خەبات: عەلی بانیشاری:- بەپێی ئامارێكی بەڕێوەبەرایەتی گشتی كشتوكاڵی گەرمیان بەهۆی وشكەساڵییەوە ئەمساڵ 182 هەزار دۆنم زەوی چێنراو بە دانەوێڵە لە سنووری ئیدارەی گەرمیان تووشی زەرە و زیان بووە و بەهۆیشەوە 95%ی گەنمی ناوچەكە لەناوچووە و ئەوەی بەرهەم هاتووە گەنمی زەوییە بەراوەكانە كە ئەوەیش 3/1ی گەنمی ساڵانی رابردووە. بەپێی خەمڵاندنەكانی بەڕێوەبەرایەتییەكە بەهۆی وشكەساڵییەوە ساڵی رابردوو جووتیارانی گەرمیان 32 ملیار دینار زیانیان بەركەوتووە.

شادیە حسەین، بەڕێوەبەری گشتی كشتوكاڵی گەرمیان بە (خەبات)ـی راگەیاند: بەرهەمی ساڵانەی گەنم لە گەرمیان 100-150 هەزار تۆنە، بەڵام بۆ ئەمساڵ پێشبینیمان كردووە 40-50 هەزار تۆن بێت. گوتیشی: كەمبوونەوەی بەرهەمی دانەوێڵە پەیوەندی راستەوخۆی بە كەمی بارانبارینەوە هەیە، كە بۆ دوو ساڵ دەچێت جووتیارانی سنوورەكە زیانێكی زۆریان پێدەگات. بەپێی ئاماری بەڕێوەبەرایەتی گشتی كەشناسی و بومەلەرزەزانی هەرێم ئەمساڵ لە گەرمیان زۆرترین رێژەی بارانبارین 212 ملم بووە و كەمترینیش 89 ملم.

بەڕێوەبەری گشتی كشتوكاڵی گەرمیان دەڵێت: بەهۆی وشكەساڵییەوە 182 هەزار دۆنم زەوی چێنراو بە گەنم لە گەرمیان تووشی زەرە و زیان بووە، بەو هۆیەوە 95%ی گەنم لەناوچووە كە ئەوەش زیانێكی گەورەیە بەر جووتیاران كەوتووە. سەبارەت بە قەبارەی زیانەكان؟ گوتی: هێشتا قەبارەی زیانەكانی ئەمساڵ بەتەواوی دیاری نەكراوە، بەڵام چاوەرێ دەكرێت قەبارەی زیانەكانی ئەمساڵ زیاتر بن، چونكە دوو ساڵی یەك لە دوای یەك وشكەساڵی بووە لە گەرمیان.

ساڵانە 300-350 هەزار دۆنم زەوی لە سنووری گەرمیان بە گەنم دەچێنرێت. شادیە حسەین ئاماژەی بەوەدا، لە كۆی 111 هەزار دۆنم زەوی بەراو، ئەمساڵ 72 هەزار دۆنمی بە گەنم چێنراوە، ئەو گەنمەشی لە گەرمیان بەرهەم هاتووە لە زەویە بەراوەكانە. گوتیشی: ئەو گەنمەی ئەمساڵ بەرهەم هاتووە نمرەیەكی لە گەنمی ساڵانی رابردوو كەمترە، بێگومان ئەوەش بەهۆی كاریگەری كەشوهەواوەیە كە كار لە بڕ و جۆر و كوالێتی بەرهەم دەكات.

وەرزی دروێنە لە ناوچەی گەرمیان لە مانگی ئایارەوە دەستپێدەكات و لە كۆتایی مانگی حوزەیران كۆتایی دێت. ئەمساڵ لە 4ی حوزەیرانەوە سایلۆكان بەڕووی گەنمی جووتیاراندا كراوەنەتەوە. بەڕێوەبەری گشتی كشتوكاڵی گەرمیان دەڵێت: تاوەكو ئێستا تەنیا شەش هەزار تۆن گەنم رادەستی سایلۆكان كراوە. سەبارەت بە هۆكاری كەمی رادەستكردنی گەنم بە سایلۆكان؟ شادیە حسەین گوتی: جووتیاران ترسیان لەوە هەیە كە وەرزی چاندن دەستیپێكرد بنەوتۆیان بە نرخی ئێستا دەست ناكەوێت و بەهۆی بەرزبوونەوەی نرخی دانەوێڵەوە لە ئێران و توركیاوە بنەتۆ هاوردەی هەرێمی كوردستان نەكرێت و ئەو وڵاتانە گەنمی خۆیان كۆگا بكەن، هەر لەبەرئەوەیشە جووتیارانی گەرمیان تەواوی بەرهەمەكانیان رادەستی سایلۆ نەكەن و بەشی خۆیانی لێ هەڵدەگرن.

لەبارەی پاشەكشەی جووتیارانی ناوچەكە لە چاندنی گەنم؟ بەڕێوەبەری گشتی كشتوكاڵی گەرمیان گوتی: بە دڵنیاییەوە بەهۆی وشكەساڵییەوە پاشەكشە لە چاندنی دانەوێڵە لەلایەن جووتیارانی گەرمیانەوە هەیە، بەڵام تاوەكو گەنم لە بازاڕدا ساغ بكرێتەوە، جووتیاران لە هەوڵەكانی خۆیان بەردەوام دەبن بۆ بەرهەم هێنانی. پێشتر حوسین حەمە كەریم، وتەبێژی وەزارەتی كشتوكاڵ و سەرچاوەكانی ئاوی هەرێمی كوردستان بە (خەبات)ـی راگەیاندبوو: بەهۆی كەمی بارانبارینەوە گەنمی ئەمساڵی جووتیارانی گەرمیان بێ لەو شوێنانەی بە ئاودێری كراون فەوتاوە.