خەبات:- ڕۆشنا عەلی:- دوای ئەوەی 6\12\2020 لیژنەی پەروەردەو خوێندنی باڵا لەگەڵ وەزیری پەروەردەو بریكاری وەزارەتی خوێندنی باڵا كۆبوونەوەیەكیان بۆ ماوەی حەوت كاتژمێر ئەنجامدا كە چەند تەوەرێكی پەیوەست بە هەردوو وەزارەتی ناوبراوی لە خۆ گرتبوو ڕۆژی 7\12\2020 لە كۆنگرەیەكی ڕۆژنامەوانیدا هەریەك لە ئالان حەمە سەعید وەزیری پەروەردەو عەبدولسەلام دۆڵەمەڕی ئەندامی پەرلەمان و سەرۆكی لیژنەی پەروەردەو خوێندنی باڵا و عەبدولفەتاح عەبدولرەزاق بریكاری وەزارەتی خوێندنی باڵا تەوەرو بریارەكانی ئەو كۆبوونەوەیان لە پەرلەمانی كوردستان خستە روو   

چارەنووسی پڕۆسەی خوێندن 

 تەوەری سەرەكی كردنەوەی دەرگای قوتابخانەكان بوو لەمبارەیەوە سەرەتا عبدولسەلام دۆڵەمەڕی ئاماژەی بەوەدا لەئەگەری بەردەوام بوونی ڤایرۆسی كۆرۆنا بڕیار دەدرێت بەهەر شێوەیەك بێت دەست بە پڕۆسەی خوێندن بكرێتەوە لە ناو قوتابخانە هەردوو لا هاوڕا بوون لەسەر ئەوەی پڕۆگرامەكان تەواو بكرێت و تاقیكردنەوەی بەرایی پۆلی 12 لە قەزاكانی خۆیان ئەنجامبدرێت.    

كرێی خوێندن 

دەربارەی كرێی خوێندنیش كە تەوەرێكی تری كۆبوونەوەكە بوو سەرۆكی لیژنەی پەروەردەو خوێندن وتی :كرێی خوێندنی باخچەو قوتابخانەو پەیمانگا ناحكومییە لۆكاڵییەكان بەڕێژەی %20 كەمدەكرێتەوە و قوتابخانە نێودەوڵەتییەكانیش بە ڕێژەی %10 كەمدەكرێتەوە هەروەها كرێی خوێندنی زانكۆو پەیمانگا ناحكومییەكانیش كە دەوترێت هەندێك لەو زانكۆو پەیمانگایانە پابەند نەبوون بە بڕیارەكانی پار ساڵەوە لە كۆبوونەوەكەدا بریار درا كە لیژنەیەكی هاوبەش پێكدەهێنرێت لە لیژنەی پەروەردەو خوێندنی باڵا لەگەڵ وەزارەتی خوێندنی باڵا بەدواداچوون بۆ ئەم بابەتە دەكرێت هەر زانكۆو پەیمانگایەك پابەند نەبووبێت بە داشكاندنی %25 دەبێت ئەو پارەیە بگەڕێنێتەوە بۆ قوتابیان.  

دەربارەی ئەو زانكۆیانەشی كرێی خوێندنیان بۆ ئەمساڵ بەبەراورد بە ساڵی پار زیاد كردووە بریار لە وەزارەتی خوێندنی باڵاوە دەرچووە كە ئەمرۆ دەچێتە زانكۆو پەیمانگاكان كرێی خوێندن لەسەر ئەو بڕە پارەیە دەبێت كە پار دانراوە نەك ئەوەی ئەمساڵ زیاد كراوە . 

 كۆلێژی زانستە تەندروستییەكان 

تەوەرێكی تری ئەو كۆبوونەوەیە كە عەبدولسەلام دۆڵەمەڕی ڕایگەیاند كێشەی كۆلێژی زانستە تەندروستییەكان بوو لەمبارەیەوە وتی : كۆلێژی زانستە تەندروستییەكان كە لە دووبەش پێك دێت بەشی مایكرۆ بایۆلۆجی و كیمیا گەری دیارە لە ساڵی  2012 وە ئەو كۆلێژانە دامەزراون تائێستا ناونیشانێكی وەزیفییان دیار نییەو سەندیكایەكی تایبەت بە خۆیان نییە نوسراو كراوە بۆ وەزارەتی دارایی و بۆ وەزارەتی خوێندنی باڵای حكومەتی فیدراڵ بریاریشمان داوە پێكەوە وەك یەك تیم كار لەسەر ئەو بابەتە بكەین وقوتابیانی ئەو كۆلێژە بگەن بە مافی خۆیان.  

 دۆڵەمەڕی ئاماژەی بەوەشدا كە  2500  كورسی خوێندنی خۆڕایی بۆ كوری شەهید و ئەنفال دیاریكراوە هەوڵ دەدەن لە داهاتوو كچ و كوری زیندانیانی سیاسی لەم بریارە سوود مەند بن.  

دامەزراندنی سێ‌ یەكەمەكان 

دەربارەی چارەسەری دامەزراندنی سێ‌ یەكەمەكانی زانكۆو پەیمانگاكان سەرۆكی لیژنەی پەروەردەو خوێندنی باڵا وتی: وەزارەتی خوێندنی باڵا نوسراوی بۆ سەرجەم كۆلێژو پەیمانگاكان كردووە كە لە هەر شوێنێك پێویستییان بە موعید بوو بە پێی ڕێكارەكان ئەو قوتابیانە دابمەزرێنن ئەگەرنا ئێمە پڕۆژەیەكی دیكەمان لەبەردەستە هەوڵ ئەدەین لە داهاتوودا زەمالەی خوێندن دەستەبەر بكەین بێ بەرامبەر هەم بۆ كج و كوری شەهیدان هەم بۆ سێ‌ یەكەمەكانی زانكۆو پەیمانگاكان.  

دەربارەی پزیشكانی كۆلێژی ددان كە كێشەیان ئەوە بوو ناتوانن نۆڕینگە دابنێن پاش دوو ساڵ خزمەتكردن نەبێت بۆ ئەوانیش بەدیلێكمان تاوتوێ‌ كردووە بە هۆی قەیرانی دارایی كە ئێستا هەرێمی كوردستان پێیدا گوزەر دەكات ناتوانرێت ئەو بەڕێزانە دابمەزرێن  بەدیلەكەش ئەوەیە ساڵێك خزمەت بە خۆبەخشانە لە نەخۆشخانە حكومییەكان بكەن و بۆ ئەمەش پێویستە نوێنەری ئێمە لەگەڵ وەزارەتی خوێندنی باڵاو سەندیكای پزیشكانی ددان بریار لەو بارەیەوە بدەن و یەكلابكرێتەوە.  

دەرچووانی پیشەیی و ئیسلامی 

سەبارەت بە چارەنووسی دەرچووانی خوێندنی پیشەیی و ئیسلامی كە زۆربەی قوتابیان گلەیی ئەوە دەكەن كە چارەنوسیان دیار نییە دوای ئەوەی خوێندنی ئیسلامی یان پیشەیی تەواو دەكەن لەم بارەیەوە عەبدولسەلام دۆڵەمەڕی وتی: بۆ ئەو قوتابیانە كە لەو بەش و كۆلێژەی كە خواستێتی وەرناگیرێت بۆ ئەم بابەتە لەسەر پێشنیاری وەزیری پەروەردە لە مانگی 1 ی 2021 ۆرك شۆپێك ئەنجامدەدرێت كە تێیدا نوێنەری ئێمە وەك لیژنەی پەروەردەو خوێندنی باڵا وە نوێنەری وەزارەتی پەروەردەو خوێندنی باڵای تێدا دەبێت بۆ ئەوەی دەرچەیەكی یاسایی بۆ چارەنوسی خوێندنی ئەو قوتابیانە دیاریبكەین . 

هەڵسەنگاندنی وەزارەتی تەندروستی 

دواتر ئالان حەمە سەعید وەزیری پەروەردە ئاماژەی بەوەدا كە هەموو ئەو بابەتانەی دەربارەی دەستپێكردنەوەی دەوام باس دەكرێن وابەستە بە هەڵسەنگاندنی وەزارەتی تەندروستییەوە ئەو لەمبارەیەوە وتی: ئێمە لە وەزارەتی پەروەردە بە تەواوی پابەندین بەو هەڵسەنگاندن و پێشنیارانەی كە لە لایەن وەزارەتی تەندروستییەوە پێشكەش دەكرێت ئەگەر دۆخی تەندروستی گونجاو بوو ئێمە بەرنامەیەكمان داناوە ماوەیەك پێش ئسێستا بەڕێز بریكاری وەزارەتی پەروەردەمان راسپاردووە لەگەڵ چەند بەڕێوەبەرێكی گشتی بۆ دانانی پلانێكی گونجاو كە چۆن دەست بكرێتەوە بە دەوام ئەگەر لە مانگی یەك دۆخی تەندروستی ڕێگای دا چۆن دەست بكەینەوە بە دەوام چۆن ساڵنامەی خوێندن ڕێكبخەینەوە چۆن تاقیكردنەوەكانی وەرزی یەكە م و وەرزی دووە م و خوێندنی وەرزی یەكەم لە پشووەكان ڕێكبخەین ئێمە هەر سبەینێ لەگەڵ سەرجەم بەڕێوەبەری پەروەردەكان كۆبوونەوە دەكەین و دواتریش لەگەڵ یەكێتی مامۆستایانیش دادەنیشین بۆ ئەوەی بەرنامەیەكی گشتگیرو هەڵسەنگێنراومان هەبێت.  

هەروەها بریارە لە 7\1\2020 كۆبوونەوە بكەینەوە لەگەڵ لیژنەی باڵای ڕووبەروو بوونەوەی كۆرۆنا ئەگەر ڕێگای دا ئەوا بەپێی پلانی خۆمان دەست بە دەوام دەكەینەوە ئەگەر ڕێگای نەدا ئەو كات بەپێی ئەوەی ئێمە لە ڕەشنوسی پلانەكە ئاماژەی پێدەكەین دەوام دەست پێناكاتەوە دەبێت بەرنامەیەكی نوێ دابڕێژینەوەو ساڵنامەی خوێندن سەر لە نوێ دەستكاری بكەینەوە.  

 شایستەی وانە بێژان 

دەربارەی ماف و شایستەی وانە بێژانیش وەزیری پەروەردە وتی : ئێمە لە 25\2\2020 بە فەرمانی ژمارە 48 بە واژووی جەنابی سەرۆكی حكومەت كاك مەسرور بارزانی بڕیار درا بۆ ساڵی خوێندنی ڕابردوو شایستەی دارایی بۆ ئەو مانگانەی كە بەهۆی پشووی كۆرۆناوە دەوام نەبووە شایستە داراییەكانییان خەرج بكرێت و خەرج كراوە . پێش ئەوەی بێمە ئێرە لە گەڵ وەزیری دارایی كۆبوونەوەمان هەبووە لەسەر دوو مانگ ئێمە نوسراومان كردبوو بۆ شایستەی مانگی 5 وە چۆن بەیەكەوە لە لیژنەی باڵای ڕووبەرووبوونەوەی كۆرۆنا كە رۆژی 1\12 بەسەرپەرشتی بەڕێز وەزیری ناوخۆ كۆبوونەوە لە كۆبوونەوە هەردوو وەزارەت دارایی و پەروەردە ڕاسپێردراون كە چۆن شایستەی مامۆستایانی وانە بێژ دابین بكەین ؟ لەو بابەتەش ئاماژەی ئەرێنی هەیە تیمی هەردوو لامان ڕاسپاردووە لەسەردانانی میكانیزمێك كە چۆن بتوانین شایستە داراییەكانییان دابین بكەین.  

خاڵێكی تریش لەسەر فەرمانی بەڕێز سەرۆكی حكومەت ئەو قوتابخانانەی كە منداڵانی پەنابەرانی تێدا دەخوێنن و قوتابخانە سورییەكانییان پێدەوترێت پاش ئەوەی بۆ ماوەی پێنچ ساڵ ڕێكخراوە نێو دەوڵەتییەكان  بەتایبەتی ئەوانەی لە بواری پەروەردەو منداڵان كار دەكەن بەشێك لە شایستەی مامۆستایان و فەرمانبەرانی ئەو قوتابخانانەیان داوە، بەڵام لەساڵی خوێندنی پار پاشە كشەیان لە پێدانی ئەو شایستانە كرد بۆیە حكومەتی هەرێمی كوردستان بریاریدا كە بۆ ئەمساڵ ئەو پرۆسەیە بەردەوام بێت و پێدانی شایستەی دارایی ئەو مامۆستاو فەرمانبەرانەی كەمپەكانی ڕۆژئاوا  لە ئەستۆ بگرێت.    

 د. عەبدولفەتاح عەبدولرەزاق بریكاری وەزارەتی خوێندنی باڵا و توێژینەوەی زانستی  ئاماژەی بەوەدا كە سیستەمی خوێندنی ئاوێتە لە زانكۆو پەیمانگاكانی سەر بەوەزارەتی خوێندنی باڵا بەردەوام دەبێت و دەسەڵاتیش دراوەتە زانكۆكان بە پێی بارودۆخی شاو ناوچەكانی خویان لە رووی تەندروستییەوە بریار لەسەر شێوازی خوێندن بدەن.     

هیچ قوتابخانەیەكی ناحكومی دەوام ناكەن 

وەزیری پەروەردە لە كۆنگرە رۆژنامەوانییەكە ئاماژەی بەوەدا كە هیچ قوتابخانەیەكی ناحكومی دەوام ناكەن و تانانەت ئەو قوتابخانانەشی كە نازحینن و سەر بە حكومەتی فیدراڵن كە هەفتانە یەك رۆژ ئەبێت دەوام بكەن لە 29\11 وە دەوامیان دەستیپێكردووە  ئەوانیش دەوام ناكەن لە هەرێمی كوردستان ڕێگایان پێنادرێت كە ژمارەیان 188000 قوتابی نازحە دابەشبوون بەسەر 595 قوتابخانەیە بە هیچ شێوەیەك دەوام ناكەن.

کۆنگرەی رۆژنامەوانی لێژنەی پەروەردە و خوێندنی باڵا لەگەڵ وەزیری پەروەردە و بریکاری خوێندنی باڵا

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

فیلمێک ناتوانێ مێژووی بەرگری میللەتێک بشێوێنێ

فەرحان جەوهەر مێدیای ئێرانی فیلمێکی زۆر دوژمنکارانەی بۆ کەمکردنەوەی رۆڵی پێشمەرگە لەشەڕی د…