لەم رۆژانە كتێبی خەڵاتی میللی لەلایەن كۆمەڵانی خەڵكی دڵسۆزەوە- دووەم گەنجینەی رێزلێنان بە بەرگێكی جوان و قەشەنگ قەبارەی گەورە و 264 لاپەڕەی رەنگاوڕەنگەوە، لە نووسین و سەرپەرشتی مومتاز حەیدەری و ئامادەكردنی هیوا عەباس و بۆتان مەعروف كەوتە بەر دیدی خوێنەران.ئەم كتێبە بریتییە لە چەند بابەتێك و بەدواداچوون و هەموو ئەو هەواڵانەی لەبارەی مامۆستا مومتاز حەیدەری بەهۆی قاچ شكانەكەیەوە بڵاوكراوەتەوە، هەروەها هەموو ئەو بەڕێزانەی سەردانیان كردووە ناو و وێنەیان بڵاوكراوەتەوە.
مامۆستا حەیدەری بەناوی قەڵەمێكی داربەڕوو لە لاپەڕە 6ی ئەم كتێبەدا كە وەك پێشەكییەكە بەناونیشانی نازانم چۆن دەخوێندرێتەوە..؟! پێناسەیەكی كتێبەك دەكات و دەنووسێت:”ئەم كتێبەی بەردەست، ئایا لە روانگەی بەرژەوەندی حزبایەتی ئایدۆلۆژیا و هەمەڕەنگ؟ برادەرایەتی سەر مێز..؟ خزمایەتی و مۆدێرنی سەردەمی عەشیرەتگەری ..هتد.
چۆن دەخوێندرێ..؟ یان: وەك كتێبێكی نوێی كوردی، ناوەرۆكێكی نوێی سەرنج راكێش، بگرە لە سۆنگەی شێواز و رێبازێكی نموونەیی داهێنان، هاوكات دەبێژین: لە نووسینی ئەم كتێبە ژمارەیەكی زۆر بەشدارن، ئەوەش خاڵێكی هەرە گەشی كتێبەكەیە..چۆن دەخوێندرێ..؟ ئەوەتە، رووداوێكی تاكەكەسی، دیاردەیەكی فرە جوانی كۆمەڵایەتی، مرۆڤپەروەری، نشتیمانی، كلتووری، دروست دەكات. لە ئەنجامەكەیدا كتێبی خەڵاتی میللی دێتە كایەوە، بێگومان كتێبخانەی كوردی شبە گەرمی لە ئامێزی دەگرێ، تۆ بڵێی بەتەواوی هەقی پێ بدرێ!!؟”.
خەبات یەكەم رۆژنامە بوو كە هەواڵی رووداوی قاچ شكانی مامۆستا حەیدەری بڵاوكردەوە، لەم كتێبەشدا ئاماژە بەوە كراوە كە خەبات دەست پێشخەری كردووەهەر لەو رۆژەی كەوتۆتە نەخۆشخانە و دواتر كە لە ماڵەوە كەوتووە تا چاكبوونەوەی، ژمارەیەكی زۆری چین و توێژەكانی كوردستان، بەتایبەتیش كەسایەتی و نووسەر و شاعیر و رۆژنامەنووسان سەردانیان كردووە و چەپكەگوڵیان پێشكەش كردووە، ئەم كتێبە بەرهەمی ئەو قاچ شكانەی مامۆستا حەیدەرییە، هیوای تەندروستییەكی باش بۆ مامۆستا مومتاز حەیدەری نووسەر و رۆژنامەنووسی گەلەكەمان دەخوازین. شایانی باسە، كە كتێبەكە لە چاپخانە دەرچوو، مامۆستا مومتاز خۆی سەردانی رۆژنامەی خەباتی كرد و یەكەم شوێن كە كتێبەكەی بەدیاری بۆ برد خەبات بوو، سوپاسی ئەم دیارییەیان دەكەین و خەرمان بەرەكەت.
