كاروان محەمەد سینو
لە 6/3/1974 خواستی دوژمنانی گەلی كورد و بەرژەوەندییەكانی وڵاتانی زلهێز لە تەرازووی بازرگانی بە گەل و مافەرەواكانی خەڵكی كوردستان هاوسەنك و هاوئاراستە بوون، لەم سەروبەندەدا و لە گەلەكۆمەیەكی بێویژدانانە و نامرۆڤانەدا لە پەراوێزی كۆڕبەندی رێكخراوی (ئۆپێك)ی وڵاتانی هەناردەكاری نەوت لەجەزائیر دوژمنان و زلهێز و خۆپەرستان (كە خۆیان بە دۆستی كورد ناساندبوو) رێككەوتنێكی خیانەتكارانەیان ئیمزا كرد كە بە (رێككەوتنی جەزائیر) ناوزەد كرا. رێككەوتنی ئەوان لەسەر خوێن و مافی گەلی كوردستان بوو، ئەگەرچی عێراق (رژێمی بەعس) بەشێكی زۆری خاكی سنووری خۆی لە باشووری رۆژهەڵات و نیوەی (چەمی عەرەب –شەتولعەرەب)ی لەبەرژەوەندیی ئێران لەدەست دا و رژێمی عێراق لە فەلەكی روسیا دەرچوو و خزایە نێو باوەشی ئەمریكا كە دواتر هەر ئەمریكا بووە ئەگەری لەناوچوونی رژێمی بەعس…، هەموو ئەم پیلان و خۆچەماندنەی رژێمی دیكتاتۆری سەددام حوسێن و وڵاتانی ئیقلیمی و زلهێز كە دواتر بووە هۆكاری لەدەستدانی خاكی عێراق، تەنها لەبەر ئەوەبوو كە بە هەموویانەوە دەست بخەنە قوڕكی شۆڕشی ئەیلوول. شۆڕشی رزگاری خەڵكی كوردستان. لە ئەنجامدا توانییان بۆ ماوەیەكی كورت (شەش مانگ) شۆڕشی مەزنی ئەیلوول سنووردار بكەن. لەم شەش مانگەدا سەركردایەتیی شۆڕش لە خۆرێكخستنەوەدا بوون بۆ قۆناغی دووەم لە شۆڕشی ئەیلوول كە دواتر بە (شۆڕشی گوڵان)ناسرا، لە ئەنجامدا لە ژێر چاودێری و رێنمایی جەنابی مستەفا بارزانی و سەركردایەتی راستەوخۆی هەردوو سەركردە سەرۆك مەسعود بارزانی و شەهیدی فەرماندە ئیدریس بارزانی لە 10ـی كانوونی یەكەمی 1975 بڕیاری دامەزراندنی سەركردایەتیی كاتی (القیادە الموقتە) بە ئیمزای سەرۆك مەسعود بارزانی ڕاگەیەندڕا و لە 3/3/1976 لە دەڤەری بادینان سەركردە مەیدانییەكانی شۆڕش فەرمان و رێنماییەكانی جەنابی مستەفا بارزانی و سەرۆك مەسعود بارزانی و “شەهید ئیدریس بارزانی”یان جێبەجێ كرد و كەوتنەوە رێكخستن و دابەشكردنی مەفرەزەكانی پێشمەرگە لە سەرانسەری باشوری كوردستان و رێكخستنەوەی جەماوەری دەڤەرەكە. لە شەوی 25/26ی ئایار (گوڵان)ـی 1976 مەفرەزەیەكی پێشمەرگەی پارتی بە سەرپەرشتی (سەید عەبدوڵڵا حاجی ئۆمەرانی) هێڕشێكی جەرگبڕیان كردە سەر بارەگایەكی سوپای عێراق لە (گردی سەڵەوات) و زیانێكی گەورەی گیانی و ماڵییان لە بارەگاكە دا، بەداخەوە لەم هێڕشە پارتیزانییەدا (سەید عەبدوڵڵا حاجی ئۆمەرانی) شەهید بوو و دوو لە هەڤاڵانی بریندار بوون، بەم شێوەیە قۆناغی دووەمی شۆڕشی ئەیلوول بە (شۆرشی 26ی گوڵان) ناسرا.
شۆڕشی گوڵان وەكو گڕێك لە ژیلەمۆی شۆڕشی ئەیلوول هەڵسایەوە و نسكۆی بە رێككەوتنی جەزائیر هێنا و دوژمنانی خستەوە ترس و دڵەڕاوكێ و رۆژدوای رۆژ شۆڕشی گوڵان پەرەی دەسەند و خاكی كوردستان ئازاد دەكرا و دوژمن پاشەكشەی دەكرد.
كارەساتی بۆردومانی ئۆردۆگای زێوە
كاتێك ماڵ و منداڵانی پێشمەرگەكانی ئەیلوول و گوڵان لە چەندین ئۆردوگای پەنابەری لە رۆژهەڵاتی كوردستان نیشتەجێ ببوون وەكو ئۆردوگاكانی (نەلیوانی شنۆ، كانی سپی، دەشتەبێڵ، نەغەدە، سەردەشت، رەبەت، بابەك، مەریوان، كرماشان، خۆی، جەهروم.. هتد)، ئۆردۆگای (زێوە) یەكێك بوو لەم ئۆردۆگایانە لە نزیك شاری (ورمێ)ی رۆژهەڵاتی كوردستان كە ژمارەیەكی یەكجار زۆری ماڵ و منداڵ و كەسوكاری پێشمەرگەكانی پارتی لێی نیشتەجێ ببوون. رژێمی بەعس ئەم كۆمەڵگانشینەی كەسوكاری بێ دیفاعی پێشمەرگەی پارتی بە هەل زانی كە كۆمەڵكوژیان بكات. بۆیە لە بەیانی رۆژی 9/6/1985 كاتژمێر 9:15 دەقیقە هەشت فڕۆكەی رژێمی بەغدا هێڕشێكی بێویژدانانەی كردە سەر كۆمەڵگای (زێوە) و بە مووشەك و بۆمبی ناپاڵم و بۆمبی هێشوویی و شەست تیر و…هتد ئەم كۆمەڵگا سڤیل نشینەی بۆردومان كرد، لەم بۆردومانەدا 150 كەس شەهید بوون و 373 كەس بریندار بوون كە هەموویان ژن و منداڵ و پیر و پەككەوتە بوون. نیازی رژێمی بەعسی بەغدا لەم بۆردوومانەدا جینۆسایدی تەواوی خەڵكی ئەم كۆمەڵگەیە بوو، بەڵكو چۆك بە شۆڕشی گوڵاندا بدات، بەڵام خۆڕاگری و قوربانیدانی پێشمەرگە و خەڵكی كوردستان لەپێناوی خاك و نیشتمان خەونی دوژمنانی لە گۆڕنا و لە ئەنجامدا شۆڕشی گوڵان لە ڕاپەڕینی مەزنی بەهاری ساڵی 1991 سەركەوت و باشوری كوردستان رزگاربوو و بووە خاوەن پەرلەمان و حكوومەت و تەواوی خەڵكی كوردستان بە هەموو نەتەوە و ئایین و ئایینزاكانی ئازاد و سەرفراز بوون.
لەیادی 37 ساڵەی بۆردومانكردنی كۆمەڵگای زێوە، هەزاران سڵاو لە گیانی پاكی مستەفا بارزانی و شەهیدانی كارەساتی بۆردومانی (زێوە) و هەموو شەهیدانی رێبازی بارزانی، هەر سەرفەراز بێت رێبازی بارزانیی نەمر و هەر شەكاوە بێت ئاڵای پارتیمان پارتی دیموكراتی كوردستان، هەر سەركەوتوو بێت رێبەری تەڤگەڕی كوردایەتی سەرۆك مەسعود بارزانی.