سەرۆك بارزانی لەگەڵ وەزیری دەرەوەی ئەمەریكا كۆبۆوە  و هەردوولا لەسەر ئەوە هاوڕابوون كە لە عێراقدا دەرفەتێكی تازە لە ئارادایە بۆ چارەسەركردنی كێشە هەڵواسراوەكانی نێوان هەرێم و بەغدا و، وەزیری دەرەوەی ئەمەریكا جەختی لەوە كردەوە كە وڵاتەكەی هاوبەشی  هەرێم و بەغدا دەمێنێتەوە.

ڕۆژی چوارشەممە 9ـی 1ـی 2019 لە شاری هەولێر سەرۆك مەسعوود بارزانی لەگەڵ مایك پۆمپیۆ وەزیری دەرەوەی ئەمەریكا كۆبۆوە.
لە كۆبوونەوەكەدا كە دۆگڵاس سلێمان باڵیۆزی ئەمەریكا لە عێراق و ستیڤ ڤاگین كونسووڵی ئەمەریكا لە شاری هەولێریش ئامادەی بوون، گفتوگۆ لەبارەی بارودۆخی سیاسیی عێراق و ناوچەكە و هەروەها پەیوەندییەكانی نێوان هەرێم و بەغدا  و شەڕی دژی تیرۆر كرا و، هەردوولا لەسەر ئەوە هاوڕابوون كە لە عێراقدا دەرفەتێكی تازە لە ئارادایە بۆ چارەسەركردنی كێشە هەڵواسراوەكانی نێوان هەرێم و بەغدا و، وەزیری دەرەوەی ئەمەریكا جەختی لەوە كردەوە كە وڵاتەكەی هاوبەشی  هەرێم و بەغدا دەمێنێتەوە.
وەزیری دەرەوەی ئەمەریكا پێزانینی هەبوو بۆ كاری هاوبەشی ئەمەریكا و هێزی پێشمەرگەی كوردستان كە بووە هۆی بەدەستهاتنی سەركەوتن و جەختیشی لە بایەخ و پێگەی هەرێمی كوردستان بۆ وڵاتەكەی كردەوە.

لای خۆیەوە سەرۆك بارزانی سوپاسی ئەمەریكای كرد كە لەشەڕی دژی تیرۆریستان پشتیوانی هێزی پێشمەرگە بووە و ئاماژەیشی بەوەدا كە بەهۆی هەماهەنگیی نێوان سوپای ئەمەریكا و هێزی پێشمەرگە سەركەوتنی زۆر گەورە لە شەڕی دژی تیرۆر بەدەست هاتووە. هەروەها هاتنی وەزیری دەرەوەی ئەمەریكای بۆ كوردستان بە سەردانێكی گرنگ و جێگەی تەقدیر وەسف كرد. سەبارەت بە پەیوەندییەكانی نێوان هەرێم و بەغدا سەرۆك بارزانی وێڕای ئاماژەدان بە كەشوهەوای سیاسیی تازە لە عێراق ئەوەی دووپاتكردەوە كە هەرێمی كوردستان هەمیشە بڕوای وا بووە كە گرفتەكانی لەگەڵ بەغدا لەڕێگەی دیالۆگ و بە شێوازی ئاشتیانە چارەسەر بكات. هیوای ئەوەیشی خواست كە كێشەكانی نێوان هەرێم و بەغدا چیتر بە هەڵواسراوی نەمێننەوە.
بارودۆخی سووریا تەوەرێكی دیكەی ئەو دیدارە بوو و وەزیری دەرەوەی ئەمەریكا ستراتیژیی وڵاتەكەی لە سووریا و بڕیاری كشانەوە و كەمكردنەوەی هێزەكانی ئەمەریكای لە سووریا بۆ سەرۆك بارزانی شی كردەوە. پەیوەست بە بارودۆخی سووریا سەرۆك بارزانی نیگەرانیی خۆی لەبارەی چارەنووسی گەلی كورد لە سووریا ڕاگەیاند و داوای كرد كە گۆڕانكاری و پێشهاتە تازەكان نەبنە هۆی ئەوەی گەلی كورد لە سووریا چیتر تووشی ئازار و زیان ببێت.