خەبات: عەلی بانیشاری
مۆزەخانەكە لەسەر رووبەری 45.5 مەتر دروستكراوە. لە نێویدا 120 جۆر مین و تەقەمەنی و كەلوپەلی بەكارهاتووی داعش هەن، كە سەردانی هۆڵی مۆزەخانەكە دەكەیت زیاتر بۆت روون دەبێتەوە ئەو رێكخراوە تیرۆریستییە لەماوەی حكوومڕانیدا چ تەكنیكێكی لە شەڕدا بەكارهێناوە، وەكو فەرماندەی ئەندازەی هێزەكانی پشتیوانی یەك و سەرپەرشتیاری مۆزەخانەی بۆمبە دروستكراوەكانی داعش لە كۆڕێ دەڵێت: داعش بۆ دروستكردنی مین و چەك و تەقەمەنیەكان سوودیان لە كەسانی شارەزای دانیشتووی موسڵ بینیووە و بەشێك لە بۆمبەكانیش بەو كەسانە دروستیان كردووە كە لە ناوچەی پیشەسازی موسڵ كاریان كردووە.
بەسەیركردنێكی مۆزەخانەكە ئاشنا دەبیت بەوەی داعش بۆ دروستكردنی مین و تەقەمەنی و جۆرەكانی تیئێنتی سوودیان لە بۆڕی نەوت، بتڵی غاز، دەبەی پلاستیك، مەنجەڵی خواردن دروستكردن، بۆڕی ئاگركوژێنەرەوە و چەندین كەرەستەی دیكە بینیووە.
لیوا حسین كاكەیی، فەرماندەی ئەندازەی هێزەكانی پشتیوانی یەك و سەرپەرشتیاری مۆزەخانەی بۆمبە دروستكراوەكانی داعش لە كۆڕێ دەڵێت: لەسەرەتای شەڕی داعش خەریكی پووچەڵكردنەوەی بۆمب بووین، كە چەكی سەرەكی داعش بوو، لەگەڵ فارماندەكانی ئەندازە بڕیارماندا دیكۆمێنتكردنی بۆمب و چەك و جۆرەكانی دیكەی تەقەمەنی بكەین، كە پاشماوەی داعش بوون، بڕیاری ئەوەشماندا كە هەموو ئەو كەلوپەل و كەرەستە بەكارهاتووانەی داعش كۆبكەینەوە لە جێگایەك كە دووری كۆگاكانی خۆمان، لەبەر ئەوەی سەرچاوەی ئەو كەلوپەلانە دیار نییە و نازانین چۆن مامەڵەی لەگەڵدا دەكەین.
ئەو گوتیشی: پاش كۆكردنەوەی كەلوپەلەكان لە شوێنێك دانران تا شەڕی داعش تەواو بوو، دواتر هەندێك زانیاریمان كۆكردەوە و لە دووتوێی 100 لاپەڕەدا بۆ سەرەوەی خۆمان بەرزكردەوە، پاش گفتوگۆكردن و پرس و راوێژ بە جەنابی فەرماندەی فەرماندەیمان سیهاد بارزانی بڕیاردرا لە سەرەتای 2016 تا كۆتایی 2018 لەناو بینای كەتبەی ئەندازەی فەرماندەی هێزەكانی پشتیوانی یەك بینایەك بۆ مۆزەخانەیەك كە تایبەت بێت بە بۆمبە چێنراوە دروستكراوەكانی داعش دروست بكەین و بۆمب و تیئێنتی و كەرەستە بەكارهاتووەكانی داعشی تێدا نمایش بكەین.
لیوا مەحمود حسین كاكەیی دەشڵێت: لەم قۆناغەدا تەنها ئەندامانی هێزە ئەمنییەكان دەتوانن سەردانی مۆزەخانەكە بكەن ئەوەیش بۆ ئەوەی زیاتر ئاشاببن بە تەكنیكی داعش و ئەو كەرەستە و كەلوپەلانەی كە لە شەڕدا بەكاریان هێناوە.
ناوبراو باس لەوەشدەكات مۆزەخانەكە بچووكە و پێویستی بە رووبەری زیاتر هەیە، بەڵام سەرەتا وەكو هەنگاوێك پێیان باشبووە بەشێك لەو كەرەستانەی داعش كە خۆیان پوچەڵیان كردووەنەتەوە نماشی بكەن و هێزەكانی پێشمەرگە و ئەفسەران سوودی لێبینن”.
مۆزەخانەی بۆمبە دروستكراوەكانی داعش بەفەرمی لە 29/3/2019كراوەتەوە. وەكو لیوا مەحمود كاكەیی باسی دەكات ئەگەر بودجە هەبێت پلانی گەورەكردنی مۆزەخانەكە و رێكوپێكردنیمان لە داهاتوودا هەیە.
فەرماندەی ئەندازەی هێزەكانی پشتیوانی یەك دەڵێت: كەتیبەی ئەندازەییمان توانیوویانە بەدرێژی 700 كیلۆمەتر لە شنگاوە تا رۆژئاوای كەركوك لە مین و تەقەمەنی پاك بكەنەوە، ئەوەیش هەوڵ و ماندوونێكی زۆری ویستووە و چەندین شەهیدی برینداریشی لێكەوتووەتەوە.
ناوبراو ئاماژەی بەوەشدا سەرەتا داعش بۆ دروستكردنی تیئێنتی سوودی لە بۆڕی نەوت گواستنەوە وەرگرتووە، دواتر لەناوچەی پیشەسازی موسڵ مین و تەقەمەنیەكانیان دروستكردووە كە شێوەی كاشی كە 5-7 كیلۆ تیئێنتی تێدا بووە، دوای ئەوە سوودیان لە مەنجەڵی خواردن دروستكردن بینووە و پاش ئەوەیش بۆڕی ئاگركوژێنەرەوەیان بۆ دروستكردنی تیئێنتی بەكارهێناوە.
لیوا مەحمود حسین كاكەیی دەشڵێت: رێكخراوی تیرۆریستی داعش سوودیان لە دەبەی پلاستیكی بینووە و تیئێنتیان لەناو داناوە، چونكە پلاستیك بەرگەی ساردی و گەرمی دەگرێت و بۆ ماوەیەكی زۆریش دەمێنێتەوە، ئەمە بێ لە دروستكردنی مینی دژە تانك.
ئەو فەرماندەیە دەڵێت: داعش زۆر تەكنیكی بەكارهێناوە، ئامانجیشی ئەوە بووە كە كەتیبەكانی ئەندازە تووش بكات، چونكە ئەگەر ئەندازە مین و تەقینەوەكان پوچەڵ نەكاتەوە هیچ هیزێك ناتوانێت پێشڕەوی بكات.
هەروەها دەشڵێت: ئەو یەكانەی ئەندازە كە لە درێژایی ئەو 700 كلیۆمەترە كارمان دەكرد شەو و رۆژ زانیاریمان ئاڵوگۆڕ دەكرد و هەر شتێكی نامۆمان ببینایە یەكترمان لێ ئاگادار دەكردەوە، خۆشبەختانە كاری زۆر باشمان كردو توانیمان كارەكان بە رێكوپێكی ئەنجام بدەین.
لیوا مەحمود حسین كاكەیی باس لەوەشدەكات لەسەرەتای شەڕی تیرۆردا زانیارییەكی ئەوتۆیان لەسەر تەكنیكی داعش نەبووە، هەروەها كەرەستە و كەلوپەلی پێویستیان بۆ ئەنجامدانی كارەكەیان لە بەدەست نەبوو، هەر ئەوەیش بووە هۆی شەهیدبوون و برینداربوونی چەند ئەفسەر و پێشمەرگەیەكی قارەمان، بەڵام دواتر و پاش پەیوەندییان لەگەڵ هێزەكانی هاوپەیمانان و مەشق و راهێنان شارەزاییەكی باشیان لەسەر تەقینەوەكان پەیداكرد، ئەو گوتیشی: لەئێستادا ئەگەر هەر رووداوێك رووبدات هیچ مەترسیەك لەسەر تیمەكانمان نییە و دەتوانین بە زووترین كات چارەسەری بكەین.
