موحسین خالیدی (کاکەلاو)
پێشەکی:
لە جیهانێکدا کە چەندین نەتەوە ناسنامەی خۆیان لە تەمتومانی لەبیرچوونەوە لەدەستداوە، ئێمەی کورد هێشتا وەستاوین. وەستان لەسەر چیاکانمان، لەسەر مێژوومان و لەسەر باوەڕمان بە ئازادی. وەک هاووڵاتییەکی کورد و پارتی و کەسێکی هەولێری، لەو باوەڕەدام کە ئەم سێ وشەیە تەنیا بەشێک نین لە ژیانم، بەڵکو سەرچاوەی بیرکردنەوەیەکن کە ئەمڕۆ بە شانازییەوە ناوی کوردستان بەسەر عێراق و ڕۆژهەڵاتی ناوەڕاست و جیهاندا دەدرەوشێننەوە.
شانازی دەکەم کە کوردم
کوردبوون تەنیا ئینتیمایەکی نەتەوەیی نییە. ئەرکێکی مێژووییە. گەلێک کە سەدان ساڵە لە ژێر سێبەری نادادپەروەری و دووبەرەکیدا، لە خەبات بۆ ئازادی و کەرامەتی مرۆڤ کۆڵی نەداوە. کوردبوون واتە ژیان لە سنووری نێوان هیوا، بەرخۆدان، هەژاری، قەتلوعام و ئازار و بەئاگاهێنانەوە. هەموو دێڕێک لە مێژوومان پڕە لەو وشانەی کە ئازادی و ئاسوودەیی وێنادەکەن. لە شێخ عوبەیدوڵڵا نەهری-یەوە تا بارزانیی نەمر و پێشەوا قازی محەممەد، تا هەزاران پێشمەرگەی شەهید، ئەم کاروانە بەردەوام بووە و بەردەوامیش دەمێنێ. کوردبوون واتە باوەڕمان بەوە هەبێت کە ئەگەر دنیا لەبیرمان بکات، خۆمان پاسەوانی ناسنامەی خۆمان دەبین، چونکە کوردستانی ئەمڕۆ میراتی ئەو بەرخودان و شۆڕشانەیە.
کوردستان ئەمڕۆ میراتی ئەم خۆڕاگرییە. خاکێک کە سەرەڕای برینەکانی مێژوو، ئێستا بووەتە سیمبولی سەقامگیری و پێکەوەژیان لە ڕۆژهەڵاتی ناوەڕاستدا. من، لەنێو ئەم نەتەوەیەدا، خۆم بە بەشێک لە مێژووێکی مەزن دەزانم؛ مێژوویەک کە بە خوێن نووسراوە، بەڵام بە دانایی بەردەوام بووە.
شەرەفمەندم ئەندامی پارتیم
پارتی دیموکراتی کوردستان، تەنها حزبێکی سیاسی نییە، بەڵکو قوتابخانەیەکی نەتەوەییە. قوتابخانەیەک کە تێیدا فێربووین سیاسەت واتە بەرپرسیارێتی بەرامبەر خەڵک و سەرکردایەتی واتە خزمەت نەک دەسەڵات. لەو ڕۆژەوەی بارزانیی نەمر ئەم حزبەی دامەزراند، پارتییەکان وەک هەڵگری پێوەرەکانی ئازادی و یەکڕیزی و دیالۆگ لە کوردستاندا ناسراون. پارتی بوون مانای باوەڕبوون بە گۆڕانکاری لە ڕێگەی ئاشتییە، نەک توندوتیژی. لە ڕێگەی دیالۆگەوەیە نەک ڕووبەڕووبوونەوە.
لەچەند دەیەی ڕابردوودا ئەم پارتە، بەسەرکردایەتییەکی ژیرانە و هاوسەنگ، توانیویەتی کوردستان لەخەباتی چەکدارییەوە بگوازێتەوە بۆ قۆناغی بنیاتنانی دەوڵەت و کۆمەڵگەیەکی مۆدێرن. ئەگەر ئەمڕۆ هەرێمی کوردستان خاوەنی دامەزراوەی یاسایی و ئابوورییەکی چالاک و پەیوەندییە نێودەوڵەتییەکان و ئامادەبوونێکی سیاسی لەسەر ئاستی ناوچەکە بێت، ئەوا بەشێکی بەرچاوی ئەم دەستکەوتانە دەگەڕێتەوە بۆ تێڕوانینی بارزانیی نەمر و هەوڵەکانی نەوەکانی پارتی.
ئەندامێتی لە پارتی دیموکراتی کوردستان بۆ من تەنها ئینتیمایەکی سیاسی نییە، بەڵکو پابەندبوونێکی ئەخلاقییە: پابەندبوونە بە دڵسۆزی بۆ ئایدیالی ئازادی و ڕێزگرتن لە کەرامەتی مرۆڤ. من شانازیی بەم پارتە دەکەم، چونکە هەمیشە عەقڵانییەتی لە سەرووی دروشم و یەکڕیزی لە سەرووی دابەشبوون داناوە. پارتی بوون واتە بڕوابوون بەوەی کە دەبێت کوردستان بەهەموو هێزەکانییەوە هەر لەهەولێرەوە تا سلێمانی و لە زاخۆوە تا هەڵەبجە و خانەقین، لەڕێگەی دیالۆگ و لێکتێگەیشتنەوە بەڕێوەببرێت. ئەمە ڕێک ئەو ڕێبازەیە کە ئەمڕۆ سەرکردایەتیی پارتی لە ژێر ڕێبەرایەتی سەرۆک بارزانی بە ژیری و هێمنیی سیاسییەوە درێژەی پێدەدات.
خۆشحاڵم کە هەولێریم
هەولێر نەک هەر پایتەختی هەرێمە، بەڵکو پایتەختی عەقڵانییەتی کوردەوارییە. شارێک کە هەزاران ساڵ لەمەوبەر، کاتێک بەغدا و مووسڵ هێشتا لە خەوی مێژوودا بوون، لە لووتکەی شارستانیەتدا وەستابوو. لە قەڵا مێژووییەکەیەوە تا شەقامە مۆدێرنەکانی، هەولێر پردێکە لەنێوان ڕابردوو و داهاتوودا.
خۆشحاڵم کە خەڵکی هەولێرم، چونکە ئەم شارە سەدان ساڵە سیمبولی پێکەوەژیان بووە. لە هەولێر، موسڵمان، مەسیحی، کورد، تورکمان، ئاشووری و عەرەب و … شان بە شانی یەکتر دەژین. لێرەدا، سیاسەت لەگەڵ کلتوور و گەشەسەندن لەگەڵ مرۆڤایەتیدا تێکەڵ بووە.
هەولێر شارێکە کە تێیدا، عەقڵ بەسەر هەستدا زاڵە. هەر لە سیاسەتمەدارەکانییەوە تا ڕۆشنبیرانی، هەموویان بۆ بنیاتنانی ئایندەیەک تێدەکۆشن کە کوردستان گۆڕەپانی ململانێی ناوخۆیی نەبێت، بەڵکو ناوەندی هاوکاری و پێشکەوتنی هەرێمایەتی بێت.
شانازی دەکەم کە خەڵکی هەولێرم، چونکە ئەمڕۆ ئەم شارە ڕوخساری ڕاستەقینەی کوردستانی هاوچەرخ پیشان دەدات. کوردستانێک کە نەک لە ڕێگەی جەنگەوە، بەڵکو لە ڕێگەی کار، وەبەرهێنان، کلتوور و گەشتیارییەوە گەشە بکات. کوردستانێک کە ئامانجی ئەوەیە ببێتە مۆدێلی سەقامگیری لە ڕۆژهەڵاتی ناوەڕاستی شڵەژاودا.
کوردستان؛ ماڵی هیوا و عەقڵانییەت
کوردستانی ئەمڕۆ بەرهەمی دەیان ساڵ ئازار و بەرخۆدانە، بەڵام ئەوەی جیای دەکاتەوە، عەقڵانییەتی سەرکردەکەیە، لە جیهانێکدا کە توندڕەوی و توندوتیژی بووەتە زمانی زاڵ لە سیاسەتدا، کوردستان ڕێگای دیالۆگ و پێشکەوتن و ڕێزی هەڵبژاردووە. من وەک کوردێک و پارتییەک و هاووڵاتییەکی هەولێر، باوەڕم بەم ڕێبازە هەیە. من لەو باوەڕەدام کە داهاتوو هی ئەو نەتەوەیانەیە کە بەشداری دیالۆگ دەکەن، نەک ئەوانەی رێگەی شەڕ دەگرنەبەر. بۆ ئەو حکومەتانەیە کە بنیات دەنێن نەک دەسووتێنن. هەرێمی کوردستان ئەمڕۆ سیمبولی ئەو بیرۆکەیە.
سەرەڕای گوشار و تەحەدای سیاسی و ئابووری، هەرێم بە سەرکردایەتیی پارتی، لەسەر ڕێڕەوی گەشەکردن و سەقامگیری بەردەوامە، چونکە بناغەکەی تەنیا دەسەڵات نییە، بەڵکو متمانەی خەڵکە.
دەرئەنجام
من شانازی دەکەم کە کوردم، چونکە هەوڵدان بۆ ئازادی لە ناخ و بیروباوەڕی باوباپیرانمدا ڕەگی داکوتاوە.
من شەرەفمەندم کە پارتیم، چونکە عەقڵانییەت و بەرپرسیارێتی لە حزبەکەمدا هەیە.
خۆشحاڵم کە خەڵکی هەولێرم، چونکە لەخاکەکەم شارستانییەت و دیالۆگ و زاڵبوونی عەقڵ بەسەر هەستدا، رۆژ لە دوای رۆژ گەشەی کردووە.
کوردبوون شەرەفێکی گەورەیە و پارتی بوون ئەرکە و هەولێری بوون پیرۆزە، هەتا ئەم سێ ڕاستییە لە ناخمدا بژین، باوەڕم وایە ئایندەی کوردستان گەش و ئاشتیخوازانە و ئازاد دەبێت.
