ئه‌مڕۆ چوارشەممە لە سەلاحەددین، سەرۆک مەسعود بارزانی پێشوازی لە میخاییل بۆگدانۆڤ جێگری وەزیری دەرەوەی ڕوسیا و شاندێکی یاوەری کرد.
لە دیدارەکەدا جێگری وەزیری دەرەوەی ڕووسیا سڵاوی سەرۆک پووتین و وەزیری دەرەوەی ڕووسیای بە سەرۆک بارزانی گەیاند و جەختی لە بایەخ و پێگەی گەلی کوردستان و ڕۆلی ھەرێمی کوردستان لە عێراق و ناوچەکە کردەوە، ئەوەشی خستەڕوو کە بە لای ڕووسیاوە ھەرێمی کوردستان ڕۆلێکی گەورە لە عێراق دەگێڕێ و فاکتەری سەقامگیرییە.
ھەر لەو کۆبوونەوەیەدا بیروڕا لەبارەی بارودۆخی سیاسی عێراق و ھەڵبژاردنی ئەنجوومەنی نوێنەرانی عێراق لە ئۆکتۆبەری ڕابردوو ئاڵوگۆڕکران.
لە بەشێکی تری ئەو دیدارەدا ھەڕەشەی تیرۆر لەسەر سەقامگیری ناوچەکە تاوتوێ کرا و ھەردوولا ھاوڕابوون لەسەر ئەوەی پێویستە ھۆکارەکانی سەرھەڵدانی تیرۆر ڕیشەکێش بکرێن.
بارودۆخی سووریا تەوەرێکی تری ئەو کۆبوونەوەیە بوو، سەرۆک بارزانی بۆچوون و نیگەرانییەکانی خۆی لەبارەی ئاییندەی گەلی کورد لە سووریا بە شاندی میوان گەیاند.
لە کۆتایی کۆبوونەوەکەدا جێگری وەزیری دەرەوەی ڕووسیا وێڕای ئاماژەدان بە پەیوەندییە مێژووییەکانی گەلی کوردستان و گەلی ڕووسیا، ڕۆڵی مێژوویی بنەماڵەی بارزانی لە پەرەپێدانی ئەو پەیوەندییە بەرز نرخاند و خوازیاری ئەوەش بوو کە پەیوەندی وڵاتەکەی لەگەڵ ھەرێمی کوردستان گەشەی زیاتر ببینێت.
