ڕاپۆرت/ سەید فاتیح بەرزنجی
ژمارەیەك لە هاووڵاتییانی گەڕەكە جیاجیاكانی شاری هەولێر پەیوەندییان پێوەكردین سەبارەت بە كێشەی پارەی ئاو، كە لە ئێستادا بۆتە پێوەر و بە وتەی هاووڵاتییان دوای بەستانی پێوەری ئاوی ماڵان و لە كاتی كۆكردنەوەی پارەی ئاو بە پێوەر، پارەیەكی زۆر لەسەر هاووڵاتییان كۆبۆتەوە و گلەییان لە هاتنەوەی ئەو پارە زۆرە هەیە بۆ ئەم مەبەستەش وەك ڕۆژنامەی خەبات ئەو بەدواداچوونەمان كرد و سەردانی بەڕێوەبەرایەتی ئاوی هەولێرمان كرد بۆ ئەوەی ئەو كێشەیە بخەینە بەردەمی بەڕێوەبەری ئاوی هەولێر.
سەرەتای ڕاپۆرتەكەمان بە وەرگرتنی گلەیی و گازاندەی هاووڵاتییان دەست پێكرد، لە گەڕەكی عەدالەی كۆن، مام خدر قورشاغلویی گوتی: ماوەیەكە ئەو خانووەم كڕیوەو بڕی300 هەزار دینارم بۆ هاتۆتەوە و هۆكارەكەشی نازانم، پێویستە فەرمانگەی ئاوی هەولێر بەدواداچوون بۆ هاتنەوەی ئەو پارە زۆرە بكات هەر تەنها ئەو پارە زۆرە بۆ من نەهاتۆتەوە بەڵكو چەندین هاووڵاتی گلەیی لە هاتنەوەی پارەی زۆری ئاوی ماڵان هەیە.
مام كەریم گوتی: داوا لە ئاوی هەولێر دەكەم كە بەدواداچوونمان بۆ بكات لەسەر هاتنەوەی ئەو پارە زۆرەی ئاو، من 320 هەزار دینارم بۆ هاتۆتەوە و ئەو پارەیەم بەلاوە زۆرە.
قادر دانیشتوویەكی دیكەی گەڕەكی عەدالە بوو و گووتی: پێویستە ئەوەی پارەی زۆری بۆ هاتۆتەوە پارەكە بەقیست بدات لەبەر ئەوەی هەندێ كەس پارەیەكی زۆریان بۆ هاتۆتەوە.
لوقمان شێخانی لە گەڕەكی نەورۆز گوتی: ماوەیەكە پێوەرم بەستاوە و بڕی360 هەزار دینارم بۆ هاتۆتەوە و هۆكارەكەی نازانم، دەبووایە فەرمانگەی ئاوی هەولێر هاوكاری هاووڵاتییانی بكردایە تا ئەو هەموو پارەیە لەسەر هاووڵاتییان كۆنەبێتەوە.
عوسمان یەكێكی دیكەی گەڕەكی نەورۆز بوو و گووتی: بۆئەو جارە بڕی280 هەزار دینارم بۆ هاتۆتەوە و پارەكەش زۆرە و توانای دانی ئەو هەموو پارەیەم نییە نازانم چی بكەم؟
سەبارەت بە گەیاندنی گلەیی و گازاندەی هاووڵاتییان سەردانی بەڕێوەبەرایەتی ئاوی هەولێرمان كردو لە وێدا ئەندازیار ئاری ئەحمەد، بەڕێوەبەری بەڕێوەبەرایەتی ئاوی هەولێر گوتی: ئاو بە دوو شێواز بۆ هاووڵاتییان دابین دەكرێت، یەكێكیان بەهۆی بیرە ئاوەكانی ناو گەڕەكەكانە و ئەوی دیكەشیان بەهۆی پڕۆژەی ئاوی ئیفرازەوە ئاوی پاك و خاوێن بۆ هاووڵاتییان دابین دەكەین و هەوڵ دەدەین لەشاری هەولێر كێشەی كەم ئاوی چارەسەر بكەین بۆ ئەوەی چیتر كێشەی كەم ئاوی لە وەرزی هاوین ڕوونەدات، ئەگەرچی ڕۆژانە ژمارەی دانیشتووان و ژمارەی خانوو دروستكردن لە شاری هەولێر لە زیادبووندایە و هەوڵی ئەوەش دەدەین بە هۆی پڕۆژەی ئاوی ئیفراز بە چەند قۆناغێك ئاو بگەیەنینە هاووڵاتییان.
گوتیشی: ئەو پڕۆژەیە كەوتۆتە گوندی ئیفراز لەسەر زێی گەورە و بریتیە لە سێ پڕۆژە وەك پڕۆژەی ئاوی ئیفراز یەك و پڕۆژەی ئاوی ئیفراز دوو لەگەڵ پڕۆژەی ئاوی ئیفراز سێ كە لە 60%ی لەساڵی2006 تەواوبووە و لە 40%كەی دیكەی ئەو پڕۆژەیە لەساڵی2015 تەواوكراوە و لەئێستاشدا هەرسێ پڕۆژەكەی ئاوی ئیفراز بە هەموو توانای خۆیان كاردەكەن و لەخزمەتی هاووڵاتییان دایە.
ئەندازیار ئاری ئەحمەد بەڕێوەبەری ئاوی هەولێر سەبارەت بە پلان و بەرنامەیان بۆ داهاتوو ڕونیكردەوە: بەپێی پلان و بەرنامەی خۆمان لە پلانمان دایە كە گرنگی بە ئاوی سەرزەوی بدەین و ئاوی ژێرزەوی دابخەین، وەك ئەنجامدانی پڕۆژەی ئاوی هەولێر چوار كە پڕۆژەیەكی زۆر گەورەیە و توانای بەرهەمهێنانی25 هەزار مەتر سێ جا ئاوی لە هەر كاتژمێرێكدا هەیە، دیارە ئەوەش یەكسانە بە هەموو بیرە ئاوەكانی ناو شاری هەولێر هەیە بەتوانای هەر سێ پڕۆژەكە كە ئێستا لەكاركردندا بەردەوامە. لەشاری هەولێر نزیكەی هەزار و سەد و شەش بیری ئاو هەیە و قەبارەیەكی زۆری ئاو بەرهەم دەهێنن و لەدوای تەواوبوونی ئەو پڕۆژە گەورەیە چیتر كێشەی كەم ئاوی نامێنێ، دیارە ئەو پڕۆژەیە لە ڕینگی شەقامی خێرای120 مەتری بەرەو دەرەوە تاوەكو ڕینگی شەقامی 150 مەتری ئاوی پڕۆژەكە دابەش دەكرێت لەگەڵ ئەو شوێنانەی كە فەرمانگەكانی بەڕێوەبەرایەتی ئاوی هەولێرە وەكو دارەتوو- بنەسڵاوە- كەسنەزان- شاوێس- پیرزین- بەحركە- عەنكاوە- كانی قرژاڵە- سێبیران دەخرێنە ناو ئەو پڕۆژەیە و دیزاینی ئەو پڕۆژەیە تەواو بووە و چێك كراوە و ئومێدەوارین كە لەئایندەیەكی نزیكدا جێبەجێ بكرێت و بچێتە پڕۆسەی تەندەرینگ وجێبەجێ بكرێت و دوو ئامانجی سەرەكیمان هەیە لەو پڕۆژەیە وەك داخستنی هەموو بیرە ئاوەكان بەتەواوی و ڕوو لە بەكار هێنانی ئاوی سەر زەوی بكەین و ئامانجی دووەمیش ئەوەیە بۆ ئەو شوێنانەی كە پچڕپچڕ ئاویان دێت كارێكی وابكەین تا بەردەوام ئاویان پێ بدرێت و چارەسەری كێشەی ئاویان بۆ بكرێت.
چارەسەری كێشەی كەم ئاوی دەكەین
دواتر سەبارەت بەكێشەی كەم ئاوی ئەندازیار ئاری ئەحمەد قادر بەڕێوەبەری ئاوی هەولێر ڕونیكردەوە: لەبەر ئەوەی هاووڵاتییان ڕۆژانە ئاوێكی زۆر بە فیڕۆ دەدەن چ بە شووشنی ئوتومبێل یاخود شووشتنی بەردەرگا و ئاودانی باخچەی بەردەمی ماڵەكانیان، ئاوێكی زۆر بەفیڕۆ دەڕوات و ڕادەی هوشیاری هاووڵاتییان لاوازە لە دەست بە ئاو گرتن، و هاووڵاتییان دەستیان بەبەستانی پێوەر كردووە و پێوەرەكە پێوەری میكانیكییە و ئەو سیستەمەی كە بەكاری دەهێنن بۆ خوێندنەوەكەی سیستەمێكی ئەلیكترۆنی زیرەكە و سیتەمی كۆكردنەوەی داهاتە ئەوە لەلایەك لەلایەكی دیكە هاووڵاتییان فێری ئەوە دەبن كە چیتر ئاو بەفیڕۆ نەدەن و دەست بە ئاوەوە بگرن دواتر سەبارەت بەگ لەیی هاووڵاتییان ئەندازیار ئاری ئەحمەد قادر گوتی: دوو جۆر پارەی ئاو هەیە یەكێكیان لەسەر پێوەر وەردەگیرێت هەیە قەرزی پێشووە ئەوەیان لەوانەیە هاووڵاتییان ئاگادارنەبووبن یاخود ئێمە لەو گەڕەكانە خوێنەری پێوەرمان نەبووە و بەشێكی زۆری ئەو خوێنەری پێوەرانەمان (عەدادانە) خانەنشین بوون و جێگرەوەیان نەبووە، حاڵەتی دووەمیش ژمارەیەك لە هاووڵاتییان گوێ لە ڕێنماییەكانی فەرمانگەی ئاو ناگرن، جگە لەوەش ژمارەی گەڕەكەكان زۆر زیادی كردووە و نەمانتوانیوە عەدادی بۆ دابین بكەین بۆیە لەمەودوا چارەسەری ئەوەش دەكرێت بۆ كۆكردنەوەی داهاتی ئاو بەهۆی تاپۆوە توانرا ئەو كێشەیە چارەسەر بكەین، ئەویش لەساڵی2016 لەمانگی هەشت، كاری تەسفیەی ئاو كرا، كە هاووڵاتی دێت بۆ پاكانە، ئەو كاتە پاكانەی ئاو دەكات و هەموو پارەی ئاو و قەرزی ئاوەكە بەتەواوی دەدات. چەندین ساڵ بوو ژمارەیەكی زۆری هاووڵاتییان پارەی ئاویان نەدابوو هەر هەموو پارەی ئاویان لەسەر كۆببۆوە، ئەو كات پارەی ئاو بەپێی مەتر چوار گۆشە بوو ئەگەر خانووە كە100 مەتر بووبێت5 هەزار دیناری بۆ هاتۆتەوە ئەگەر200 مەتری بووبێت ئەوا10 هەزار دیناری بۆ هاتۆتەوە دیارە هاووڵاتییان پارەی ئاوی چەند ساڵیان لەسەر كۆبۆتەوە و هەر مانگێك پارەی نەدابێت ئەوا لەسەری تۆمار كراوە و پارەی لەسەر كۆبۆتەوە و حاڵەتی دووەمیش پارە كۆكردنەوە بە پێوەرە و پارەكە دەخوێنێتەوە و ئەوەی گلەیی هەیە دەتوانێ سەردانیمان بكات تا بەدواداچوونی بۆ بكەین ئەو پێوەرە لە ڕۆژی 31/8 ساڵی2018 كاری كۆكردنەوەی داهات بە كۆمپانیای خەتیب و عەلەم درا بەم شێوەیە مانگی 9 و 10 و11 و12 بەشێوەی مەتر چواگۆشە لەلایەن كۆمپانیا كاری بۆ كرا، بەڵام هی مانگەكانی 1 و 2 و 3 و 4ی ئەمساڵ وەرگیراوەو هەرلەمان مانگەكانی 1 و 2 و 3 و 4یش دوو خوێندنەوەی بۆ كراوە واتا خوێندنەوەی پێوەرەكان كراوە لەگەڵ مانگی5 و6 بەراورد دەكرێت، جیاوازی نێوان پارەكان لەو ماوەیە خوێندراوەتەوە بۆ هاووڵاتییان دەگەڕێندرێتەوە.
