كاروان محەمەد سینو
ئەم رووداوە داخێكی گەورەی خستە نێو دڵی رابەر و سەركردە و بەرپرس و تەواوی خەڵكی كوردستان. هەروەها دۆست و هاوپەیمان و كۆمەڵگای نێودەوڵەتیش هاوخەمی و پاڵپشتی خۆیان بۆ پێشمەرگە و حكوومەتی هەرێمی كوردستان دەربڕی.

بەم بۆنە دڵتەزێنەوە جەنابی سەرۆك مسعود بارزانی لە پەیامێكدا پرسە و سەرەخۆشی خۆی ئاراستەی خانەوادە و كەسوكاری سەربەرزی شەهیدانی ئەو كردەوە تیرۆرستییە كرد و خۆی بە هاوبەشی خەمی ئەوان زانی. هەروەها لە پەیامەكەیدا جەنابی سەرۆك بارزانی سەرەخۆشی لە دایكی ئەو سێ شەهیدە كرد كە هەرسێكیان بەیەكەوە لە كردەوە تیرۆرستییەكەدا شەهید بوون و دایكەكەیان بە “شێرە ژن” ناوبرد و فەرمووی: ” گوتەكانی ئەو شێرەژنە بۆ هەموومان مایەی ورە و پێداگری و بەردەوامبوونە لەسەر ڕێباز و قەزییە باڵاكانی گەلەكەمان و، لە دڵەوە سوپاسی دەكەم”. لە بەشێكی دیكەی پەیامەكەیدا ؛ سەرۆك بارزانی ڕایگەیاند: ” لەپێناو پاراستن و بەرگری لە خاك و نیشتمانمان، پێویستە پێداچوونەوە و وردبینی زیاتر بە كاروباری هێزەكانی پێشمەرگە و هێڵە بەرگرییەكاندا بكرێت و ئیجرائاتی پێویستیش وەربگیرێت لە بەرانبەر هەر جۆرە كەمتەرخەمییەكدا. پێویستە بە زووترین كاتیش تۆڵەی خوێنی شەهیدەكانمان لە دوژمن بكرێتەوە”.

هەر بەم بۆنە دڵتەزێنەوە؛ نێچیرڤان بارزانی سەرۆكی هەرێمی كوردستان لە پەیامێكدا پرسە و هاوسۆزی و هاوخەمی خۆی ئاراستەی خانەوادە و كەسوكاری شەهیدانی سەربەرزی وڵات كرد و گوتی: ” پرسە و سەرەخۆشیی قووڵمان ئاراستەی خانەوادە و كەسوكاری سەربەرزی شەهیدان دەكەین و لە دڵەوە هاوسۆز و هاوخەمیانین. خوای مەزن گیانی شەهیدان بە بەزەیی و میهرەبانیی خۆی شاد بكات و سەبووری و ئارامی بە خێزان و كەسوكاریان ببەخشێت”. لە درێژەی پەیامەكەیدا؛ سەرۆكی هەرێم ڕایگەیاند: “هێرش و پەلاماری ڕۆژانەی تیرۆرستانی داعش، ئیتر كاردانەوەی توند و خێرا و گرتنەبەری رێكاری بەرگری و سەربازیی تۆكمەی لە عێراق و هەرێمی كوردستان دەوێت، كە سنوورێكی یەكجاری بۆ تاوان و كردەوە تیرۆرستییەكانیان دابنێت. لە رووی سیاسیشەوە دەبێ هەموو هێز و لایەنە عێراقییەكان بزانن، كە تا پرۆسەی سیاسی راستەڕێ نەبێت و ئارامی و سەقامگیریی سیاسی لە وڵات جێگیر نەبێت”.

مەسرور بارزانی سەرۆكی حكوومەتی هەرێمی كوردستان لە دەرەنجامی ئەم هێڕشە تیرۆرستییەدا لە پەیامێكدا سەرەخۆشی لە كەسوكاری شەهیدان کرد و گوتی: “پرسە و سەرەخۆشی قووڵی خۆمان ئاراستەی بنەماڵە و كەسوكاری شەهیدەكان دەكەین و هاوخەمیانین، خوای میهرەبان گیانیان بە بەهەشت شاد بكات و سەبر و ئارامیش بە خێزان و كەسوكارەكانیان ببەخشێت، هیوای چاكبوونەوەی خێراش بۆ بریندارەكان دەخوازین”. لەلایەكی دیكەشەوە و دوابەدوای پەیام و ڕاسپاردەی سەرۆك مسعود بارزانی كە فەرموویەتی ” پێویستە پێداچوونەوە و وردبینی زیاتر بە كاروباری هێزەكانی پێشمەرگە و هێڵە بەرگرییەكاندا بكرێت و ئیجرائاتی پێویستیش وەربگیرێت لە بەرانبەر” ؛ رۆژی هەینی ڕابردوو 3ی كانوونی دووەم 2021 مەسرور بارزانی سەرۆكی حكوومەتی هەرێم لە سەردانێكی مەیدانیدا سەنگەری پێشەوەی بەرگری هێزی پێشمەرگەی كوردستان لە میحوەری مەخمووری بەسەر كردەوە و لەگەڵ فەرماندە سەربازییەكانی میحوەرەكە كۆبووەوە و بەدواداچوونێكی وردی بارودۆخی دەڤەرەكە و كردەوە تیرۆرستییەی كرد و بۆ كەناڵەكانی ڕاگەیاندن هاتە ئاخافتن و گوتی: ” بەداخەوە تیرۆریستانی داعش لە پەلامارێكی وەحشییانەدا بۆ سەر هاووڵاتییان، چەندین هاووڵاتییان شەهید كرد و دوای ئەوەی پێشمەرگە بە هانایانەوە چوون، كەوتنە بۆسەی داعش و ژمارەیەك پێشمەرگە شەهید بوون و بەداخەوە 13 هاووڵاتی و پێشمەرگە شەهید بوون. من سەرەخۆشی لە بنەماڵەی هەموو شەهیدان دەكەم و هیوادارم خوا سەبووری بە بنەماڵەی سەربەرزیان بدات و شیفاش بە بریندارەكان ببەخشێت ئینشاڵڵا. هەروەها دەستی ئەو دایە جەرگ سووتاوەمان ماچ دەكەین، كە جەنابی سەرۆك بە “شێرەژن” وەسفی كرد، جێی شانازی هەموومانە و ئێمە خۆمان بە كوڕی ئەو دایكە دەزانین و سەرەخۆشی لە هەموو دایكان و كەسوكاری شەهیدان دەكەین. بەداخەوە ئەمە یەكەم و دوا پەلاماری تیرۆریستان نابێت، بەڵام ورەی ئێمە هەر بەرزە و هەر بەرزیش دەمێنێتەوە و پێشمەرگەش ئامادەیە لە بەرگریكردن لە خاك و شكۆی وڵات و نەتەوەكەمان. ئەم پەلامارانە ئەوە دەگەیەنێت، كە ئەو بۆشاییەی لە نێوان هێزی بەرگریی پێشمەرگە و سوپای عێراق ماوە، بووەتە هۆی ئەوەی تیرۆریستانی داعش سوود وەربگرن و لەو شوێنانەوە پەلاماری گوند و سەنگەرەكانی پێشمەرگە بدەن. دووپاتی دەكەمەوە پێویستە چیدیكە كەمتەرخەمی لەوە نەكرێت، ئەو هەماهەنگییەی پێویستە لە نێوان پێشمەرگە و سوپادا بەردەوام بێت و هەنگاوەكانی پڕكردنەوەی ئەو بۆشاییە خێرا بكرێن، بۆ ئەوەی رێگری لەم كارەساتانە بكرێت. دڵنیام پێشمەرگە بەردەوام دەبێت لە بەرگریكردن لە خاكی كوردستان و هیوادارم هێزەكانی عێراقیش توندتر و كاراتر بێنە پێشەوە و هەنگاوەكانیان بۆ هەماهەنگی خێراتر بكەن. بەداخەوە ماوەیەكە داوامان كردووە پێداویستییەكانی پێشمەرگە دابین بكرێت، بەڵام تا ئێستاش رێگری لە پڕچەككردن و دابینكردنی ئەو هاوكارییانە دەكرێت، كە بۆ پێشمەرگە پێویستن بۆ رووبەڕووبوونەوەی تیرۆریستانی داعش. داوا لە سەرۆك وەزیرانی عێراق دەكەم ئەو پێداویستیانەی پێشمەرگە هەیەتی بۆ پاراستنی سنوورەكان دابینی بكەن. ئەوەی لە دەستمان بێت دەیكەین، وەك ئەوەی لە پەیامی جەنابی سەرۆكدا بە روونی دیارە، كە فەرموویانە پێویستە سەردانی ناوچەكە بكرێت و ئەو كەمتەرخەمییەی هەیە و ئەو شوێنانەی پێویستە قایمتر بكرێن، دەبێت بكرێن، هەنگاوی خۆمان خێرا دەكەین و چاوەڕێی هیچ شتێك ناكەین، من وەزارەتی پێشمەرگەش رادەسپێرم بۆ ئەوەی هەموو پێداویستییەك بۆ پێشمەرگە دابین بكەن و وەك حكوومەت لە خزمەتیانداین و هەرچی پێویستە بۆ پاراستنی ئەم سنوورە دابینی دەكەین و درێغی ناكەین. تیرۆریستان سوودیان لە بۆشایی ئەمنی وەرگرتووە و پەلاماری پێشمەرگەیان داوە، داوا دەكەین هەماهەنگی نێوان پێشمەرگە و هێزی فیدراڵی پتەوتر بكرێت و ئێمە چاوەڕێی هیچ ناكەین، ئەوەی پێویستە بۆ پاراستنی خاك و خەڵكی خۆمان دەیكەین. تا ئێستا وەك پێویست هەنگاوی ئەوتۆ نەنراوە بۆ پڕكردنەوەی بۆشایی ئەمنی و ئێمە چاوەڕێی هیچی دیکە ناكەین، چونكە سەلامەتی و پاراستنی خاك و نەتەوەی ئێمە لە سەرووی هەموو شتێكە. ئەم پەلامارانە دووپاتی ئەوە دەكەنەوە، كە مەترسیی داعش راستەقینەیە بۆ هەموو وڵات و ناوچەكە و تیرۆریستانی داعش چالاكن و دەتوانن پەلامار بدەن و زیان بە هێزەكانمان بگەیەنن، بۆیە هاوكاری و هەماهەنگیی هاوپەیمانان گرنگە و هیوادارم ئەوانیش هەنگاوی خێراتر بنێن و هاوكاریمان بكەن”. دواتر مەسرور بارزانی سەردانی ماڵی دایكی هەرسێ برا شەهیدەكەی كرد كە جەنابی سەرۆك بارزانی بە “شێرەژن”ناوی بردووە و لە نزیكەوە پرسە و سەرەخۆشی ئاراستە كردن و بە دایكی هەرسێ شەهیدەكەی گوت: “ئێمە كوڕی تۆین و هەرچیمان پێ بكرێت لە خزمەتی تۆداین”. لە بەرانبەردا، “شێرەژن” گوتی: شانازی بە رۆڵەكانمەوە دەكەم، هەتا شەهید بوون، بەرگرییان كرد. زۆر زۆر شانازییان پێوە دەكەم، دەڵێم یاڕەبی رۆحتان شاد بێت رۆڵە قارەمانەكانم.

برای سێ شەهیدەكەش، كە لەسەر تەرمی هەرسێ براكەی تادوافیشەك شەڕی بەرگری كردبوو و داوای كردبوو، سەرۆكی حكوومەت دەست لە ملی بكات، لەسەردانەكەیدا سەرۆكی حكوومەت بە دڵی پڕ لە گریانەوە‌ دەستی لە ملی برای هەرسێ شەهیدەكە كرد و گەنجەكەش پێی گوت: “وەرە دەست لە ملم بكە؛ برینی دڵم گەلەك قووڵن، ناڵەی برایانم گەلەك بە ئازارە‌، هەر سێ برام لە تەنیشتم شەهید بوون، بەڵام تا دوا فیشەك شەڕم كرد، هەمووی بە قوربان سەرۆك بن، هەشت برامان ماون، ئامادەین لە پێناو خاك و ئاڵای كوردستان و سەرۆك بارزانی خوێنمان بڕژێت، پێشەوا قازی محەمەد لەسەر ئاڵای كوردستان شەهید بوو، ئێمەش لەسەر شەرەف و كەرامەت و خاك و وڵات و نامووسی خۆمان شەهید بووینە، برایەكانم چوونەتە كاروانی نەمران”.

خوێنەری ئازیز…. هەڤاڵانی پێشمەرگە…. كادیرانی ماندوونەناسی پارتی و رێبازی بارزانی…. هاووڵاتییانی بەشەرف و نیشتمانپەرەرانی هەرێمی كوردستان بەهەموو حزب و لایەن و نەتەوە و ئایین و ئایینزاكانەوە، دڵنیابن كە تەنها بنەماڵەی بارزانی رۆڵەی رۆژی تەنگانە و بەهاناوەچوونی لێقەوماوانن؛ فریادرەس و پارێزەری زوڵم لێكراوان و جەرگ سوتاوانن؛ پێشمەرگە و فیداكار و قەڵغان و پارێزەری تەواوی خەڵك و خاكی كوردستانن…. تەنها ئامێزی بنەماڵەی بارزانی باوەشی سۆز و میهرەبانی و ئارامگەی هەموو نیشتمانپەروەرێكە.

بابه‌تی تر

یارییەكی دۆستانە هونەرمەندانی شاری هەولێر كۆدەكاتەوە

خەبات: هاوكار كەلهوری:- لە یاریگای بچووكراوی شەهید فرەنسۆ هەریری، یارییەكی دۆستانەی تۆپی پ…