ئه‌مڕۆ هونه‌رمه‌ند و ئاوازدانه‌ری به‌ناوبانگی كورد مامۆستا محه‌ممه‌د عه‌لی شاكر به هۆی په‌تای كۆرۆناوه گیانی له ده‌ست دا.
ئه‌مڕۆ پێنجشه‌ممه 24/12/2020، مامۆستا ( محه‌ممه‌د عه‌لی شاكر) هونه‌رمه‌ند و ئاوازدانه‌ری به‌ناوبانگی كورد له ته‌مه‌نی 74 ساڵاندا و له یه‌كێك له نه‌خۆشخانه‌كانی قامیشلۆی رۆژئاوای كوردستان به هۆی كاریگه‌رییه‌كانی په‌تای كۆرۆناوه كۆچی دوایی كرد.
مامۆستا محه‌ممه‌د عه‌لی شاكر، برای هونه‌رمه‌ندی گه‌وره مه‌حموود عه‌زیز شاكره، كه پێش 50 ساڵ كاروانی هونه‌ریی ده‌ست پێ كردووه و سه‌دان ئاواز‌ی بۆ هونه‌رمه‌ندانی كورد داناوه.
محه‌ممه‌د عه‌لی شاكر، كاری ئاماده‌كردن و ئاوازدانانی بۆ 270 گۆرانی داناوه و خۆشی خاوه‌نی 30 گۆرانییه.
ئه‌و ئاوازدانه‌ره‌ی كورد لە ساڵی ١٩٤٦ لە گرێ سپی ڕۆژئاوای کوردستان لەدایکبووە و زمانی ئینگلیزی لە حەلەب خوێندووە، هاوکات لە ساڵی ١٩٦٨ چۆتە سەرێ کانی و مامۆستا بووە، له پای كاره هونه‌رییه‌كانیدا، چه‌ندان جار خه‌ڵاتی پێ دراوه و رێزی لێ گیراوه.
