ئەمڕۆ پێنجشەممە، 16ـی نیسانی 2026، رێبەر ئەحمەد، ئەندامی کۆمیتەی ناوەندیی پارتی دیموکراتی کوردستان لە کۆنگرەیەکی رۆژنامەوانیدا دوایین هەڵوێستی پارتی دیموکراتی کوردستانی سەبارەت بە پێکهێنانی ئیدارەی پارێزگای کەرکووک و لێکەوتەکانی دوای هەڵبژاردنەکان خستەروو.
رێبەر ئەحمەد ئاماژەی بەوە کرد، پێویستە هەموو لایەنەکان بگەڕێنەوە بۆ ئەنجامی هەڵبژاردنەکان و رێز لە هەڵوێستی ئەو لایەنانە بگرن کە وەک براوەی هەڵبژاردن دەستنیشان کراون. راشیگەیاند: “ئێمە وەک پارتی دیموکراتی کوردستان، وەک لایەنێکی سەرەکی لە ئیدارەدانی کەرکووک، هەمیشە ئومێدمان وابووە ئیدارەیەکی شەرعی بەگوێرەی ویست و خواستی خەڵکی کەرکووک پێکبهێنرێت.”
ئەندامی کۆمیتەی پارتی تیشکی خستە سەر هەوڵەکانی پێشوویان و گوتی: “لەو چوارچێوەیەدا، لەگەڵ لایەنە پەیوەندیدارەکانی ناو کەرکووک لیژنەیەکی دانوستانمان پێکهێنا و چەند کۆبوونەوەیەکیش بە ئامادەبوونی سەرۆکوەزیرانی حکوومەتی فیدراڵ ئەنجام دران، ئامانجمان ئەوە بوو لێکگەیشتنێکی گشتگیر لە نێوان کورد، تورکمان، عەرەب و پێکهاتەی مەسیحی دروست ببێت.”
سەبارەت بەو رێککەوتنەی لە دەرەوەی ئەو چوارچێوەیە ئەنجامدراوە، رێبەر ئەحمەد بە توندی رەخنەی گرت و گوتی: “ئەو رێککەوتنەی چەند گرووپ و لایەنێک لە هۆتێل رەشید ئەنجامیاندا و بە ‘ئیدارەی هۆتێل رەشید’ ناسراوە، لای ئێمە بە هەموو شێوەیەک رەتکراوەیە. هەر رێککەوتنێک بەدەر لە شەرعییەت و ئیرادەی دەنگدەری کەرکووک بێت، لای پارتی پەسەند نییە.”
ئەندامی کۆمیتەی پارتی جەختی کردەوە، پارتی دیموکراتی کوردستان پابەندە بەو هەڵوێستەی و گوتی: “هەر شتێک لەسەر بنەمای رێککەوتنی هۆتێل رەشید دروست بکرێت، ئێمە ئەنجامەکانی رەت دەکەینەوە و بە هیچ شێوەیەک بەشداری لە هیچ کۆبوونەوەیەکدا ناکەین کە لەسەر ئەو بنەمایە رێکخرابێت.”
گوتیشی: “هەڵوێستی پارتی ئەوەیە کە دەبێت کەرکووک بۆ خەڵکی کەرکووک بێت و ئەو ئیدارەی کە لەوێ دروست دەکرێت، نوێنەرایەتی شەرعییەتی دەنگدەری کەرکووک بکات.”رێبەر ئەحمەد باسی لەوەش کرد کە گرنگ نییە کێ پارێزگارە و کێ دەبێتە پارێزگار، گرنگ ئەوەیە هەموو لایەنەکان و پێکهاتەکان کۆک بن لەسەر ئەوەی بەرپرسیار دەبن لەسەر راپەڕاندنی ئیش و کارەکانی کەرکووک نوێنەرایەتی هەموو خەڵک بکات.
لەلایەکی دیکەوە ئەندامی کۆمیتەی ناوەندیی پارتی، باسی لە هێرشە مووشەکی و درۆنییەکانی ماوەی رابردوو بۆ سەر خاکی هەرێمی کوردستان کرد. ئاماژەی بەوە دا، هەرێمی کوردستان هەمیشە فاکتەری سەقامگیری و ئارامی بووە لە ناوچەکەدا و هەرگیز نەبووەتە هەڕەشە بۆ سەر وڵاتانی دراوسێ. رێبەر ئەحمەد داوای کرد، چیتر خاکی هەرێم نەکرێتە مەیدانی یەکلاکردنەوەی ململانێ سیاسییەکان، چونکە ئەو هێرشانە جگە لە زیانی ماددی، بوونەتە هۆی شەهید و برینداربوونی هاووڵاتیانی سڤیل، ئەوەش جێگەی قبووڵکردن نییە.
سەبارەت بە کاروباری ناوخۆی هەرێم و پێکهێنانی کابینەی نوێی حکوومەت، ئەندامەکەی کۆمیتەی ناوەندیی پارتی داوای لە لایەنە سیاسییەکان کرد، ڕێز لە ئیرادەی دەنگدەران و ئەنجامی هەڵبژاردنەکان بگرن. گوتیشی پێویستە گفتوگۆکان خێرا بکرێن بۆ پێکهێنانی کابینەی دەیەم، تاوەکو حکوومەتێکی بەهێز پێکبێت کە بتوانێت خزمەتگوزارییەکان بە باشترین شێوە بگەیەنێتە هاووڵاتیان و پارێزگاری لە قەوارەی هەرێمی کوردستان بکات.
رێبەر ئەحمەد دووپاتی کردەوە، کێشەکانی نێوان هەولێر و بەغدا، بەتایبەت پرسی ناوچە کوردستانییەکانی دەرەوەی ئیدارەی هەرێم، تەنیا لە چوارچێوەی دەستوور و جێبەجێکردنی ماددەی 140دا چارەسەر دەبن، و پارتیش لەسەر ئەو هەڵوێستە نەتەوەیی و نیشتمانییەی خۆی بەردەوام دەبێت.
