەد، بەڕێوەبەری گەشتوگوزاری سۆران، بە باسنیوزی ڕاگەیاند، پلانێكی ڕێك و پێكمان بە هەماهەنگی خاوەن شوێنە گەشتیارییەكان و لایەنە پەیوەندیدارەكانی سنورەكەمان دارشتووە، بۆ پێشوازیكردن لە گەشتیاران، كە تەنها لە ڕۆژانی جەژندا زیاتر لە 20 هەزار گەشتیار ڕوویان لەشوێنە گەشتیارییەكانی سنورەكەمان كردووەو پێشبینی دەكەین تا كۆتایی ڕۆژەكانی پشووی جەژن ڕێژەی هاتنی گەشتیاران بۆ زیاتر لە 35 هەزار گەشتیار بەرزببێتەوە.
گوتیشی: ئەوەی جێگەی خۆشحاڵییە تا ئێستا هیچ ڕووداوێكی ناخۆش تۆمار نەكراوەو گەشتیاران گەشتێكی خۆش و ئارامیان بەسەر بردووە، دەستخۆشیش لە هێزە ئەمنییەكان و پۆلیسی هاتوچۆ و گشت خەمخۆران دەكەین كە بەردەوام لە خزمەت و ئەركدان بۆ ڕێكخستن و پێشوازیكردن لە گەشتیاران.
