كارزان حەیدەر
بەڕێوەبەری ئاسایشی هەولێر لە دیمانەیەكی تایبەتدا لەگەڵ رۆژنامەی (خەبات) ئاشكرای دەكات: “107 كەسیان لەو تاوانبارانە دەستگیركردووە كە فەرمانی دەستگیركردنیان هەبووە و پێشتر بەهەر هۆكارێك دەستگیر نەكرابوون، هاوكات 118قورماخانەیان داخستووە و 76كەسیشیان بەو تۆمەتەو بە فەرمانی دادوەر دەستگیر كردووە، دانانی كامێرای چاودێریشی لە3 هەزار شوێنی هەولێر بە هۆكاری كەمكردنەوەی ڕێژەی تاوان زانی. د.تاریق نوری بەڕێوەبەری ئاسایشی هەولێر ڕایگەیاند: مانگانە بەداواداچوون بۆ ئامارەكانی ڕێژەی تاوان دەكەن لەشاری هەولێر و هەر كاتێك هەست بەوە بكەن ڕێژەكە بەرز بۆتەوە، هێزەكانیان ڕادەسپێرن دەست بە جموجۆڵی زیاتر بكەن و هاوكاری پۆلیس بكەن بۆ كەمكردنەوەی تاوان. 107 تاوانباری هەڵاتوو دەستگیر كراون بەڕێوەبەری ئاسایشی هەولێر لەبارەی ئەو تاوانبارانەی كە بەهەر هۆكارێك نەكەوتوونەتە دەست یاسا و هەڵاتوون، ئاشكرای كرد: بە ڕاسپاردەی لیژنەی ئەمنی پارێزگای هەولێر، لە20 ی كانوونی دووەم تا3 ی شوباتی2019 ئاسایشی هەولێر107 كەسی لەو تاوانبارانە گرت كە فەرمانی دەستگیركردنیان لەلایەن دادوەری لێكۆڵینەوە هەبووە و لەدەستی یاسا هەڵاتوون، دوای دەستگیركردنیشیان تەسلیم بە لایەنی پەیوەندیدار كران، د.تاریق نوری دەڵێ: دوای دەستگیر ئەو تاوانبارانە، تۆمەتباری دیكەش خۆی ڕادەستی پۆلیس و دەزگا ئەمنیەكان كرد، بۆیە ئێستا كەسێك یان گروپێك ناتوانێ لە چنگی یاسا رزگاری بێت ئەگەر تاوانێك ئەنجام بدات. زیاتر لە40 ئامێری ڕۆڵێت تێكشكێندران لە پێناو ئەوەی ڕێژەی تاوان لە شاری هەولێر كەم بكەنەوە، ئاسایشی هەولێر هەڵمەتێكی بۆ داخستنی قومارخانەكانی هەولێر دەستپێكرد، وەك د.تاریق نوری بەڕێوەبەری ئاسایشی هەولێریش ئاماژەی بۆ كرد، لە مانگی شوباتەوە تاكو ئێستا118 قومارخانەیان لەهەولێر داخستووە، سەرباری ئەوەی زیاتر لە40 ئامێری ڕۆڵێتیان دەست بەسەرداگرتووەو تێكیان شكاندووە، لەگەڵ ئەوەشدا زۆرێك لە شوێنی ئەو قومارخانانە ڕێگەیان پێنەدراوە بكرێتە شوێنی كاری دیكەش. بەڕێوەبەری ئاسایشی هەولێر دەڵێ: هەستمان بەوە كردبوو قومارخانەكان دەبنە هۆكاری زیادبوونی ڕێژەی تاوان، ئەوانەی یاریەكە دەكەن و دەدۆرێن، بۆ دەستكەوتنی پارەی زیاتر دەست بۆ كاری دزی و تاوانكاری دەبەن، لەگەڵ هەموو ئەوانە، قوماركردن لە هەرێمی كوردستان بە یاسا قەدەغەكراوە، دەشڵێت: هەوڵ دەدەین هاوكاری پۆلیس بكەین بۆ ئەوەی ڕێژەی تاوان نزیك بكەینەوە بۆ سفر. لە نەورۆز كەمترین تاوان كرا بەڕێوەبەری ئاسایشی هەولێر دڵنیایی دا هاوڵاتیانی شاری هەولێر كە ماڵ و سامان و گیانیان پارێزراوە بە چاوكراوەیی پیاوانی هێزەكانی ئاسایشی ناوخۆ و گوتی: لە ڕۆژانی نەورۆزدا كەمترین تاوان ئەنجامدراوە كە دزینی ئۆتۆمبێڵێكی پیكاب بووە، لەگەڵ چەند دوكانێكی فرۆشتنی خانووبەرە كە نەتوانراوە هیچ شتێكی لێ بدزرێت. بەڕێوەبەری پۆلیسی هەولێر دووپاتی كردەوە كە شێوازی كاركردنی هێزەكانی ئاسایشی بەشێوەیەك پێشكەوتووە كە لە ماوەی كورتدا دەتوانن زانیاری زۆر ورد بەدەست بێنن،وەك ئەو نموونەی كە لە ڕۆژی نەورۆزدا ڕوویدا لە كاتی ونبوونی منداڵێكی سێ ساڵان لە دایك و باوكی لە كاتی گەشت و سەیراندا،توانرا بە وەرگرتنی چەند زانیاریەكی كورت لە منداڵەكە،فایلی زانیاریەكانی خانەوادەكەی لە نزیكترین كاتتدا دەربهێندرێ و بزاندرێت هی چ كەسێكە،هەرچەند پەیوەندی بە دایك و باوكی منداڵەكە كرا بۆ ئەوەی منداڵەكەیان ببنەوە لەلای هێزەكانی ئاسایش،كەچی هێشتا پێیان نەزانیبوو كە منداڵەكەیان ونبووە. لە سەنتەرێكی كۆنتڕۆڵ چاودێری هەموو هەولێر دەكرێت د.تاریق نوری بەڕێوەبەری ئاسایشی هەولێر ئاشكرای دەكات: دەستیان بە پرۆژەی دانانی كامێرای چاودێری كردووە لە3 هەزار شوێنی شاری هەولێر،گوتیشی: لە سەنتەرێكی كۆنتڕۆڵدا بە24 كاتژمێر چاودێری تەواوی ئەو كامێرایانەو شار دەكرێت. بەڕێوەبەری ئاسایشی هەولێر ئاماژەی بەوە كرد كە كامێراكان بە كوالێتی زۆر بەرزن و كاریگەریان لەسەر كەمبوونەوەی ڕێژەی تاوان هەیە لە شاری هەولێر. بۆ رووبەڕووبوونەوەی ماددەی هۆشبەر پێویستیمان بە شوێنی چارەسەری هەیە هەرچەند ئاماژە بەوە دەكات كە ئێستا516 ئاڵودەبوو و بازرگانی ماددەی هۆشبەر دەستگیركراون و ڕۆژانە4 تا5 كەس دەستگیر دەكرێت لە تەمەنەكانی 16و 17و 18تا دەگاتە25 ساڵی، د.تاریق نوری بەڕێوەبەری ئاسایشی هەولێر بەندكردن بە تاكە چارەسەر نازانێ بۆ ڕێگری كردن لە ماددەی هۆشبەر، بەڵكو كۆنتڕۆڵكردنی زیاتری سنوورەكان لەگەڵ ناوەڕاست و باشووری عێراق و بوونی شوێنی تایبەت بۆ داڵدەدانی ئەوانەی ئاڵودەبوون بۆ پێدانی چارەسەری پزیشكی پێیان بەتایبەت ئەوانەی دەگەنە حاڵەتی بەكارهێنانی ماددەی كریستاڵ،لەپێناو ئەوەی جارێكی دیكە نەگەڕێنەوە سەر حاڵەتی خراپی جارانی خۆیان. بەڕێوەبەری ئاسایشی هەولێر ئاماژە بە بوونی بەڕێوەبەرایەتی نەهێشتنی ماددەی هۆشبەر دەكات كە سەر بە بەڕێوەبەرایەتی گشتی ئاسایشە و دەڵێ: ئەركی سەرەكی ئەوان چارەسەركردنی دیاردەكەیە كە لە حاڵەتەوە گۆڕاوە، بە پێویستی زانی سنوورەكان زیاتر كۆنتڕۆڵ بكرێن.
