سەرۆك مەسعوود بارزانی و نووری مالیكی سەرۆكی هاوپەیمانی دەوڵەتی یاسا دووپاتیان لە كاركردن بۆ نزیكبوونەوەی هەولێر و بەغدا و كاری پێكەوەیی و بەرەوپێشبردنی پرۆسەی سیاسی لە عێراق كردەوە.
سەرۆك بارزانی لە بەغدا زنجیرەیەك دیدار و كۆبوونەوەی لەگەڵ بەرپرسانی باڵا و سەرانی هێزە سیاسییەكانی عێراق ساز كرد و لە دوایین وێستگەی رۆژی یەكەمی سەردانەكەی ئێوارەی ئەمڕۆ پێنجشەم لەگەڵ نووری مالیكی سەرۆكی هاوپەیمانی دەوڵەتی یاسا و ژمارەیەك لە سەرانی هاوپەیمانیەتییەكە و حزبی دەعوەی عێراقی كۆ بووەوە.
لەو كۆبوونەوەیەدا سەردانەكەی سەرۆك بارزانی بۆ شاری بەغدا و كۆبوونەوەی لەگەڵ لایەنە سیاسییەكان بە گرنگ و بایەخدار وەسف كرا. دووپاتیش لە كاركردن بۆ نزیكبوونەوەی هەولێر و بەغدا و كاری پێكەوەیی و سوودوەرگرتن لە فرەلایەنیی سیاسی و بنەماكانی دیموكراسی كرایەوە بۆ بەرەوپێشبردنی پرۆسەی سیاسی لە عێراق.
هەر لەو كۆبوونەوەیەدا هەردوولا دووپاتیان لە هاوئاهەنگی و پێوەندیی بەردەوام بە مەبەستی پێشخستنی پرۆسەی سیاسی و چارەسەركردنی كێشەكان و پاڵپشتیكردنی حكوومەتی تازەی عێراق كردەوە.
شایەنی باسە لەو سەردانەدا مەسروور بارزانی راوێژكاری ئەنجوومەنی ئاسایشی هەرێمی كوردستان و ئازاد بەرواری ئەندامی مەكتەبی سیاسی پارتی دیموكراتی كوردستان و سەرۆكی فڕاكسیۆنی پارتی لە بەغدا و ژمارەیەك وەزیر و بەرپرس و راوێژكارانی پارتی هاوەڵی سەرۆك بارزانی بوون.