| وەڵامی پارتی بۆ نەیارانی |
2018-05-15 |
 |
|
|
شێركۆ حەبیب
پارتی دیموكراتی كوردستان كاتێك لە ساڵی 1946 بەڕابەرایەتی باوكی رۆحی كورد، جەنابی مەلا مستەفا بارزانیی نەمر دامەزرا، باوەڕی بە دیالۆگ و گفتوگۆ بووە بە مەبەستی دابینكردنی مافە رەواكانی میللەتی كورد، هەر لەو روانگەشەوە هەوڵەكانی چڕكردەوە لە خەباتی چەكداری و كاتێك پەنای بۆ جەنگ برد مەبەستی بەرگریكردن بوو لە خاك و میللەتی كوردستان دوای ئەوەی نەیارانی بەدڕندانە هێرشی جەگدارییان كردە سەر كوردستان.
پارتی لە ماوەی خەباتی 72 ساڵەی پڕ لە سەروەری هەردەم هەوڵیداوە گرفتەكان لە رێگای گفتوگۆ چارەسەر بكات، ئەم هەوڵانەش لە رێنمایی و بۆچوونەكانی جەنابی سەرۆك بارزانی و خەباتی زیاتر لە نیو سەدە بەدی دەكرێت، كە هەردەم لە هەوڵی دابینكردن و بەرقەراریی ئاشتی و تەبایی و پێكەوەژیانە. ئەگەرچی لە ماوەی رابردوودا نەیارانی پارتی چ لە ناوخۆی كوردستان و عێراق یا دەرەوە خەونیان بە شكستی پارتییەوە دەبینی، بەتایبەتی دوای ئەنجامدانی ریفراندۆم و تۆمەت خستنەپاڵ پارتی كە هۆكاری ئەو نەهامەتییە بوو كە بەسەر كوردستاندا هاتووە، لە ئاكامی گشتپرسی، تەنانەت هەندێك لایەن وایان بیردەكردەوە كە پارتی كۆتایی پێهات و پێگەی خۆی لەدەستداوە، ئەمە لە كاتێكدا پارتی شانازی بە گشتپرسی و هەوڵی سەربەخۆیی كوردستان دەكات و شانازی بە ئاكامی سەركەوتنی گشتپرسی دەكات و ئەگەر خیانەتكاری و هەوڵەكانی خاینان و خۆفرۆشان نەبووایە لە 16ی ئۆكتۆبەردا، ئێستا بارودۆخەكە بەشێوازێكی دیكە دەبوو.
لەم ماوەیەدا زۆربەی حزبەكان بەتایبەتی ئەوانەی لەمدواییە دامەزران، پێشبڕكێیان دەكرد لەسەر ئەوەی دەنگی ئەندامان و كادیران و لایەنگرانی پارتی بەدەستبێنن، لەو باوەڕە دابوون پارتی پەرتوبڵاوی تێكەتووە، لە روانگەی خۆیان، تێڕوانینیان بۆ پارتی دەكرد بێئەوەی بیر لەوە بكەنەوە كە پارتی سەرۆك و رابەرێكی وەك جەنابی سەرۆك بارزانی و خانەوادەی بارزانی كە سەرجەم پارتییەكان كۆدەكاتەوە و سەرجەمیان كۆكن لەپێناو خەباتكردن و دابینكردنی مافەكانی میللەتی كورد.
پارتی دیموكراتی كوردستان دوور لە هەموو وەڵامدانەوەیەكی نەیارانی، ئەو بابەتەی بۆ دەنگدەرانی جێهێشت، كە بڕیاری لەسەر بدەن، ئەوە بوو دەبینین سەرەڕای ساختەكاری زۆریش، بەتایبەتی لە دەڤەری سلێمانی، بەڵام پارتی توانی سەربەرزانە زۆرترین دەنگ بەدەستبێنێت و ببێتە یەكەمی كوردستان و دەنگەكانی بەرامبەر سەرجەم حزبەكانی تری كوردستان بێت، ئەمەش خۆی لە خۆیدا، باوەڕی جەماوەری كوردستانە بەو حزبە و سەركرایەتی و رێبازی پیرۆزیی بارزانیی نەمر و پشتگیری و پاڵپشتی جەنابی سەرۆك بارزانی و سەربەخۆیی كوردستانە، بەمەش پارتی دووپاتیكردەوە كە هەردەم پێشەنگ و پێشڕەوی كوردە و دەنگ و هەوڵی لەرزۆكی هیچ لایەنێكیش كاری تێناكات، چونكە پارتی رەگوڕیشەی لە دڵی كوردستانییاندایە. |
| |
|
|
|
