نێچیرڤان بارزانی، لە سلێمانی رایگەیاند: “ئەو سەردەمە بەسەرچوو کە هیچ لایەنێک بیەوێت بە هێرشکردن و پەلاماردانی پارتی لەم ناوچەیە دەنگ کۆبکاتەوە، ئەو سیاسەت و تەکنیکە بەتاڵ بووەتەوە، ئیتر خەڵک بەو قسانە هەڵناخەڵەتێ، هێرشکردن و پەلاماردانی پارتی بۆ کۆکردنەوەی دەنگ رێگەیەکی هەڵەیە، ئەو رۆژگارە بەسەرچوو”.

نێچیرڤان بارزانی، جێگری سەرۆکی پارتی دیموکراتی کوردستان لەمیانی بەشداریکردن لە ئاهەنگی بانگەشەی پارتی لە سلێمانی لە سەرەتادا رایگەیاند: “لە دیداری دوێنێم لەگەڵ ئەندام و لایەنگرانی ئەنجومەنی سەرکردایەتی کەرکووک – گەرمیان، ناوی هەندێک شەهیدم هێنا و ناوی هەندێکیانیشم نەهێناوە، لێرەوە داوای لێبوردن لە بنەماڵەی سەربەرزی ئەو شەهیدانە دەکەم کە ناویانم نەهێناوە، مەبەست لەوە تەنها وەک نموونە بووە، ئەگەر لەم بابەتە دڵگرانن دیسان داوای لیبوردن دەکەم”.

نێچیرڤان بارزانی، گوتی: “دڵخۆشم کە ئەمڕۆ لە پایتەختی رۆشنبیری، شاری سلێمانی خۆشەویست، لە شارە حەیاتەکە، لە شاری هەڵمەت و قوربانی، سڵاوی جەنابی سەرۆک بارزانی و سەرکردایەتی پارتیتان پێبگەیەنم، ئێوە خۆشەویستی ئێمەن و پێتانەوە سەربەرزین”.

راشیگەیاند: “من کە سلێمانی دەبینم، زۆر دڵخۆش دەبم، چونکە بەڕاستی سلێمانیم خۆشدەوێت، شاری دایکم و باپیر و خزمەکانمە و شاری ئەدەب و کوردایەتی و رۆشنبیرییە، ئێوە سلێمانین، بەڵام ئەو هەقەش بە من بدەن کە نێوەم سلێمانییە”.

نێچیرڤان بارزانی، ئاماژەی بەوەشکرد: “تێکەڵاوی بنەماڵەی بارزانی، لەگەڵ سلێمانی و ئەو ناوچەیە بۆ مێژووێکی کۆنتر لە مێژووی پارتی دیموکراتی کوردستان، مێژووی خەبات و ئەرشیفی وێنەکانی بنەماڵەی بارزانی و شێخ مەحموودی حەفید و بنەماڵەکانی پێنجوێن و هەڵەبجە و پشدەر و بتوێن و گەرمیان شاهیدی ئەو پەیوەندییەن”.

جێگری سەرۆکی پارتی، رووی کردە لایەنە سیاسییەکان و گوتی: “نابێ کەس لە کوردستان رەشبین و بێهوا بکەین، دەبێ ئارامیی و خۆشگوزەرانی بڵاوبکەینەوە، داواتان لێدەکەم رەخنەی دڵسۆزانەی ئەو ناوچەیە پێکەوە بکەینە هۆکاری راستکردنەوەی هەڵەکان، نەک هەوڵبدەین بیکەینە رق دژی پارتی، چونکە خەڵکی سلێمانی حەزی لە ئارامیی و خۆشی ژیانە نەک رق و شڵەژان، پارتی بە ژمارەی دەنگ و کورسییەکان تەماشای خەڵکی ئەم ناوچەیە ناکات، بەڵکو بە چاوی دڵسۆزیی و وەفا و خەبات تەماشاتان دەکات، پارتی لەسەرەتا لەو شارە رەگەکانی قایم کردووە و کە سەرکەوتووە لەم شارەدا گەشەی کردووە، وەک پارتی قەرزداری سلێمانی و ئەم دەڤەرەین”.

باسی لەوەشکرد: “لێرەوە و لە گەرمەی بانگەشەی هەڵبژاردن داوای هاوکاریی و یەک هەڵوێستی  لە هەموو لایەنەکان دەکەین و پێیان دەڵێین فەرموون وەرنە پێشەوە دەست و دڵی پارتی لەپێناو کوردستان هەمیشە کراوەیە، چوار رۆژی تر دەبێ پێکەوە بچینە بەغدا و ئەرکی بەرگری کردن لە مافە دەستوورییەکان جێبەجێ بکەین”.

نێچیرڤان بارزانی، گوتیشی: “پارتی بە هیچ شێوەیەک غەدر و خۆسەپاندن قبووڵ ناکات، بەڵام  بە نەرمی و لەپێناو کوردستاندا ئامادەیە لە بەشی خۆی بداتە هاوپەیمانەکانی”.

راشیگەیاند: “ئەو سەردەمە بەسەرچوو کە هیچ لایەنێک بیەوێت بە هێرشکردن و پەلاماردانی پارتی لەم ناوچەیە دەنگ کۆبکاتەوە، ئەو سیاسەتە تا ماوەیەک لە عێراق پەیڕەو دەکرا ئەگەر هەر شتێک نەکرابایە دەیانگوت خەتای هەرێمی کوردستانە، ئێستا ئەوە نەماوە، لە ناوخۆی هەرێمی کوردستانیش ئەوە بەسەرچوو قسە بە پارتی بڵێی دەنگ کۆبکەیەوە، میللەت هۆشیارە، ئەو سیاسەت و تەکنیکە بەتاڵ بووەتەوە، ئیتر خەڵک بەو قسانە هەڵناخەڵەتێ، هێرشکردن و پەلاماردانی پارتی بۆ کۆکردنەوەی دەنگ رێگەیەکی هەڵەیە، ئەو رۆژگارە بەسەرچوو، ئێستا گەلی کوردستان هەموو شت دەزانن، دەزانن کێ خزمەت دەکات و کێ بەرگری دەکات”.

نێچیرڤان بارزانی، ئەوەشی خستەڕوو: “پەیامی سەرۆک بارزانی بۆ هەموومان ئەوەیە نەرم بین و ئارام بین، دەزانم و دەبیستم هەندێک کەس و لایەن هەموو توانا و تەکنیک بەکاردێنن بۆ هێرشکردنە سەر پارتی، بەڵام دیسانەوە پێتان دەڵێین ئارام و لەسەرخۆبن و لە قسەی سەرۆک بارزانی دەرنەچن، هەموومان دەزانین بەرد دەگیرێتە بەرزەکان نەک ئەوانەی کەوتوون”.

بابه‌تی تر

تا چوار ڕۆژی دیکە دەوامی بەشێک لە زانکۆکانی سنووری سلێمانی ڕادەگیرێت

زانکۆکانی سلێمانی و هەڵەبجە و پۆلەتەکنیکی سلێمانی بۆ ماوەی چوار ڕۆژ دەوامیان ڕاگرت. لە ڕاگ…