خەبات: حەمە ئەحمەد جاف:- خاتونی شاعیرو وەرگێڕ (كەژاڵ حەسەنی)، لە دایكبووی سنە و گەورە بووی تارانە، وەك خۆشی دەڵێت : دامەزرێنەری ڕێكخراوێكی هونەری، زانستی و هاندانی گەنجانم و چەندین پڕۆژە و پڕۆگراممان لەبەردەستە تاكو بتوانین خزمەتێك بە كوردستان بكەین. دەشڵێت : حەزم لە نەوەستان و چالاكییە.

*پێناسەت بۆ شیعرو شیعریش لای تۆ چی دەگەیەنێت؟
ـ شیعر بوونی كەسێكی ترە لە ناوەوەی شاعیرێك و دوو قۆڵیی و شان بە شان پیاسەی جیهان دەكەن، شیعر تێكەڵەیەكە لە فەلسەفە و مێژوو.

*بۆ شیعرت هەڵبژارد؟
ـ من شیعرم هەڵنەبژاردووە، لە چەندین هونەری دیكەشدا چالاكیم هەیە و شیعریش وەكو زۆر شتی دیكە خۆی هاتووە بەدوامدا.

*ئێستای شیعری كوردی چۆن دەبینی؟
ـ لە مەقامی هەڵسەنگاندندا نیم، بەڵام دەتوانم بڵێم: ئێستایەكی شیعری لاوازمان هەیە.

*شیعرت بۆ پیاو نووسیوە؟
ـ بەڵێ چەندین شیعرم لە مەقامی پیاودا نووسیوە.

*شیعر بۆ كێ دەنووسیت و ئامانجت چییە لە نووسیندا واتە، بەڕای تۆ شیعرهۆكارە یان ئامانج؟
ـ بۆ هەر كەس و هەر شتێك كە لە لام خاوەن تەقدیس بێت شیعرم نووسیوە، بێگومان شیعر ئامانجە، ئامانجێكی مانادار، خۆشەویستی مەوتەن، باوك، ئاڵا، دایك … واملێدەكات وشەكان بكەم بە شیعر و شیعریش بكەم بە هۆكارێك بۆ بە ئامانجبوونی پیرۆزییەكانم و لە خوێنەردا ڕامانێك دروست بكەم.

*ئاشنایەتیت لەگەڵ كتێب و خوێندنەوە دا؟
ـ هەر لە منداڵییەوە بابام پێش هەر شتێك فێری كتێب خوێندنمی كردووە و ئەو خواستە پەرەی سەندووە تا ئێستا.

*بوونی پەیج و ئەكاونتی فەیسبوك و سایتە ئەلەكتڕۆنیەكان نەبوونە ڕێگر لەبەردەم گەورەیی و جوانیی نووسین و هاوكات پیرۆزیی و گرنگی كتێب و خوێندنەوە؟
ـ ئاخر ئەم پرسیارە دوو ڕەهەندی هەیە، با لە ڕەهەندە ئەرێنییەكەیەوە بۆی بڕۆین، هەر لە هەمان ئەو سایت و پەیج و ئەكاونتانە ئەوەندە كتێبی بەسوود دەناسێنن، ئەوەندە لە بوارە جیاجیاكانەوە بە شێوەیەكی پسپۆڕییانە لێكدانەوە بۆ شتەكان دەكەن و تەنانەت دەكرێت ئەو كتێبەی دەستت ناكەوێت لە هەندێك لە سایتەكان بە شێوەی pdf وەریبگریت و زانستەكەتی پێ زیاد كەیت، من خۆم لەو ڕێگایەوە زۆر شتم دەستكەوتووە، بۆیە وەك هۆكارێك بۆ دوور كەوتنەوە لە خوێندن نایانبینم، بەكارهێنەرەكەیە مانا دەداتە سایت و پەیجەكان.

*كێ هاوكارو هاندەرت بووە لە دەسپێكی نووسیندا؟
ـ لە منداڵییەوە نووسین لە ناخمدا بووە، بۆیە زۆر زەحمەت نەبووە، بابام یەكەم كەس بووە.

*بەرهەمی چاپكراو؟
ـ چەند بەرهەمێكم ئامادەی چاپە، دوو دانەیان وەرگێڕانە و دوو دانەی تریان نووسینی خۆمە.

*پیرۆزیی خاكی نیشتیمان و پێشمەرگەو گەورەیی شەهیدان لە كوێی
شیعرەكانی تۆدان؟
ـ بەرزترین هەستەكانی من بۆ خاك و نیشتمان و ئاڵا و پێشمەرگەیە و لە شیعرەكانمدا هەمان مەقان و كیانیان هەیە.

*ڕەنگدانەوەو كاریگەریی مەرگی ئازیزان و كۆچی گەنجان و جێهێشتنی نیشتیمان لەشیعرو نووسینەكانتدا؟
ـ كۆچی دوایی بابام و لەرزە كەوتنە گیانی كیانی كوردستان وای لێمكردووە بۆ ئەو دوو خاڵە زیاتر بنووسم.

*ڕات چییە لەگەڵ ئەو زۆرو بۆریەی شیعر؟
ـ لای هەندێك كەس لەوانەیە شیعر كەرەستەیەك بێت بۆ دەربڕینی هەستەكانیان، بۆیە زۆر كەس پێیوایە خەریكە شیعر دەنووسێت، بەڵام لای كەسانێكی تر شیعر شتێكی باڵاترە لە تەنها دەربڕینی ئیحساس بۆیە پێموایە دەستەی دوویەم شاعیرن، لەگەڵ ئەوەشدا پێویستە هەر دووكیان هەبن تاكو باش لە ناباش جیا بكرێتەوە.

*بەڕای تۆ ڕەخنەگری باش و لێكۆڵەری باشمان لە مەیدانەكەدا هەیە؟
ـ ئەگەر مەبەستتان ڕەخنەگری شیعرییە، نا، نیمانە.

*هیچ داهێنانێك لە شیعرو ئەدەبی كوردیدا دەبینی؟
ـ نا ……

*بەڕای بەڕێزتان سانسۆر لە مۆڵەتی چاپی كتێبدا هەبێ یان نەبێت، بۆچی؟
ـ بە ڕای من با هەبێت، لە بەربەستەكانە داهێنانت بۆ دروست دەبێت و كاری نوێ پێشكەش دەكەیت، بەڵا سانسۆری كتێب و بە گشتی هونەر پێویستی بە لیژنەیەكی لێزان و شارەزایە كە ئەوەشمان نییە.

*قەڵەمی ژن، لە نووسین و شیعردا چۆن دەبینی و تاچەند ئەوقەڵەمە بۆتە چەكی داكۆكیكار لە مافەكانیان و چارەسەری كێشەكانیان؟
ـ بەداخەوە نازانین چۆن بە شێوەیەكی دروست بە كاری بێنین، بۆیە لە كوردستان بە شیعری ژن داكۆكی و چارەسەری مافی ژن نەكراوە.

*ئەوانەی شیعر یان ڕۆمان لە زمانی فارسیەوە وەردەگێڕنە سەركوردی، تاچەند سەركەوتون لە زمانی وەرگێڕاندا؟
ـ من خۆم یەكێكم لەو كەسانەی لە فارسییەوە وەرگێڕانم كردۆتەوە كوردی و نامەوێت خۆم لەو بارەیەوە بڕیار بدەم، بەڵام لەوە دڵنیام وەرگێڕەكان توانیویانە لەو ڕێگایەوە زۆر زانست و جۆری دیدگای نوێ بهێننە ناو كوردانەوە.

*بەڕێزتان كە كاری وەرگێڕان دەكەی؟ تا چەند لە خۆتان ڕازین؟
ـ بەڵێ وەكو باسمكرد، كاری وەرگێڕان دەكەم و هیچكات لە خۆم ڕازی نیم چونكە ڕازیبوون واتا خاڵی ڕاوەستان و بەرەو پێش نەڕۆشتن.

*ڕۆڵی زمان لە شیعرو بواری وەرگێڕاندا چۆن دەبینن؟
ـ هەموومان دەزانین هێشتا زمانێكی یەكدەست و دیاریكراومان نییە، بۆ نموونە هێشتا هەر نووسەرێك جۆری پیتەكانی و،وو، لە وشەكاندا بە شێوازی خۆی بەكار دێنێت و ئەمەش لاوازییە.

*وەك دەزانین بەڕێزتان لە ڕۆژهەڵاتی كوردستان لە دایكبوویت، چۆن و بۆچی ئەوێت بەجێهێشت و لێرە نیشتەجێ بوویت؟ بۆیە دەڵێم لێرە هەست بەغەریبی ناكەی كەلە شوێنی لە دایكبوونت دووركەوتویتەوە؟
ـ من لە سنە لە دایكبووم، پاشان لە تاران ساڵانێكی زۆری ژیانم بەسەر كردووە بۆیە هەر لە ئێران ئەو ئەزموونەم هەبووە، دواتر بە ئامۆژگاری مامۆستای زمانی كوردیم لە شاری سنە باشوورم هەڵبژارد تاكو لە زمانی كوردی شارەزاتر بم، لێرەش من غەریب نیم، مەگەر ئێوە بە غەریبمان بزانن.

*پڕۆژەو بەرنامەی تازە ،چیتان بەدەستەوەیە؟
ـ دامەزرێنەری ڕێكخراوێكی هونەری، زانستی و هاندانی گەنجانم و چەندین پڕۆژە و پڕۆگراممان لەبەردەستە تاكو بتوانین خزمەتێك بە كوردستان بكەین.
– پێناسەیەكی كورت بۆ هەریەك لەوانە:
ـ كوردستان: دایك
ـ كەژاڵ حەسەنی: دنیایەكی نەناسراو
ـ عیشق وخۆشەویستی: جەوهەری ژیان
ژیان: عیشق و خۆشەویستی
كتێب: باڵایی
جەلالی مەلەكشا: بەشێكی ڕۆحی من تێكەڵی بەشێكی ڕۆحی ئەوە
تەمەن: هیچ
ڕۆژهەڵات: خۆر
پێشەوا: ڕابەر
ژن: گەردوون
مردن: دووبارە بوونەوەی ڕۆحە لە جەستەیەكی تر.