خه‌بات: هەندرێن شێرزاد
رۆژی سێ شەممە، 9 ی ئەپریلی 2019، هەڵبژاردنی پەرلەمانی پێشوەخت لە ئیسرائیل ئەنجام درا ، ئەگەرچی بڕیار بوو پرۆسەكە لە مانگی نۆڤەمبەری 2019 ئەنجام بدرێ بەڵام بەهۆی سەرهەڵدانێ كۆمەڵێك ناكۆكی توند لە نێوان پارتی لیكۆدی راستڕەو لەگەڵ پارتە ئاینیەكانی تر سەبارەت بە یاسای سەربازگیری كە ئەرسۆزۆكسەكانی هەڵاوێردووە لە جێبەجێكردنی خزمەتی سەربازیی ، بڕیار درا پرۆسەكە پێش بخرێ.
نەخشەی پارتە بەشداربووەكان
پارتە راستڕەوەكان
پارتی لیكود: گەورەترین پارتی راستڕەوی سیاسی ئیسرائیلیە ، باوەڕی بە بیرۆكەی ئیسرائیلی مەزن و تایبەتمەندی گەلی جولەكە و گرنگی زیندووكردنەوەی مێژووەكەی هەیە . ساڵی 1973 دامەزراوە و لە پارتێكی راستڕەو جیابۆتەوە كە لەلایەن مناحم بێگنی سەرۆكوەزیرانی پێشووتری ئیسرائیلەوە سەرۆكایەتی دەكرا . پارتی لیكود لە ساڵی 1977 توانی یەكەم حكومەت پێكبێنێ و ئێستا لەلایەن بنیامین ناتانیاهۆی سەرۆكوەزیرانەوە سەرۆكایەتی دەكرێ و زیاتر پشت بە گرتنەبەری سیاسەتە ئەمنیە توندەكان دەبەستێ سەبارەت بە بابەتە چارەنووسسازەكان .
پارتی راستڕەوی نوێ
لە مانگی دیسەمبەری 2018 دامەزراوە ، دوای كشانەوەی نفتالی بینیتی وەزیری پەروەردە و فێركردن لە پارتی ئیسرائیل ماڵی ئێمەیە.
یەكێتی راستڕەو
لەلایەن حاخام رافی بیریتسەوە سەرۆكایەتی دەكرێ و یەكێكە لە گەورەترین پێكهاتە سیاسیەكان كە نوێنەرایەتی جێنشینە ئیسرائیلیەكانی كەرتی رۆژئاوا دەكات و زۆر بە توندیش دژایەتی دامەزرانی دەوڵەتی فەلەستین دەكات ، هەروەها جەخت لەسەر پەیوەندیە تەوراتی و ئاینیەكانی ئیسرائیل بەو خاكانە دەكاتەوە كە فەلەستینیەكان دەخوازن وڵاتی تایبەت بەخۆیانی لەسەر دابمەزرێنن. ئەم یەكێتیە پارتی قاوەی توندڕەو دەگرێتە خۆی.
ئیسرائیل ماڵی ئێمەیە
لەلایەن ئەڤیگدۆر لیبرمانەوە سەرۆكایەتی دەكرێ و چاوەڕێ دەكرێ خۆی بگەیەنێتە رێژەی یەكلاكەرەوە.
پارتی تەوراتی یەكگرتوو
لەلایەن یەعقوب لیتزمانەوە سەرۆكایەتی دەكرێ و نوێنەرایەتی جولەكەكانی حەریدیمی ئەرسۆزۆكسی توندڕەوە بە رەچەڵەك ئەوروپیەكان دەكات .
پارتی شاس
ئاریێ درعی وەزیری ناوخۆ سەرۆكایەتی دەكات ، ناوی تەواوی پارتەكە یەكێتی سەفاردیم پاسەوانانی تەوراتە و لەگەڵ پارتی تەوراتی یەكگرتوو هاوپەیمانیان پێكهێناوە .
پارتە چەپڕەوەكان:
پارتی شین – سپی
بینی گانتسی سەرۆكی پێشووی سوپاوە سەرپەرشتی دەكرێ و لەگەڵ موشێ یەعلونی وەزیری پێشووی دارایی و یائیر لابیدی سەر بە پارتی میانڕەو هاوپەیمانیان پێكهێناوە و پشت بەو سیاسەتانە دەبەستێ كە دەبنە مایەی بەخشینی ئاسانكاری و تەنازولكردن بۆ فەلەستینیەكان ، بەو مەرجەی ئەوان نەبن بە خاوەنی دەوڵەتی تایبەت بە خۆیان.
پارتی كار
ئاڤی جابای سەرۆكایەتی دەكات ، پارتێكی چەپخوازی كۆنە و لە هەڵمەتی پروپاگەندەكردندا جەختی لەسەر چاكسازی كۆمەڵایەتی و ئابووری و هێنانەدی ئاشتی و رێگەچارەی دوو دەوڵەت لەگەڵ فەلەستینیەكان كردەوە.
پارتی میرتس
لەلایەن تمار زاندبێرگەوە سەرۆكایەتی دەكرێ . پارتێكی چەپخوازە و لە ماوەی 20 ساڵی رابردوودا بەشداری هیچ حكومەتێكی ئیئتیلافی نەكردووە و لەنێو ئیسرائیلیە لیبرالەكانی چینی ناوەند خاوەنی جەماوەرێكی بەرفراوانە و داوای رێگەچارەی دوو دەوڵەت دەكات.
ئەنجامەكان
دوای جیاكردنەوەی دەنگەكان ، ئەنجامەكانی هەڵبژاردنی پەرلەمانی لە ئیسرائیل بەم شێوەیەی خوارەوە بوون :
پارتی لیكود 1.138.772 دەنگی وەدەست هێنا و بووە خاوەنی 36 كورسی كنێست.
كاحول لاڤان 1.123.929 دەنگی وەدەست هێنا و بووە خاوەنی 35 كورسی پەرلەمانی.
پارتی شاس 257.869 دەنگی وەدەست هێنا و بووە خاوەنی 8 كورسی.
یەهدوت هتورا 248.490 دەنگی وەدەست هێنا و بووە خاوەنی 7 كورسی .
پارتی كار 191.323 دەنگی وەدەست هێناوە و بووە خاوەنی 6 كورسی.
بەرە و گۆڕانكاری 193.267 دەنگی وەدەست هێناوە و بووە خاوەنی 6 كورسی .
ئیسرائیل بیتینۆ 172.933 دەنگی وەدەست هێناوە و بووە خاوەنی 5 كورسی .
یەكێتی پارتە راستڕەوەكان 159.303 دەنگی وەدەست هێناوە و بووە خاوەنی 5 كورسی.
كولانو 152.568 دەنگی وەدەست هێناوە و بووە خاوەنی 4 كورسی.
میرتس 156.217 دەنگی وەدەست هێناوە و بووە خاوەنی 4 كورسی .
هاوپەیمانی یەكگرتوو 143.844 دەنگی وەدەست هێناوە و بووە خاوەنی 4 كورسی.
حكوومەتی داهاتوو
بە پشت بەستن بە ئەنجامەكان ،سەبارەت بە پێكهێنانی حكومەتی داهاتووی ئیسرائیل كۆمەڵێك ئەگەر دێنە پێشەوە، لەوانە:
ئەگەری یەكەم: حكوومەتی ئیئتیلافی
لەوانەیە ئەم حكوومەتە لەلایەن هەردووك پارتی لیكۆدی راستڕەو و شین-سپی چەپڕەوە پێكبهێنرێ ، دوای شكستهێنانیان لەوەی بە تەنیا حكوومەتێك پێك بهێنن . ئەو كاتە پێشبینی دەكرێ حكوومەتەكە بە سەرۆكایەتی ناتانیاهۆ بێ و وەزارەتی بەرگریش بە گانیتس بسپێردرێ ، یان سەرۆكایەتی حكوومەتەكە لە نێوان ئەم دوو كەسە دەستاودەست بكرێ ، یان حكوومەتەكە بە سەرۆكایەتی گانیتس بێ و ناتانیاهۆ ببێ بە وەزیری دارایی .
ئەگەری دووەم: حكوومەتێكی راستڕەو
بەو پێیەی پارتی لیكۆد زۆرینەی دەنگی وەدەست هێناوە ، دوور نیە حكومەتێكی راستڕەو پێكبهێنرێ بە سەرۆكایەتی ناتانیاهۆ ، لەمەشدا داوای هاوپەیمانی لە پارتە راستڕەوەكان دەكرێ .
ئەگەری سێیەم: حكوومەتێكی چەپڕەو
حكومەتێكی لەم جۆرە بە سەرۆكایەتی گانتس ئەو كاتە پێكدەهێنرێ ئەگەر كوتلەی سپی - شین لە خولی داهاتووی هەڵبژاردنەكاندا سوود لە سێ پارت وەربگرێ : پارتی زیهوت و پارتی كولانو و پارتە عەرەبیەكان.
