لە دیدارێکدا سەرۆکی هەرێمی کوردستان و سەرۆکی پڕۆژەی نیشتمانیی عێراق پشتگیری خۆیان بۆ چارەسەركردنی كێشەكانی وڵات بەتایبەتی كێشەكانی هەولێر ـ بەغدا دووپات كردەوە.
نێچیرڤان بارزانی، سەرۆكی هەرێمی كوردستان، ئەمڕۆ یەكشەممە 22ـی 01ـی 2023 پێشوازی لە شێخ جەمال ئەلزاری سەرۆكی پڕۆژەی نیشتمانیی عێراق كرد.
لە دیدارێكدا دۆخی ناوخۆی عێراق و پرۆسەی سیاسی و پەیوەندییەكانی عێراق لەگەڵ وڵاتانی ناوچەكە، هەروەها دۆخی ناوچەكە بەگشتی، تاوتوێ كرا.
هەردوولا پشتگیریی خۆیان بۆ حكوومەتی فیدراڵیی عێراق و هەوڵەكانی سه‌رۆک وه‌زيران محەمەد شیاع ئه‌لسوودانی بۆ جێبەجێكردنی كارنامەی حكوومەت و چارەسەركردنی كێشەكانی وڵات دووپات كردەوە، بەتایبەتی كێشەكانی هەولێر ـ بەغدا و كاركردنی هەموو لایەن و هێزە سیاسییە عێراقییەكان لەپێناو ئارامی و سەقامگیریی عێراقدا.
