ئەمڕۆ هەینی تیمی بەرەنگاربوونەوەی پەتای كۆرۆنا لە پارێزگای هەڵەبجە لە کۆنفرانسێکی رۆژنامەوانیدا دوایین زانیارییان لە بارەی دۆخی تەندروستیی لە پارێزگاکە خستە ڕوو و هۆشداریشیان دا لە بەرزبوونەوەی بەرچاوی ژمارەی تووشبووانی ڤایرۆسی کۆرۆنا لە دەڤەرەکە.
د. جیهاد ئیبراهیم، سەرۆكی تیمی ڕووبەڕووبوونەوەی پەتای كۆرۆنا لە پارێزگای هەڵەبجە لە کۆنفرانسە رۆژنامەوانییەکەدا ڕایگەیاند: ”ژمارەیەكی زۆر كەیسی كۆرۆنامان هەیە لە هەڵەبجە و بەپێی دوا ئاماری وەزارەتی تەندروستی تاوەکو (٢/٩/٢٠٢٠) زیاتر لە (٩٠٠)نەخۆشی كۆرۆنا هەبووە لە پارێزگای هەڵەبجە، ئەو ژمارەیە بە (پی سی ئاڕ) دیاریكراون ، بەڵام نەخۆشی كۆرۆنا تەنیا بە (پی سی ئاڕ ) دیاری نابێت من دڵنیاتان دەكەمەوە زیاد لە ٢ هەزار نەخۆشمان هەیە لە هەڵەبجە و ئێمە وەكو پزیشكان بینیومانن و لە ماڵەوە و لە نەخۆشخانەكان چارەسەریان وەرگرتووە، ئێستا هەندێكیان لە ژێرچاودێریدان و هەندێكی دیكەیان چاك بوونەتەوە و هەندێكیشیان دۆخی تەندروستیان جێگیر نییە و لە نەخۆشخانەی وەفان”.
ڕونیشیكردوە: ”ئێستا زیاتر لە (٣٠) نەخۆش لەناو نەخۆشخانەی وەفا خەوێندراون و دۆخی تەندروستی هیچیان جێگیر نییە و هەموویان پێویستیان بە ئۆكسجینە و چەند كەسێكیشیان لە ژێرچاودێری چڕدان”.
بە گوتەی سەرۆكی تیمی ڕووبەڕووبوونەوەی پەتای كۆرۆنا لە پارێزگای هەڵەبجە، دۆخی تەندروستیی و توشبووانی كۆرۆنا لە هەڵەبجە لەمەترسیدایە و پێویستە لایەنە پەیوەندیدارەكان بێنە سەر هێڵ.
گوتیشی: ”كۆرۆنا لە هەڵەبجە خەریكە زیاتر دەبێت، ئەگەر ٥ نەخۆشی تر هەبێ نەخۆشخانەی وەفا پڕ دەبێت و توانای وەرگرتنی هیچ نەخۆشییەكی ترمان نامێنێ، بۆیە لێرەوە پەیامێك دەگەیەنم ئەگەر لە ماوەیەكی دیاریكراودا لایەنی پەیوەندیدار نەیەتە سەرخەت توانای مرۆڤانەمان نامێنێ و خۆم و هاوكارەكانم دەست لەم كارە هەڵدەگرین”.
هاوكات ئاراس حەمە سەعید، بەڕێوەبەری نەخۆشخانەی وەفا لە کۆنفرانسە رۆژنامەوانییەکەدا رایگەیاند: ”پێویستە بودجەیەكی تایبەت بۆ ڕووبەڕووبوونەوەی كۆرۆنا بۆ هەڵەبجە دابین بكرێت، ئەگەر دابین نەكرێت کارەکانمان دەوەستێت”.
