تەڵا سەیفى قازى

لەت لەتە جەرگم
‎ئەم شەو ئاخێك تەنیویە ناخى دڵم
‎سينە ئاگرى گرتووه
‎فرمێسک لە چاوانم لۆ زەوی بووە
‎ئاخر مامم ئەمشەو
‎میوانی بابى بووە.
تەزیوە ئامێزی ژينم
‎چۆن دامرکێنم کوڵی دڵم؟
‎ئاو و ئاگر و با
‎سوجدەيان بردووە
‎بۆ سێدارەى دڵم.
‎دەنگى ناڵەی من و مونير و فەوزيە
‎لەرزاندى چوارشێرى مەهابادم.
‎هەسته قازى
ئەم شەو میوانت هەیە
‎به سەيف و سەدر بڵێ
‎تاقانەكەى تۆ میوانیانە
‎بڵێ بە فەتاح خان
‎بسڕێ فرمێسكى گۆشەى باغى چاوى
‎ئاخر میوانى بۆ هاتووە
‎كوڕى نيشتمان هاتووە
‎ئاخ … چۆن بكەم دەرمانى دڵى بريندارم
کاوە و سەردارم بوونە رەشپۆش
‎هەسته قازى
‎ بكه سەمای دەروێشان
‎ببزوێنه گەفى باى ترمەى نيشتمان
‎ئەو شەو عەلى ميوانه
‎دەنگی دەف و موسیقاى نەى…
‎سكاڵاى دڵم کۆتایی نایە
‎ئاڵاى بەرزم كەوته نێوان
‎ئاسمان و دڵى من
‎ئەى سەيف بەگوڕێنه به دەنگى بەرزت
‎كه ئەمشەو كوڕى رەش میوانته
‎سەيفەکەم،
بەکزەی زامی ناخم
‎ئاگری گرتووە دڵ
‎بمدەیە دڵۆپێک له خوێنی پاكى شەهيدت
‎با دڵ بسرەوێت
‎راساوە ئاخێک،
راپەڕیوە خەمێک..
گڕی گرتووە ناخى دڵم
‎ ئەمشەو عەلى میوانی چوار چرایه..
‎بووته هەڵۆى سەربەرزی نيشتمان
‎باڵى نەخشاوە بە رەنگى ئاڵاى كوردستان
‎هەسته قازى
‎ئەم شەو كوڕى رەش میوانتە

2022/7/14