وەزارەتی تەندرووستی عێراق ئاماری 24 كاتژمێری رابردووی ڤایرۆسی كۆرۆنای لەسەرانسەری وڵاتدا بە ھەرێمی كوردستانیشەوە راگەیاند.
بەپێی راگەیاندنەكە، لە شەوێك و رۆژێكدا 16 ھەزار و 591 پشكنین بۆ گومانلێكراوانی تووشبوو بە ڤایرسی كۆرۆنا ئەنجامدراوە، لەو پشكنینانەدا دەركەوەتووە، 3 ھەزار و 47 كەسی دیكە لە سەرانسەری عێراقدا تووشی كۆرۆنا بوونە.
لە راگەیاندنەكەشدا ھاتووە، لەو 24 كاتژمێرەدا، 113 حاڵەتی گیان لەدەستدان بە ھۆی كۆرۆناوە تۆماركراوە، بەمەش ژمارە مردووان بەھۆی كۆرۆناوە لە عێراقدا گەیشتە 5ھەزار و 161 كەس. ھاوكات 2 ھەزار و 583 كەسیش لە نەخۆشیەكە چاكبوونەتەوە.
لە سەرەتای سەرھەڵدانی پەتای كۆرۆنا لە عێراقدا، تاكو ئێستا 140 ھەزار 603 حاڵەتی تووشبوون لەو وڵاتەدا تۆماركراوە. لەو ژمارەیە 101 ھەزار و 25 كەس چاكبوونەتەوە، واتە بەڕێژەی 71.9%. ژمارەی ئەو تووشبوویانەی كە تاكو ئێستا لە نەخۆشخانەكاندا ماون 34 ھەزار وو 417 حاڵەتن. لەم ژمارەیەش 517 كەس لەژێر چاودێری چڕ دان.
