خەبات: عەلی بانیشاری:- هەر فەردەیەك ئاردی 50 كیلۆگرامی بەراورد بە شەش مانگ لەمەوبەر زیاتر لە 20 هەزار دینار گرانتر بووە. ئارد فرۆشان دەڵێن: بەرزبوونەوەی نرخی ئارد كاریگەری لەسەر بازاڕی ئارد نەبووە. بەپێی بەدواداچوونەكانی (خەبات) هەر تۆنێك گەنم بەراورد بە ساڵی رابردوو زیاتر لە 200 هەزار دینار گرانتر بووە. هاووڵاتیان نایشارنەوە ترسیان لەوە هەیە نرخی ئارد زیاتر بەرزببێتەوە.

سەنگەر رەقیب، هاووڵاتییەكی نیشتەجێی شاری هەولێر و بەمەبەستی ئارد كڕین رووی لە بازاڕی ئارد فرۆشانی هەولێر كردووە. ئەو دەڵێت: نرخی ئارد زۆر بەرزبووەتەوە و پێشتر دەمانەوێت شتێك هەرزان بێت ئاردە، بەڵام ئێستا ناتوانین ئەو قسەیە بكەین، چونكە هەموو شتێك گرانبووە. دەشڵێت: پێشتر یەك فەردە ئاردی توركی 50 كیلۆگرامیم بە 27-29 هەزار دینار دەكڕی، بەڵام ئەمڕۆ بووەتە 51 هەزار دینار. گوتیشی: وا بڕوات فەردەی ئارد دەگاتە 60 هەزار دینار، ئەوكاتیش بۆ خەڵكی هەژار كڕینی ئاسان نابێت.

ئازاد سدیق، زیاتر لە هەشت ساڵە لە شەقامی ئارد فرۆشانی شاری هەولێر دوكانی ئاردی هەیە و دەڵێت: شەش مانگ لەمەوبەر فەردەیەك ئاردی توركی 50 كیلۆگرامی بە 29 هەزار دینار بوو، بەڵام ئێستا بووەتە 51 هەزار دینار و ئاردی عێراقی نمرە یەك لە 22 هەزار دینارەوە بووەتە 41 هەزار دینار. دەشڵێت: زۆرترین خواست لەسەر ئاردی توركییە، چونكە نانەوا و صەمونخانەكانی كوردستان لەو جۆرە ئاردە بەكاردێنن.

ئەو ئارد فرۆشە ئاماژەی بەوەشدا، لە ئێستادا خراپترین جۆری ئارد كە عێراقی نمونە دووە بە 37 هەزار دینارە. ناوبراو گوتیشی: بەشێوەیەكی گشتی نرخی ئارد بەراورد بە ساڵی رابردوو نزیكەی 80% بەرزبووەتەوە. زیاتر گوتی: نرخی ئارد هیچ كاتێك هێندە بەرز نەبووە.بە بڕوای ئازاد سدیق، جەنگی نێوان رووسیا و ئۆكرانیا و وشكەساڵی لەو هۆكارانەن كە نرخی ئاردیان گرانكردووە.

نەهرۆ سەردار، یەكێكی ترە لە ئارد فرۆشانی شەقامەكە و دەڵێت: دوو هۆكار بوونەتە هۆی بەرزبوونەوەی نرخی ئارد، هۆكاری یەكەم كەمی بارانبارین و ئەو وشكەساڵییە كە رووی لە ناوچەكە كردووە، هۆكاری دووەم دابەشنەكردنی ئاردە لەلایەن وەزارەتی بارزگانی حكوومەتی عێراقەوە بەسەر بریكارەكانی ئارد. ئەو دەشڵێت: ئێمە لە توركیا و ئێران و رووسیاوە ئارد هاوردە دەكەین و پارەیەكی زیاتری لە جاران پێ دەدەین. گوتیشی: نرخی ئارد لە سەرتاسەری دونیادا گرانبووە و وەكو ساڵانی رابردوو نییە.

زیاتر گوتی: لە ئێستادا نرخی یەك تۆن ئارد لە بازاڕدا بەم شێوەیە، عێراقی 600 دۆلاری ئەمریكی، رووسی 620-630 دۆلار، ئێرانی 630 دۆلار، توركی 660 دۆلار. باسیلەوەشكرد، بەهۆی دابەشنەكردنی ئارد لەلایەن بریكارەكانەوە، گرانبوونی نرخی ئارد كاریگەری لەسەر بازاڕی ئارد نەبووە، چونكە هاووڵاتیان لەماڵەوە ئاردیان نییە و ناچارن بیكڕن. نەهرۆ سەردار ئاماژەی بەوەشدا، ئەگەر حكوومەتی عێراق ئارد دابەش بكات، نرخی هەر فەردەیەك ئارد پێنج هەزار دینار دادەبەزێت. پێشیوایە، ئەو ئاردانەی لە بازاڕەكانی هەرێمی كوردستان دەفرۆشرێن كوالێتیان باشە.

بەپێی بەدواداچوونەكانی (خەبات) لە مانگی حوزەیرانی ساڵی رابردوودا هەر تۆنێك گەنمی نمرە یەك بە 640 هەزار دیناری عێراقی بووە، بەڵام لە ئێستادا بە 850 هەزار دینارە، واتە هەر تۆنێك گەنم بەراورد بە ساڵی رابردوو زیاتر لە 200 هەزار دینار گرانتر بووە. بازرگانانی ئارد ئاماژە بەوەدەدەن، بەهۆی كەمی بارانبارینەوە بەرهەمی گەنم بەراورد بە ساڵانی رابردوو بەڕێژەیەكی بەرچاو كەمیكردووە، ئەوەش بووەتە هۆی بەرزبوونەوەی نرخی گەنم لە بازاڕدا و پاشان نرخی ئارد.