خەبات: حەمە ئەحمەد جاف:- شاعیرو هونەرمەند سلێمان گەڵاڵی لە ساڵی 1965 لەشاری هەولێر لەدایكبووە. قۆناغی سەرەتایی و ناوەندی لە هەولێر تەواو كردووە. پاشان بۆ خوێندنی هونەر شانۆ دەچێتە پەیمانگەی هونەرە جوانەكانی موسڵ و ئێستاش سەرقاڵی كاری شانۆیەو ناوە ناوە شیعرانیش دەنووسێت.

*وەك دەزانین سەرەتا لە شیعرەوە هاتویتە ناو بواری هونەری شانۆوە ، ئەوە چۆن بوو؟
ـ بەڵێ‌ ..سەرەتالە نووسینی شیعرەوە هاتمە ناو دنیای فراوانی هونەری شانۆوە هەڵبەتا سەرەتا لە ناوەندی چیمەن مامۆستای زمان و ئەدەبی كوردیمان (شێركۆ حەمەد حەوێز) هەوڵی دروستكردنی كتێبخانەیدا و كۆمەڵێك كتێبی دانسقەی هێنا بۆ كتێبخانەكە. منیش زۆرم حەز لەشیعر دەكرد و كتێبەكانی گەورە شاعیرانی كوردیشم بەردەوام دەخوێندەوە… لەهەمانكاتدا هاوڕێی دێرینم كاك (خالید كۆچەر)ی شاعیر كە قوتابی هەمان قوتابخانە بوو كتێبێكی بە ناوی (فرمێسكی مەهاباد) چاپكردبوو… ئەویش هاندەرێكی تر بوو بۆ خۆخزاندە نێو ئەو دونیا پڕ تەلیسمەی شیعر و ئەدەب. لەو ماوەیەدا بەشداری چەندین كەرنەڤاڵی شیعری لاوانمان كرد. لەبیرم نەچێت كاك (سەباح ڕەنجدەر)ی شاعیریش لەهەمان قوتابخانە لەگەڵمان بوو بەڵام لە بەشداریكردن لە كۆڕ وكەرنەڤاڵی شیعری بە حەزەر بوو… دواتر تێگەیشتین هۆكارەكەی چی بوو. پاشان من كەوتمە موسل َدوو ساڵێكم زەحمەت بوو. دواتر لەسەر شانۆ بەدەر كەوتم لەپاڵ ئەوەشدا لە گۆڤار و رۆژنامە كاندا شیعر و چیرۆكم بڵاودەكردەوە كە تائێستاش بەو شێوەیە بەردەوامم.

*پێناسەت بۆ شیعرو شانۆ چییە؟
ــ شانۆ خۆی جوانبینینی دونیایە… شیعریش ئاكاری خۆی لە ئیستاتیكای وێنەو وشە دەبینێتەوە. هەموو هونەرمەند و ئەدیبێك ، ئەزموون و ئیبداع و بەهرەی خۆی لە بەرهەمەكانیدا ڕەنگدەداتەوە.

*شیعرت بۆ كێ‌ نووسیووە بۆچی؟
ـ شیعرم بۆ خۆشەویستی نیشتمان و دایك و ژن نووسیوە كە هەڕەمی جوانین.

*لە شانۆیی (خەونی ئەبابیلەكان) زۆر بەزەقی باس لە كۆچی گەنجان و ئاوارەیی لە نیشتمان كراوە، پیرۆزیی خاكی نیشتیمان و پێشمەرگە و گەورەیی شەهیدان لە كوێی بیرۆكەی شانۆكانی تۆدان ؟
– زۆرن ئەو شانۆگەریانە كەباس لە نیشتمان و پیرۆزی خاك و پێشمەرگەی كوردستان دەكەن نموونەی هەرە زیندوو شانۆگەری (ڕۆڵەی خاك) و( خزم و ناسیار)ە

*شانۆ لای ئێوە هۆكارە یان ئامانج؟
ـ شانۆ هۆكاریكی گرنگە بۆ گەیاندنی پەیام. جا ئەو پەیامە پەیامی مرۆڤایەتی بێت یا سیاسی.

*ئاستی شانۆ لە گۆڕەپانی هونەرو ڕۆشنبیری كوردیدا چۆن دەبین؟
ـ بەهۆی ئەوەی شانۆ لای ئێمە نەبۆتە پێداویستی گرنگ و كەلتور. بەرهەمهێنانی پێویستی بە بڕێك پارە هەیە لە لایەن دەزگاو لایەنی پەیوەندیدار پشتگوێ خراوە و پارەی بۆ تەرخان ناكرێت. هونەرمەندیش ناتوانێت لەسەر گیرفانی خاڵیی داهێنان بكات بۆیە ئاستی شانۆی هەشتاكان زۆر بەرزتر و پڕ بینەر تر بوو.

*شانۆی باش و خراپ چۆن دەردەكەوێ؟
ـ هەر كاتێك هونەرمەند دەركی بە رێگریی یا پاڵپشتی نەكردن كرد.

*دەرهێنەری باشمان هەیە لە گۆڕەپانی هونەری كوردیدا؟
ـ بەڵێ ، دەرهێنەری باشمان هەیە بەڵام كارەكان بەپێی پەیوەندی تاكە كەسی بەڕێوە دەچن، نەك بەپێی شارەزایی و لێهاتوویی.

*ڕات چییە لەگەڵ شانۆی شەقام ؟
ـ شانۆی شەقام باشترین دەرچەیە بۆ ڕزگار بوون لە قەیرانی شانۆ… خۆم چوار پێنج ئەزموونی شەقامم هەیە.

*تا ئێستا لەچەندشانۆ و درامادا دەركەوتوویت؟
ـ زۆر .. بەپێی رەخسانی هەل و دەرفەتیش كارم كردووە.( بە پێكەنینەوە) نەشمژماردوون.

*بەرنامەو پڕۆژەی داهاتووت؟
خوایاربێت و تەمەن بوار بدات، دوو كتێبی شانۆیی و كتێبێكی شیعریم ئامادەی چاپە.. حەز دەكەم لە كتێبخانەی كوردی بیانبینم.