لیوا حەسەن نوری
کوردستان ژ وان وەلاتانە یێن کو هەمی دەمان ناچار بوویە خو بخو و ب هێزا خو، خو بسەلمینیت و خو بچەسپینیت د ناڤ ئاخا خو دا، و هەر زوو باش تێگەهشتیە کو ئەڤ وەلاتە هەژی قوربانیدانێ یە. کورێن کوردستانێ د ڤی بواریدا چ کێماسی نەکریە و هەر تاکەکی ژ لایێ خو ڤە ب شێوازەکی تێکۆشان و خەبات کرییە بۆ ئارمانجێن هەبوونا خو و ئاخ و سەروەرییا خو.
مللەتێ کورد زانیە کو ئێکگرتن و ڕێکخستن نە ب تنێ ڕێکا سەرکەفتن و پیرۆزیێ یە، بەلکو ئەو سازگەها بەردەواما هێز و شیان و ئیرادە و ئۆمێد و مۆرالی یە. بەردەوام ب گورەی هەلوومەرجان سەرکردایەتییا کوردستانێ دوور نەکەفتیە ژ خەلک و خاک و چڤاکێ کوردستانێ و بەردەوام شیانا خو ژ وان وەرگڕتیە.
ڕەگەزێن شیاندن و بەردەوامیپێکرنا پرۆسەیا ڕزگاریا وەلات د ئالۆزترین هەلوومەرجان دا و د زەحمەتترین جۆگرافیایا دا (ب شێواز و ڕتمەکا ئارام یا کو دگونجیت دگەل هەر قۆناغەکێ و نێزیک ژ دیدگەهـ و ڕێڕەوا مرۆڤپەروەریێ ل سەرانسەری جیهانێ) بەرهەم ئیناینە و فەراهەم کرینە بۆ هەمی ئاست و کەرتێن جەماوەری و وەلاتیا و هێزێن بەرگریێ.
خۆشڤیانا کوردستانێ ژ لایێ هەمی تەخ و توێژ و وەلاتیا و چڤاکێ کوردستانێ، پایە و پێگەهێ هەرە ب هێز و جێگیرێ هەمی دەستکەفتن و خۆڕاگرییا خەلکێ مە یێ تێهنیێ ئازادی و سەربەستیێ یە. هەلبەت ئەو بنەمایێن مە لسەری دیارکری، ئەو ژینگەها لبار بۆ هەبوونا هێز و ئیرادەیا وەلاتێ مە دروستکریە؛ هەر ژ سەرکردایەتییا هەرە بەرزا لوتکەیا بڕیاردانێ تا دگەهیتە هاووڵاتی و کەرت و توێژێن چڤاکی یێن جۆراوجۆر. ئەو بیرۆکەیا ڤینێ بۆ خەلکێ خو، بۆ وەلات و ئاڤ و هەوا و ئاسمانێ خو وەک گەنجینەیەکا بێدوویماهیک دیتیە. ئەو زۆر و بورییا هێرشێن مەزنێن دیار و نەدیار ب هەمی ئامرازەکێن کلاسیک و هەڤدەم نەشیاینە هندای تایێ موویەکی ژی مۆرالێ سەرکردایەتیێ و بناغەیێ هەمی پێکهاتێن چڤاکی ب هەژینن. ئا ب ڤێ ژینگەها زەنگینا شیان و هێز و بیر و باوەرییا ب ئایندیێ گەشێ خەلکێ مە، هەمی ڕێک ل بەر هەمی پیلان و ژەهرا ڕەشا دلێ دوژمن و داگیرکەران دێنە گرتن.
