خەبات: هاوار مورتكەیی:-  (رۆژێك لەگەڵ دایكم لە قوتابخانەی میوزیك دەگەڕاینەوە، لەناكاو چەند منداڵێكمان لە كۆڵان بینی بەشتك یارییان دەكرد، لامان زۆر سەیر بوو، بۆیە بڕیارمان دا بچین سەیریان بكەین بزانین چ دەكەن؟ لەو رۆژەوە كەوتمە خۆشەویستی شەترەنجەوە)، ئەمە دەستپێكی كاروانە سەركەوتووەكەی ئەو كچە شەترەنجزانە لاوەی ئۆكراینایه Kamila Hryshchenko كامێلا هریچینكۆ كە ئێستاكە هەڵگری ناسناوی پاڵەوانێتی شەترەنجی خێرای ئەورووپا و جیهان، لاپەڕەی وەرزشی رۆژنامەی خەبات دیمانەیەكی لەگەڵ ئەنجامداوە تیایدا تیشك دەخاتە سەر ژیانی وەرزشی و دەسكەوتەكانی.

ئەزموونێكی گرنگ
كامێلا هریچینكۆ كە نۆڤێمبەری ساڵی 2002 لە شاری كراماتۆرسكی ئۆكراین لە دایك بووە دەڵێت: دەستپێكی وەرزشیم بۆ من سەرەتایەكی دڵخۆشكەر بوو، كاتێك لە یەكەم پاڵەوانێتی هەرێمایەتی بەشداریم كرد كە لە شاری دۆنێتسك بەڕێوەچوو توانیم پڵەی یەكەم بەدەست بهێنم، ئەمە هاندەرێكی باش بوو كە زیاتر بایەخ بەخۆم بدەم، دواتر بەشداری پاڵەوانێتی سەر ئاستی ئۆكراینم كرد بۆ خوار 8 ساڵی، ئەگەرچی ئەنجامەكەم وەك پیویست نەبوو بەڵام بۆ من ئەزموونێكی گرنگ بوو، چونكە خۆم بەدەستەوە نەدا، هەموو ئەمانەش بۆ راهێنەرەكەم ئەندریۆ كۆرنیتسكی دەگەڕێتەوە كە بەردەوام لەگەڵم بووە.

هەر ركابەرییەك دەسكەوتە
دواتر كامیلا كە خاوەنی رێتینگی نێودەوڵەتی (26667)یە ئاماژەی بەدیارترین دەسكەوتەكانی لەسەر ئاستی ئەورووپا و جیهان دا و گوتی: پێم وایە هەر ركابەرییەك دەسكەوتە، بۆیە كۆڵم نەدا و بەردەوام بووم، لە ساڵی 2018 بەشداری پاڵەوانێتی خێرای ئەورووپام كرد لە رۆمانیا و پلەی یەكەمم بەدەست هێنا، بۆ ساڵی دواتر بەشداری پاڵەوانێتی قوتابخانەكانی جیهانم كرد لە ئەرمینیا له سالی 2019 و ئەوكات یەكێك بووم لە ئەندامانی تیپی قوتابخانەی ئۆكراین و توانیمان پلەی یەكەم بەدەست بهێنین، هەر هەمان ساڵ ناسناوی پاڵەوانی جیهانیم بەدەستهێنا كە لە ئیسپانیا بەڕێوەچوو، واجاریش بەشداری فیستیقاڵێكم كرد لە بیلارووسیا Black Pawn و لەوێش پلەی یەكەمم بەدەستهێنا، ئەمە جگە لەچەندین بەشداری دیكە لەسەر ئاستی كلاسیك و خێرا و بلیتز.

ئافرەتان باشتر یاری دەكەن
لە كۆتاییدا كامیلا كە هەڵگری ماستەری نیشتمانیە لەبارەی خەون و حەزی بۆ شەترەنج گوتی: بێگومان شەترەنج بەلای منەوە خۆشەویسترین و باشترین یارییە، شەترەنج ئەوەی پێ بەخشیووم كە ئەنجامم داوە، لەهەمووی گرنگتر شەترەنج یارمەتیدەرم بووە لە پێشخستنی ئەو بەهرەیە بەرێگایەكی درووست كە هەمە، پێویستە ئەمەش بڵێم كە شەترەنج جیا لەوەی وەرزشە لەهەمان كاتیش دەرفەتی گەشتت زۆر بۆ دەڕەخسێنێت و ئاشنات دەكات بە كلتوری گەلان، لەكۆتاییشدا دەمەوێ ئەوە بڵێم كە لێرەو لەوێ زۆر دەبیستم كە ئافرەتان وەك پیاوان ناتوانن لەگەڵ شەترەنج هەڵبكەن، بەڵام ئێمەی ئافرەت بڕوامان بەخۆمان هەیە و دەتوانم بڕوا بەوە بكەم ئافرەتان باشتر لە پیاوان یاری شەترەنج دەكەن.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

مام خدر لەتەمەنی 84 ساڵیدا هێشتا دەزانێت چۆن داشەكانی شەترەنج بجولێنێت

خەبات: هاوار مورتكەیی:- لاتان سەیر نەبێت كە لەم هەرێمەی كوردستانی خۆمان كەسانێك هەبوونە بە…