خەبات: رۆشنا عەلی:- وەرگرتنی ئەمساڵی قوتابیانی پۆلی 12 لە زانكۆو پەیمانگاكان جیاواز بوو لە ساڵانی رابردووبەهۆی ئەوەی وەك بریارە %100 ی قوتابیان لە كۆلێژو پەیمانگاكان وەردەگیرێن و لە لایەكی دیكەوە نمرەیەكی زۆر بەرز هەن كەلە شوێنی نزم وەرگیراون بەپێی ئەم بەدواداچوونەی لاپەڕەی پەروەردە ئەنجامی داوە.  رۆژی 1/11/2020 وەزارەتی خوێندنی باڵاو توێژینەوەی زانستی لە كۆنگرەیەكی ڕۆژنامەوانیدا ڕایگەیاند كە %87 ی دەرچووان لە  زانكۆ و پەیمانگەكان وەرگیراون، بە پڕكردنەوەی كورسیە بەتاڵەكانیش ڕێژەی وەرگرتن دەبێتە %100  د. خەتاب ئەحمەد شێخانی بەڕێوەبەری گشتی خوێندن و پلاندانان و بەدواداچون بە وەكالەت و ئارام ئیبراهیم بەڕێوەبەری ناوەندی وەرگرتن، وردەكاری و داتای وەرگیراوانی لە زانكۆ و پەیمانگە حكومییەكان لەهەرێمی كوردستان بۆ ساڵی نوێی خوێندن ڕاگەیاند و ئاماژە بەوەدرا كە چەند جارێك پلانی وەرگرتن بۆ دەرچوان زیادكراوە، لەو پێناوەشدا بۆ یەكەمجارە لە مێژوی خوێندنی باڵا لە هەرێمی كوردستان پلانی وەرگرتن بۆ (٥٦٨٠٤) كورسی زیادكرا، ئامانج لە زیادكردنی پلانیش رەخساندنی زۆرترین دەرفەت بو بۆ پێشكەشكاران ، د. خەتاب شێخانی وتی: (٧١١٨) دەرچو بەهۆی هەڵە پڕكردنەوەو هەڵنەبژاردنی شوێنی گونجاو لەگەڵ نمرەكانیان لە قۆناغی یەكەمدا وەرنەگیراوان كە ڕێژەكەیان بریتیە لە (١٣%). لەهەمان كاتیشدا (٨١١٩) كورسی بەتاڵ ماوتەوە، بۆیە ئەم ژمارەی كە وەرنەگیراوە لە ڕێگەی سیستمەكەوە دەتوانن یەكێك لەو بەشانە هەڵبژێرن كە كورسی بەتاڵی هەیە،سەبارەت بە وەرگیراوان بەپێی سیستمەكانی وەرگرتن، لە خوێندنی گشتی (بەخۆرایی)، پارالێل،  ئێواران، بەڕێوەبەری گشتی خوێندن و پلاندانان و بەدواداچون ئاماژەی بۆ ئەوە كرد، (٦٥%) وەرگیراوان بریتین لە خوێندنی گشتی واتە بەخۆڕایی، (١٧%)ی بریتین لە وەرگیراوانی پارالێل، (١٨%)ی بریتین لە وەرگیراوانی ئێواران.

بۆچوونی قوتابیان 

دەربارەی وەرگرتنی قوتابیان ئەوەی تێبینی دەكرێت قوتابییەكی زۆر بە نمرەیەكی بەرزەوە ناویان لە پەیمانگاو بەشە نزمەكان بە وتەی خۆیان  هاتۆتەوە قوتابی ئەسما دلێر كە كۆنمرەی 90.5  و لە پەیمانگای پەرستاری ناوی هاتۆتەوە ئەو بۆ خەبات لەبارەی ئەوەی كە ئایا فۆرمی بە هەڵە پركردۆتەوە؟ وتی: نەخێر بە هەڵە پرم نەكردۆتەوە سەرەتا بایۆلۆجی و كیمیام نوسیوە دواتر پەیمانگای دەرمانسازی و ئەندازیاری شارستانی و دواتریش پەیمانگای پەرستاری، دەربارەی ئەوەشی كە ئایا تاچەند ئەم بەشە بە خواستی خۆیەتی ئەسما وتی: هیچ ئاواتم بۆ نەخواستووە چاوەروانی بەشێكی زۆر باشترم دەكرد و نمرەكەم لە ئاستی ئەو بەشە نییە لە وەرگرتنی ئەمساڵ غەدرێكی زۆر كراوە  

قوتابی بوشرا محەمەد دەربارەی زیاد كردنی كورسی وتی: راستە كورسی زیاد كراوە، بەڵام بۆ پارە زیاد كراوە من 69 ی زانستیم هەیە ناوم لە هیچ شوێنێك نەهاتۆتەوە تەنها لەبەر ئەوەی  ئێواران و پارالێڵم پڕنەكردۆتەوە.

 یسرا رەمەزان قوتابی پۆلی 12 یەكێك بوو لەو قوتابیانەی كە ماوەی دووساڵە فۆرم پردەكاتەوەو ناوی نەهاتۆتەوە بۆ خەبات وتی: من دووساڵە فۆرم پردەكەمەوە ناوم لە هیچ شوێنێك نەهاتۆتەوە نەپار نەئەمساڵ من نمرەكەم 54 و بیستوومە هەمان نمرەی من لە پەیمانگای تەكنیكی ناوی هاتۆتەوە من هیچ توانای ئەوەم نییە لە ئەهلی و پارالیڵ بخوێنم وا چاوەرێ‌ دەكەم ئەگەر ئەمجارە شتێیەكم بۆ بكەن ئەگەرنا لە خوێندن بێ‌ بەش دەبم خۆم حەزم لە كارگێڕی كارە .

  كەس و كاری قوتابیان 

دەربارەی بۆچوونی كەس و كاری قوتابی كەتاچەند رازین لەو بەش و كۆلێژانەی منداڵەكانیان وەرگیراون بە پێی نمرەكانیان حەسەن رەسول باوكی قوتابی بۆ خەبات وتی : من باوكی سێ‌ قوتابیم ئەمسالیش قوتابییەكم ناوی گەراوەتەوە بەنمرەی 77.7 لە شیكاری نەخۆشییەكان لە تەق تەق وەرگیراوە كەلە سنوری جوگرافی خۆی زۆر دوورە  لە كاتێكدا لە پارالێل بەنمرەی 74 لە پەرستاری شەقڵاوە وەرگیراوە ئەم لەبەر ئەوەی پارالیڵ نییە بەو نمرەیەوە لەوێ‌ ناوی هاتۆتەوە بەراستی جیاوازی نمرەكان لە نێوان پارالێڵ و ناپارالێڵ زۆرە بۆ خەڵك بە و نمرەیەی ئەیهێنێت رێگای پێ‌ نادەن لە شوێنی باش وەربگیرێت بە دڵنیاییەوە ئەمە بێ‌ نرخكردنی خوێندنە ئێستا من كوری دووەمم  پێم وتووە ئیهتمام زۆر بە خوێندن مەیە كردوومەتە شاگردی حەلاق ،چونكە ئەزانم سبەی كە نمرەش بێنێ‌ غەدری لێ‌ دەكرێت  من كورەكەم لە قوتابخانەی رزگاری بوو تەحسین معەدەلی كرد بردمە ژیار پارەم بۆ قەرز كرد نمرەیەكی باش بێنێت بە 21 وەرەقە بەس داغلی قوتابخانەكە كرا ئەمرۆش ئەوە غەدرێكە لێی كراوە %90 ی كەس و كاری قوتابی خوێندنییان لا بۆتە شتێیەكی ئاسایی و گرنگی خەلك بۆ خوێندن كەم بۆتەوە ،چونكە هەر بەشێك بخوێنێت ئەبێت لە ماڵەوە دانیشێت و تاعینات و ئیش كردن نییە بەواستە نەبێت ئەو هەموو ساڵە ئەخوێنێت لە نەخۆشخانەیەك بە 300000 كار دەكات ئەویش ئەگەر ئیشی دەست بكەوێت جا باشترە ببێت بە وەستا و ئیشێكی تر بكات بێ‌ منەت مانگی 600000 ی دەست دەكەوێت.

ساڵح مەهدی باوكی قوتابییەكی وەرگیراو لە پەیمانگا بەشی پەرستاری ئەو بۆ خەبات وتی : خواستی ئێمە ئەو جێیە نەبووبرواشم وایە زۆربەی قوتابی بە خواستی خۆی ناوی نەهاتۆتەوە  كە نمرەكەی 78.30 لە حكومی وەرگیراوە ئەوەی ئەمساڵ ئەیبینین شتێیەكی سەیرە بەراستی لەلایەك مناڵەكانمان هان دەدەین بخوێنن لەلایەك دەبینی ئەنجامەكەی بەو شێوەیەیە.

بەشی نزم و نمرەی بەرز   

ئەوەی لەم شێوازی وەرگرتنەی قوتابیان تێبینی دەكرێت ئەو پرسیارەیە كە قوتابی ئەوەنەی هەوڵ بۆ بەشێك دەدات تارادەیەكی كەم هەلی كاری بۆ دەستەبەر بكات ئەوەنە خولیا ی تێدا جێگا نابێتەوە مامۆستایەكی زانكۆش ئەم بۆچوونە پشت ڕاست دەكاتەوە مامۆستا ئازاد عەزیز مامۆستای بەشی كوردی لە كۆلێژی پەروەردەی بنەرەتی بۆ خەبات وتی: بەدڵنیاییەوە ئەوبەشە نزمانەی كە هەلی كاریان باشە و لەگەڵ هەلی كاری رۆژ خۆیان گونجاندووە زۆرترین قوتابی روویان تێدەكات، لەئاكامدا ئەو بەشانەش نمرەیان بەرز دەبێتەوە و بە نمرەی بەرز قوتابی وەردەگرن، هەرچی ئەو بەشانەی كە لەگەڵ سەردەم خۆیان نەگونجاندووە و هەلی كار و ئەگەری دامەزراندیان كەمە. كەمترین قوتابی هەڵیان دەبژێرن.  

 ساڵح مەهدی باوكی قوتابی هەرلەمبارەیەوە بۆ خەبات وتی: لە راستیدا دەبوو لەسەر بنەمای بەهرەی قوتابی بێت كە توانای چ بەشێكی هەیە و حەزی لە چ بەشێكە نەك نمرە پێوەر نییە قوتابی هەیە لەپۆلی  10-11  نمرەی زۆر باشی هەبووە لە 12 نەیهێناوە.

 دەربارەی ئەوەشی كە ئایا ئەم شێوازە لە وەرگرتن تاچەند گونجاوە ئەو مامۆستا ئازاد وتی : من ئەو شێوازە بە گونجاو نابینم، چونكە پێویستە حەزی تاك رۆڵی هەبێ لەو بەشەی لێی وەردەگیرێ. ئەگەر نا قوتابیەكە ناتوانێ خۆی لەو بوارە بدۆزێتەوە و تێیدا سەركەووتوو بێت كە بە ئارەزووی خۆی لێی وەرنەگیراوە. هاوشێوەی زۆرێك لە وڵاتە پێشكەوتووەكان پێویستە میكانیزمێك دابنرێ كە رەچاوی حەز و ئارەزووی قوتابی بكات لە كاتی وەرگرتنی لە زانكۆ و پەیمانگاكان.

بنەمای هەڵبژاردن 

رەوێن گەردی لە سەنتەری پۆلی 12 كەسەنتەرێكە و ئەم ماوەیە كاری پركردنەوەی فۆرمی زانكۆ لاین بۆ قوتابیانی پۆلی 12 ئەنجام دەدەن و قوتابیانی وەرنەگیراو سەردانیان دەكەن بۆ پەلپ گرتن لە هاتنەوەی ناوەكانیان ئەو بۆ خەبات و لەبارەی ئەوەی كە ئایا بنەمای قوتابی بۆ هەڵبژاردنی بەشێك یان كۆلێژێك چییە ئایا حەزە یان بنەمای دەسكەوتنی هەلی كارە یان نمرە؟ وتی: قوتابی كەلە قۆناغی 12 دەردەچێت پشت دەبەستێت بە كۆنمرەكەی كۆنمرەكەی چەند بێت ئەو بەشانەی كە وەریدەگرێت بەپێی حەزو ئارەزووی خۆی ریزی دەكات بۆنموونە قوتابییەك كە كۆنمرەی 70 بێت ئەو بەشانە ریز دەكات كە نمرەكەی وەریدەگرێت و بە پێی حەزیش هەڵیدەبژێرێت ئەمساڵ كەنمرە زۆر بوو خۆی لە خۆیدا كێشە بوو.   

دەربارەی ئەوەی كە ئایا ئەوان هەست ناكەن ئەو قوتابیانەی كۆنمرەیان بەرزە و لە شوێنێكی نزم ناویان هاتۆتەوە غەدریان لێكراوە یان هەڵە لە پركردنەوەی فۆرم هەیە؟ ئەو وتی:  لە راستییا هیچ شتێك نییە بەناوی غەدرو هەڵە، داد پەروەرترین سیستەمە نە واستەو نە غەدری تێدا نییە قۆتابی 70 ی هەیە بەس بەشی ئینگلیزی نوسیوە هەولێرو كۆیەو سۆران و ئاكرێ‌ هەموو بەشێكی ئینگلیزی تێكردووە دواتر پەیمانگای ریز كردووە یەكسەر لە پەیمانگایەك وەرگیراوە كە نمرەی 65 وەردەگرێت چونكە نمرەكەی ئەو ئینگلیزی وەریناگرێت ،خۆی سیستەمەكە پێت دەلێت ئەو بەشانە هەموو بنوسە كەلە نمرەكەت نزیكە ئەوانەی ناویان نەهاتۆتەوە %90 خۆیان كەمتەرخەم بوون ئەو بەشانەی كە لە نمرەكەی نزیك بووە نەینوسیوە 7000 قوتابی ناوی نەهاتۆتەوە 7000 كورسی ماوە بۆ ئەو قوتابیانەی كە بەشی بەرزیان ویستووەو نمرەكانیان كەمتری وەرگرتووە دابەشی سەر ئەو بەشانە دەبێت یان ئەوەتا پرناكاتەوەو خۆی هەڵگرتووە بۆ ساڵی ئایندە یان لە و كورسیانەی كەلەگەڵ نمرەكەی دەگونجێت دەبێت هەڵیبژێرێت وردە ەردە ئەو كورسیانە كە ئۆنلاینن كەمدەبێتەوە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابه‌تی تر

ئایا دەوڵەتی شکستخواردووی عێراق لەسەر دووڕیانە؟

د. سـامان سـۆرانی ئەزموونی حوکمڕانی عیراقی پاش ساڵی ٢٠٠٣ نزیکە لە ئەزموونی حوکمڕانی ئەڵمان…