شەیما مستەفا
دامەزراندنا پارتی دیموكراتی كوردستان سالا 1946ێ ئێك ژوان پێتڤیێن مللەتێ كوردبوویە ئەڤی سەردەمی، ژبەركو بەریا دامەزراندنا پارتی زێدەتر بزاڤێن جڤاكی و سیاسی یێن سنوردار دهاتنە دامەزراندن و پارتەكا سەرتاسەری نەبو هەتا خەباتێ بۆ بدەستڤە ئینانا مافێن گەلێ كورد بكەت، بەلێ پشتی سەرهەلدان و شۆڕەشێن بارزان هزر هاتەكرن ئەو شۆڕەش و بزاڤێن هەی ل بارزان ب رێیا پڕۆژەیەكێ سیاسی ببنە بزاڤەكا سەرتاسەریا رێكخستی ئەوبو 16ی تەباخا سالا 1946ێ پارتی دیموكراتی كوردستان ب سەرۆكایەتیا بارزانی نەمر هاتە دامەزراندن، هەر دەستپێكێ خەڵكەكێ سیاسیێ كورد پەیوەندی ب رێزێن پارتی كرو دەمەكێ كێمدا بۆ ئێك پارتێن مەزن یێن عێراقێ و كوردستانێ، پارتی وەك حزبەكا جەماوەریا سیاسی دەست ب خەباتا خۆیا سیاسی كر و ژبلی كوردان هەموو پێك هاتێن عێراقی كەفتن ناڤا رێزێن پارتی دیموكراتی كوردستان، راستە بەری پارتی ژی حزب هەبوون، بەلێ ئەو پێگەهێ پارتی هەی هیچ لایەنەكێ سیاسی یێ عێراقی و كوردستانی نەبو 16ی تەباخێ وەرچەرخانەكا دیرۆكی یە بۆ دەستپێكرنا خەباتەكا دۆم درێژ.

هەگەر ئەم ڤەگەڕین دیرۆكا پارتی رۆلێ پارتی ل پێشخستنا جڤاكێ كوردستانی ناهێتە ژبیركرن، چونكە ژبلی بزاڤێن سیاسی و خەباتا جەماوەری پارتی د هەموو بیاڤێن ژیانێ دا شیایە خزمەتەكا بەرچاف پێشكەشی خەلكێ كوردستانێ بكەت، دەركرنا رۆژنامەو گۆڤارێن فەرمیی و چالاكیێن رەوشنبیری و بزاڤێن مەدەنی رۆلەك سەرەكی هەبوویە لسەردەمێ خوە، ئێك ژ ئارمانجێن پارتی پێگەهاندنێ تاكێ كورد بوویە ب رێیا رێكخراوێن جەماوەری و دامەزراندنا چەندین كۆمەلە و رێكخراوێن سڤیل.

سەرەڕای ئەڤان ئاستەنگ و دژایەتیێن هەمبەر پارتی ژلایێ دەستهەلاتدارێن عێراقێ، پارتی شیایە رابەرایەتیا دو شۆڕەشێن مەزن بكەت ئەوژی شۆڕەشا ئەیلوولا مەزن و شۆڕەشا گوڵانێ بوو، بتایبەتی شۆڕەشا ئەیلوولێ، ژبەركو بۆ جارا ئێكێ بو، شۆڕەشەكا سەرتاسەری ل باشوورێ كوردستانێ بهێتە سازكرن و هەموو تەخ و پێك هاتە پشكداریێ تێدا بكەن، ددەمێ چواردە سالێن شۆڕەشێ ب چەكێن زۆر سادەیێن ئەڤی سەردەمی كورد شیایە مەزنترین گورز ل رژێمێن وی سەردەمیێن عێراقێ بدەت، هەتا گەهشتیە رادەیەكی ژبەر ئەڤێ هێزا مەزن یا شۆڕەشێ چەندین جاران دوژمنی داخوازا دانوستانان ل سەركردایەتیا شۆڕەشێ كریە، پارتی ب درێژاهیا 76 سالێن تەمەنێ خوە قۆناغ ب قۆناغ كار بۆ بدەستڤە ئینانا مافێن رەوایێن گەلێ كوردستانێ ب هەموو پێك هاتێن ئاینی و نەتەوەیی كریە، ئەڤەژی بۆیە ئەگەرێ مانا پارتی دیموكراتی كوردستان وەك هێزەكا مەزن ل عێراق و كوردستانێ، پیرۆزبیت 16ی تەباخێ سالڤەگەڕا پارتی، نەمری بۆ شەهیدێن رێكا ئازادیێ سەروەروێ وان بارزانیێ نەمر و ئیدریسێ جوانەمەرگ.