رۆژی سێشەممە 12/7/2022، لیژنەی سەرپەرشتیی ئەو نوێژەی کە بڕیارە لە ناوچەی سەدر لە شاری بەغدا بکرێت و بە “نوێژی یەکگرتوو” ناسراوە، 12 رێنمایی لەبارەی چۆنێتیی بەڕێوەچوونی نوێژەکە بڵاوکردەوە.
بڕیارە رۆژی هەینی 15-07-2022 لەسەر داواکاریی موقتەدا سەدر، رێبەری رەوتی سەدر ئەو نوێژە بکرێت و داواشکراوە سوننە و شیعە تێیدا بەشداربوون.
رێنماییەکان بریتین لە:
1- هەرچییەک رووبدات، نابێت چوون بە ئاراستەی سەکۆ هەبێت. دەبێت هاووڵاتییان لە شوێنی دیاریکراوی هەر پارێزگایەکدا دابنیشن و بە رێنماییەکانەوە پابەند بن.
2- گوێگرتن لە دوو گوتار.
3- پابەندبوون بە مەرجەکانی تەندروستی و خۆپارێزی.
4- نابێت هاووڵاتی لە کۆڵانە تەسکەکان دابنیشێت.
5- دەبێت هاووڵاتی بە گوێرەی توانا بەرماڵ و خاولی و پێداویستی و ئاڵا لەگەڵ خۆی بهێنێت.
6- دەبێت هاووڵاتی بەشداربوو شەو لای کەسی نەناسراو نەمێنێتەوە و نەچێتە شوێنی نەگونجاو.
7- دەبێت هاووڵاتی هاوئاهەنگی لەگەڵ هێزە ئەمنییەکان هەبێت لە کاتی چوون بۆ شوێنی نوێژەکە و دەرچوون لێی.
8- دەبێت هاووڵاتی لە کاتی هەر رووداوێکدا پەیوەندی بە هۆبەی فریاکەوتنەوە بکات.
9- هەر کەسێک نەخۆش بکەوت، لیژنەی پزیشکی نزیکە و پێویست ناکات بگوازرێتەوە بۆ نەخۆشخانە.
10- لیژنەیەکی تایبەت بە وێنەگرتن هەیە و لەکاتی نوێژکردن کاری خۆیان دەکەن.
11- رۆژی پێنجشەممە شوێنی نوێژکردنەکە رادەگەیێنن، دوای ئەوەی لە رووی ئەمنییەوە کۆنترۆڵ دەکرێت.
12- دەستپێکردنەکە بە یەکگرتوویی و باوەڕداری دەبێت، لەسەر هەموو پاسەکانی نووسینگەی شەهید سەیید محەممەد سەدر ناوی پارێزگاکە و ژمارەی پاسەکە دەنووسرێت.
