خه‌بات: عەلی بانیشاری
وتەبێژی فراكسیۆنی پارتی لە پەرلەمانی كوردستان دەڵێت: بەحكومی ئەوەی بەڕێز نێچیرڤان بارزانی كاندیدی پارتی و یەكێتی و گۆڕان و پێكهاتەكانە و هەموو ئەو لایەنانەیە كە رێككەوتنامان هەیە لەگەڵیان بۆ پێكهێنانی حكوومەت چاوەڕوان دەكەین زیاتر لە 90 دەنگی پەرلەمانتاران بەدەست بهێنێت. لەبارەی رووبەڕووبوونەوەی گەندەڵی لەم خولەی پەرلەماندا؟ پێشەوا هەورامانی دەڵێت: چاوپۆشی لە گەندەڵی هیچ كاربەدەستێكی حكوومەت ناكەین، ئەگەر وەزیرێك یان كاربەدەستەكە پارتیش بێت.
وتەبێژی فراكسیۆنی پارتی لە پەرلەمانی كوردستان بەخەباتی راگەیاند” لەم هەفتەیەدا كۆبوونەوەی پەرلەمانی كوردستان دەكرێت و كاندیدی سەرۆكی هەرێم بە غیبابی هەڵدەبژێردرێت، پاش هەڵبژاردنی سەرۆكی هەرێم ماوەیەك دیاری دەكرێت بۆ ئەوەی بێتە پەرلەمان و سوێند بخوات”. سەبارەت بە رێكەوتنی لایەنەكان لەسەر دەنگ بە بەڕێز نێچیرڤان بارزانی؟ پێشەوا هەورامانی گوتی” بەڕێز نێچیرڤان بارزانی كاندیدی پارتی و یەكێتی و گۆڕان و پێكهاتەی توركمان و مەسیحیەكانە بۆ سەرۆكی هەرێم كوردستان و پێشتر رێكەوتن لەوبارەیەوە كراوە و ئەو لایەنانە وتوویانە كە بەڕێز نێچیرڤان بارزانی تەنها كاندیدی پارتی نییە”.
ناوبراو گوتیشی” بەپێی رێكەوتنی پارتی لەگەڵ لایەنەكان، چاوەڕوان دەكەین بەڕێز نێچیرڤان بارزانی زیاتر لە 90 دەنگی پەرلەمانتاران بەدەست بهێنێت، ئەو دەنگانەی دیكەش كە دەمێننەوە لەگەڵ دەنگدان نین بە بەڕێز نێچیرڤان بارزانی.
لەبارەی چوار كاندیدەكەی دیكەی بۆ پۆستی سەرۆكی هەرێم؟ هەورامانی گوتی: ئەوانەی خۆیان كاندید كردووە بۆ ئەو پۆستە و هاتوونەتە ناو پرۆسەیەكی وەها دەزانن ئەنجامەكەی چۆنە، بۆیە پێموایە ئەوە پێی ناوترێت منافەسە، ئەگەر ئەو كاندیدانە 40-50 دەنگی پەرلەمانتارانیان بەدەست بهێنایە ئەوكات ناوی لێدەنرا منافەسە”.
سەبارەت بەكاتی پێكهێنانی كابینەی نوێ؟ وتەبێژی فراكسیۆنی پارتی لە پەرلەمانی كوردستان دەڵێ” دوای دەستبەكاربوونی سەرۆكی هەرێم، كاندیدی سەرۆكی حكوومەت رادەسپێردێت بۆ ئەوەی لەماوەی 30 رۆژدا كابینەكە پێكبهێنێت.
پێشەوا هەورامانی پێی وایە كەمتر لەو 30 رۆژە حكوومەت پێكدەهێنرێت. لەبارەی رادەستكردنەوەی پۆستی سەرۆكی پەرلەمان بە یەكێتی نیشتیمانی كوردستان؟ وتەبێژی فراكسیۆنی پارتی گوتی” یەكێتی كەی خۆیان یەكلایكردەوە و كەسێكیان بۆ ئەو پۆستە دیاریكرد، بێگومان ئێمە ئامادەین پۆستی سەرۆكی پەرلەمانیان بدەینەوە، پارتی ئەو پۆستەی وەرگرتووە تا ئەو كاتەی یەكێتی دێتە پێشەوە و كاندیدی خۆی دیاری دەكات”.
لەوەڵامی ئەو پرسیارەی كە تا چەند پەرلەمانتاران لەم خولەدا لێپرسینەوە لە كاربەدەستانی حكوومەت دەكەن؟ پێشەوا هەورامانی گوتی: چاوپۆشی لە هیچ گەندەڵییەك ناكەین و سەرۆكایەتی پارتی و خودی جەنابی سەرۆك و كاك مەسروور بارزانیش لە كاتی دانیشتنیان لەگەڵ پەرلەمانتارانی فراكسیۆنی پارتی لە پەرلەمانی كوردستان دەستكراوەیان كردووین لەوەی كە چاوپۆشی لە هیچ جۆرە گەندەڵییەك نەكەین و پەنجە بخرێتە سەر كەموكوڕییەكان.
وتەبێژی فراكسیۆنی پارتی لە پەرلەمانی كوردستان گوتیشی: ئەگەر وەزیرێك یان كاربەدەستێكی حكوومەت گەندەڵی هەبێت و پارتیش بێت بێگومان چاوپۆشی لێ ناكرێت و لێپرسینەوەی لەگەڵدا دەكرێت.
