(( لە بەرچاوگرتنی خەبات و تێكۆشانی ئەو پێشمەرگە دێرینانەی كەوا بۆ پاراستنی گەل و خاكی پیرۆزی كوردســتان خۆیان نەچەماندەوە و لە جـیاتی ژیانی ژێـردەستی مـەرگیـان هەڵبـــژارد )).

مستەفا خۆشناو
لەبەرچاوگرتن یان رێزلێنان ئاماژەیە بۆ شایستەیی ئەو تاك و توێژە كۆمەلایەتیانەی كەوا هەریەكەو لە بوارێكی تایبەتی خۆیدا چالاكی ئەنوێنێ‌ و لەم ڕێگایەوە ئەتوانێ‌ ڕەزامەندی بەرامبەرەكەی لەسەر كارو پیشەكەی بۆ خۆی دەستەبەر بكات و ببێتە جێگای ڕەزامەندی ئەو كۆمەڵگایانەی كەوا كاریان تێدا دەكات، ئەمەش دەبێتە هاندەرێك بۆ ئەوەی ئەم توێژە زیاتر هەوڵ بدات و برەو بە بەهرەكەی بدات ولەم بوارە چاڵاكتر كارەكانی ئەنجام بدات بۆ ئەوەی شیاوی ئەم ڕێزلێنانە بێت كەوا پێی ئەبەخشرێ‌، ئەوەی ئێمە لێرەدا مەبەستمانە باسی بكەین و بیخەینە ڕوو ناز هەڵگرتن و لەبەر چاوگرتن و رێزلێنانە لە خەبات و ماندوو بوون و گیان فیدایی ئەو پێشمەرگە قارەمانانەی كەوا ڕۆژانێك سوارچاكی كۆڕی خەباتی كوردایەتی بوون و لە سۆنگەی پەرۆشیان بۆ خەبات و بەرخودان و پارێزگاری لە شكۆی تاكی كورد، بۆ ئەم مەبەستەش پێش هەر دەسپێكێك مەرگی خۆیان كردبووە دیاری و بە نەفەسێكی شۆڕشگێڕانە سینگی خۆیان كردبووە قەڵغانێكی پتەو لە بەرامبەر گوللەی نەیارانی كورد بۆ بەرگری لە گەل و خاكی پیرۆزی كوردستان و ئەویش لە لایەن سەركردایەتی سیاسی كورد و حكومەتی هەرێمی كوردستان بە لەبەرچاوگرتنی خەبات و ماندووبوونی ئەو توێژە تێكۆشەرە و چاوخشاندنەوەیەك بە ژیان و گوزەرانی خۆیان و خانەوادەكەیان و پشتگوێ‌ نەخستنیان چونكە ئەوەی تێبینی ئەكرێ‌ تاوەكو ئێستا لە ڕێزلێنانی سەرزارەكی زیاتر نیە و شتێكی ئەوتۆیان بۆ نەكراوە كەوا جێگای ڕەزامەندی و شانازی ئەوان و خانەوادەكانیان بێت، بەبێ‌ ئەوەی ئەو ڕێزلێنانە بكرێتە كردار تاوەكو پێشمەرگە دێرینەكانیش هەست بەوە بكەن كەوا ئەوانیش توێژێكی هەرە گرینگ و سەربەرزی لەبیر نەكراوەی نێو ئەو كۆمەڵگایەن و شانازی بەو ڕۆژە سەختانە بكەن كەوا ڕۆژانێك ئەوان بوون مێژوویان تۆمار كردووە و شەڕی مان و نەمان و دەستە و یەخەی داگیركەرانی كوردستانیان كردووە و وەكو ڕەمزێكی زیندووی گەلەكەیان ئەمێننەوە، لێرەدا پێویستە ڕۆلی پێشمەرگە دێرینەكان لە ڕۆژانی سەختی خەبات لەبەرچاو بگیرێ‌ كەوا ڕۆژانێك بوو ئەركێكی زۆر قوڕسی نیشتمانی ونەتەوەیان خستبووە سەر شانی خۆیان و كوڕی ڕۆژە سەختەكانی كۆڕی خەبات كوردایەتی بوون وە لە بارودۆخێكی هەرە سەختی ژیاندا كە بە بێ‌ بەرگ و خواردن و خواردنەوە و ڕەفاهیەت و خۆشگوزەرانی ژیان وە بەخوێن و مەرگی خۆیان پارێزگاریان لە شكۆی تاكی كورد ئەكرد ، بەتایبەتی ئەو پێشمەرگە گیان لەسەر دەستانەی كەوا ساڵانیك بوو هەڵۆ ئاسا عاشق بە لووتكە چیا سەركەشەكانی نیشتیمان ببوون وە بۆ بەرگری لە شكۆی تاكی كورد و ماف وداخوازیەكانی گەلی كوردستان لە ژێر درووشمی (یان كوردستان یان نەمان ) دژی ستەمكاران و داگیركەرانی خاكی كوردستان تێدەكۆشان وبرووسك ئاسا پەلاماری ئەو دوژمنە دڕندانەیان دەدا كەوا لە كێبڕكێ‌ دا بوون بۆ سڕینەوەی مێژوو و شوناسی تاكی كورد و داگیركردنی خاكی پیرۆزی كوردستان.

لەناو كۆمەڵگاو لە ڕووی میدیایی و لە ڕواڵەتدا پێشمەرگە ناوێكە چەندی بڵێی بەرزو پیرۆزە و شایانی پێدا هەڵدانە ، تەنانەت خودی جەنابی سەرۆك بارزانیش سەبارەت بە پێشمەرگە هەردەم بەشایستەییەوە لە زۆرێك لە بۆنەكان چەندین جار ئەو پەیڤەی دووبارە كردۆتەوە و فەرموویەتی: ((پێشمەرگایەتی بەرزترین پلەی خەباتە )) بەڵام ئەگەر لەڕووی كردارەوە سەیری پێشمەرگەی ڕاستەقینە بە تایبەتی پێشمەرگە دێرینەكانی سەردەمی شاخ بكەین ڕەنگە هەڵە نەبم ئەگەر بڵێم ئێستا پێشمەرگە پشتگوێخراوترین وهەژارترین و بێ‌ نازترین توێژە لە ناو كۆمەڵگادا تەنانەت ئەوانەی لە دام و دەزگاكانی حكومەتی هەرێمیش لە خزمەت بەردەوامن وەكو پێویست ڕێز لە خەبات و تێكۆشانیان نەگیراوە و پشتگوێ‌ خراون كەوا بێگومان ئەمەشیان جێگای هەڵوەستە لەسەر كردنە و دەبێ‌ بپرسین بۆ ئەبێ‌ وابێ‌؟!.

لەڕووی وەزیفیشەوە كەمتەرخەمیەكی زۆر هەیە بەرامبەر بە خەباتی پێشمەرگە و ئەو پلەو پۆستانە بە پێشمەرگە نەدراوە كەوا شایانیەتی سەرەڕای ئەوەی كەوا لەناو ئەو پێشمەرگە دێرینە قارەمانانە چەندین كەسی جوامێرو كارامە هەن كەوا خاوەن بڕوانامەی ئەكادیمی بەرز و توانا و بەهرەیەكی زۆرن لە مەجالە جۆراو جۆرەكانی بەڕێوەبردنی ژیانی كۆمەڵگا ، بۆیە پێویستە سەركردایەتی سیاسی كورد و حكومەتی هەرێمی كوردستان ئاوڕێكی بەخێر لەم توێژە گرینگە بداتەوە بۆ ئەوەی شانازی بەو خەبات و بەرخودانە بكات كەوا بە خوێنی خۆیان ئەمڕۆیان درووست كرد و ئێستاش هەر خۆیان ئەركی پارێزگاری لەو ئەزموونەیان كەوتۆتە سەرشان ، هەروەها خانەوادە و منداڵەكانیان ئەبێ‌ هەست بەوە بكەن كەوا ڕابردووی خەباتگێڕانیان ڕێزیان لێ‌ گیراوە و ڕەنج و تێكۆشانیان لەبەر چاو گیراوە و ئێستا بۆتە جێگای شانازی بۆیان و پێی سەربەرزن ، وە بۆ پاڵپشتی لە ووتارەكەشم ئەگەڕێمەوە بۆ فەرموودەیەكی بارزانی نەمر كەوا لەسەردەمی شۆڕشی ئەیلول لەبەردەم پۆڵێك پێشمەرگە ترسی خۆی لە پشتگوێ‌ خستنی پێشمەرگە قارەمانەكان لە داهاتوو نەشاردۆتەوە كاتێك ئەفەرمووی: ((دڵنیام كە سەرئەكەوین بەڵام ترسم لەوەدایە ئەو كات ئەوانەی زەحمەتیان كێشاوە و خەباتیان كردووە لە بیر بكرێن )).

نووسەر وەك پێشمەرگەیەكی بەشداربووی شۆڕشی گوڵانی پێشكەوتنخواز لە گەڵ پۆڵێك پێشمەرگەی ماندوو نەناس(لە راِستەوە دووم كەس لە وەستاوەكان)